Dwobu 39:1-30
39 “Asoo ɛze mekɛ mɔɔ awoka zo mbɔnkye fa wo la?+
Wɔnwu kɛzi weɛlɛ wo bɛ mra la ɛlɛ ɔ?+
2 Asoo ɛtia siane dodo mɔɔ ɔwɔ kɛ bɛdi la?
Ɛze mekɛ mɔɔ bɛfa bɛwo la ɔ?
3 Saa bɛwo bɛ mra a, bɛse ngoko,Na bɛ awolɛ nyane ne ba ye awieleɛ.
4 Bɛ mra anwo yɛ se na bɛnyi wɔ kpɔkɛ nu;Bɛfi bɛ nwo ɛkɛ ne bɛkɔ na bɛnzia bɛmba bieko.
5 Nwane a maa ɛbɔ nu asoaso* nyia fanwodi a,+Yɛɛ nwane a tulu ɛbɔ nu asoaso nyɛma ne mɔ a?
6 Memaa ɛsɛlɛ zo ɛyɛ ye sua nuNa memaa ngyenle azɛlɛ ne ɛyɛ ye tɛnlabelɛ.
7 Ɔgolo begyebegye mɔɔ bɛyɛ ye suakpole ne azo la anwo;Ɔnde ahenle mɔɔ ɛlɛka nane ne mɔ yeamaa bɛayɛ gyima la ane.
8 Ɔkpɔsɛkpɔsa awoka ngyikyi ne mɔ azo ɔkpondɛ adidileka,Ɔkpondɛ ndile amolɛ biala.
9 Asoo ɛbɔ nu ɛnlankɛ nyinli lɛ ɛhulolɛ kɛ ɔbazonle wɔ?+
Asoo ɔbala wɔ tunli* nu nɔɔzo?
10 Asoo ɛbava nyɛma wɔazɔ ɛbɔ nu ɛnlankɛ nyinli wɔamaa yeabɔ kofie,Anzɛɛ ɔbali ɛ nzi yeavundu mbɔnza nu ɔ?
11 Ɛbava ɛ nwo wɔado ye anwosesebɛ kpole ne azoNa wɔamaa yeayɛ wɔ gyima dɔɔnwo ne ɔ?
12 Asoo ɛbanyia ye nu anwodozo kɛ ɔbava wɔ ma yeazia yearɛlɛ wɔ,Na ɔbaboɔboa ɔ nloa wɔ wɔ ma ɛwosolɛ ɛleka ne ɔ?
13 Soholo fa anyelielɛ bɔ ɔ ndɛba anu,Noko asoo bɛbahola bɛava ɔ ndɛba nee ye ndɛkɛ bɛatoto akoso ɛdeɛ ne anwo?+
14 Ɔluakɛ ɔgyakyi ye aholonvia wɔ azɛlɛ ne anu,Na ɔmaa bɛ nwo yɛ wuluwulu wɔ ɛnwea ne anu.
15 Ɔ rɛle fi kɛ egyakɛ kola gelegele bɛ,Anzɛɛ ɛbɔ nu nane kola tietia zo.
16 Ɔ nee ɔ mra ɛnli ye boɛ kɛ asɛɛ bɛnle ye ɛdeɛ la;+Ɔnzulo kɛ ye ɛvɛlɛ kɛyɛ mgbane.
17 Ɔluakɛ Nyamenle ɛmaa nrɛlɛbɛ ɛbɔ ye,*Na yeammaa ye ndelebɛbo biala.
18 Noko saa ɔdwazo na ɔbɔ ɔ ndɛba anu a,Ɔsele ɛkpɔnwɔ nee ye kavolɛ ne.
19 Asoo ɛdawɔ a ɛmaa ɛkpɔnwɔ anwosesebɛ a?+
Ɛdawɔ a ɛfa enrinli ɛsiezie ɔ kɔme nu a?
20 Asoo ɛbahola wɔamaa yeawuluwulu kɛ abɛbɛ ɔ?
Ye ɛnwomenlelielɛ bedevinli ne yɛ ɛzulolɛ.+
21 Ɔfa ɔ gyakɛ ɔsisi azɛlɛ nwo wɔ bɔnza ne anu na ɔfa anwosesebɛ ɔwuluwulu;+Ɔfa ɛnriandilɛ ɔkɔ konle nloa.*+
22 Ɔsele ɛzulolɛ yɛɛ debie ɛndu ye ahonle.+
Konle dadeɛ ɛmmaa ɔnzia ɔ nzi.
23 Saa ɛda mbaka kodoku ne si ye foa ko a ɔyɛ dede,Atwɛ tendenle nee atwɛ ezinra* ta memeamemea.
24 Ɔfa anyelielɛ ɔwoso ɔ nwo, na ɔkɔ ɔ nyunlu,*Saa ɔte aweɛne ne ane a, ɔgyinla a, ɔngyinla.*
25 Saa bɛbɔ aweɛne ne anu a, ɔka kɛ, ‘Nnhee!’
Ɔte konle nganeɛ wɔ moamoaYɛɛ ɔte sogya mgbanyima ɛdeanlɛ nee konle ɛdeanlɛ ne mɔ.+
26 Asoo ɔlua wɔ ndelebɛbo zo a kyɛnyema tu,Na ɔtɛlɛdɛlɛ ɔ ndɛba anu ɔkile nyiakɛ a?
27 Anzɛɛ ɛdawɔ a ɛmaa kɔleɛ tu kɔ anwuma+Na ɔyɛ ye sane wɔ anwuma a,+
28 Ɔda bodane nu nɔɔzo,Na ɔtɛnla ye aranemgbole nu wɔ bodane nu* a?
29 Ɛkɛ ne a ɔfi ɔkpondɛ aleɛ a;+Ɔ nye nwu moamoa kpalɛ.
30 Ɔ mra no mogya;Na ɛleka mɔɔ avunli wɔ la, ɛkɛ ne a ɔwɔ a.+
Ɔbodwɛkɛ
^ Hibulu edwɛkɛ agbɔkɛ nwiɔ mɔɔ kile ɛbɔ nu asoaso ngakyile nwiɔ la anwo edwɛkɛ a wɔ ngyɛnu ɛhye anu a.
^ Anzɛɛ “nane adidilɛka.”
^ Anzɛɛ “ɔ rɛle ɛvi.”
^ Hibulu aneɛ nu, “Ɔfinde ɔkɔyia akodeɛ.”
^ Anzɛɛ “gyavelin.”
^ Hibulu aneɛ nu, “ɔme azɛlɛ ne.”
^ Anzɛɛ ɔkola ɔkile, “ɔnlie ɔnli.”
^ Hibulu aneɛ nu, “wɔ bodane gye nu.”
