Dwobu 41:1-34
-
Nyamenle ka Lɛveatan mɔɔ anwo yɛ ɛzulolɛ la anwo edwɛkɛ (1-34)
41 “Asoo ɛkɛhola ɛkɛva fɛlɛ koba ɛkɛhye Lɛveatan,*+Anzɛɛ ɛkɛva nyɛma ɛkɛkyekye ɔ tafinlima?
2 Asoo ɛkɛhola ɛkɛva nyɛma* ɛkɛwula ɔ bonyi nu,Anzɛɛ ɛkɛva koba* ɛkɛbɔ ye awudwelɛ nu?
3 Asoo ɔbabodo wɔ kɛ ɛze ye anwunvɔne,Anzɛɛ ɔbadendɛ bɛtɛɛ yeahile wɔ?
4 Asoo ɔ nee wɔ bayɛ ngyekyeleɛ,Amaa wɔava ye wɔayɛ wɔ akɛlɛ dahuu ɔ?
5 Asoo ɛ nee ye bali nwɔhoa kɛ alomaAnzɛɛ ɛbava nyɛma wɔazɔ ye amaa ɔ nee ɛ mra mraalɛ ngakula ali nwɔhoa ɔ?
6 Asoo gualilɛma bɛali ye bolɛ?
Asoo gualilɛma bɛahyɛ amaa bɛ nwo?
7 Asoo ɛbahola wɔava debie mɔɔ le kɛ atwɛ la wɔawowɔ ye nwoma ne+Anzɛɛ wɔava fɛlɛhyelɛ atwɛ wɔawowɔ ɔ ti anu ɔ?
8 Fa ɛ sa to ɔ nwo zo nea;Ɛbahakye konle ne na ɛnrɛyɛ zɔhane bieko!
9 Anyelazo biala mɔɔ ɛlɛ kɛ ɛdi ɔ nwo zo konim la bayɛ mgbane.
Ɛnwu ye bɔbɔ ala a ɛzulolɛ kpole ka wɔ.*
10 Awie biala ɛnle ɛkɛ mɔɔ kola gyegye ye a.
Ɔti nwane bɔbɔ a kɛhola kɛgyinla me nyunlu a?+
11 Nwane a ɛlimoa ɛmaa me debie mɔɔ ɔwɔ kɛ metua memaa ye a?+
Debie biala mɔɔ wɔ aleɛabo la le me ɛdeɛ.+
12 Menrɛyɛ koonwu wɔ ye nvɛyeba ne mɔ,Ye anwosesebɛ kpole ne nee ye nwonane ne mɔɔ bɛyɛle ye nwanwane adenle zo la anwo.
13 Nwane a ɛhola ɛye ye tɛladeɛ ne a?
Nwane a bawolo ye awudwelɛ ne mɔ mɔɔ yebuke nu la anu a?
14 Nwane a kola maa ɔbuke ɔ nloa* a?
Ɔ gye mɔɔ gua ɔ nloa anu la yɛ ɛzulolɛ.
15 Abonle ɛhonlone ɛhonlone wɔ ɔ nzi*Bɛva bɛbetɛbeta nwolɛ kpalɛ.
16 Ko biala beta ko kyengyeMɔɔ anwoma bɔbɔ ɛngola ɛnva bɛ avinli a.
17 Bɛsisa zolɛ kpalɛ;Bɛsosɔ bɛ nwo mɔɔ bɛngola bɛntete bɛ nu a.
18 Ye ɛnwomenle maa wienyi ba,Yɛɛ ɔ nye le kɛ aleɛbahye wienyi.
19 Ɛsɛlɛmanye kpakye fi ɔ nloa anu;Ɔ nloa anu kpa senle.
20 Esike fi ɔ bonyi nu finde,Kɛ fonlomo mɔɔ bɛva ndile bɛwuda senle wɔ nu la.
21 Ɔ bonyi nu anwoma maa emunlike sɔ,Yɛɛ sendɔlɔra vi ɔ nloa anu finde.
22 Anwosesebɛ kpole wɔ ɔ kɔme baka ne anu,Na ɛzulolɛ ka bɛdabɛ mɔɔ bɛkɛyia ye la amuala.
23 Ye nwonane ne mɔɔ ɛbelebele ɛgua zo la betɛbeta nwo kyengye;Bɛgyi ye kpundii, ɔle kɛ asɛɛ bɛholo bulalɛ bɛgua nwolɛ la, bɛngola bɛnye.
24 Ye ahonle yɛ se kɛ bolɛ,Ɛhɛe, ɔyɛ se kɛ ɛdibolɛ.
25 Saa ɔmaa ɔ nwo zo a, ɛzulolɛ ka anwosesebɛma bɔbɔ;Ɔka ɔ nwo a, bɛ nye zo ta bɛ.
26 Konle dadeɛ biala ɛngola ɛnli ɔ nwo zo konim;Yɛɛ atwɛ, ɛda, anzɛɛ akodeɛ biala noko ɛngola.+
27 Ɔbu bulalɛ kɛ abonle,Yɛɛ kɔbele kɛ baka kpɔlɔlera.
28 Ɛda baka ɛngola ɛmmaa ɔnnriandi;Totoabɔ bolɛ le kɛ ndile maa ye.
29 Ɔbu kokolobaka kɛ ndile,Na ɔsele atwɛ ezinra* mɔɔ bɛkɛwoso ye la.
30 Ɔ ko zo le kɛ buakɛ azinli mɔɔ ati yɛ nla;Ɔtɛlɛdɛlɛ ɔ nwo kɛ taboa* tɛtɛlɛ la wɔ azia nu.+
31 Saa ɔtɔ nyevile ne anu a, nzule ne wu awubue;Ɔle kɛ nwole mɔɔ ɛlɛwu wɔ buakɛ nu la.
32 Saa ɔlɛbia yeahɔ a ɔmaa nzule mɔɔ wɔ ɔ nzi la wu awubue.
Awie badwenle kɛ nyevile ne ɛvi egyɛne.
33 Ye ɛsaso biala ɛnle azɛlɛ ye azo,Ɔle abɔdeɛ mɔɔ bɛyɛ ye mɔɔ ɔnzulo ɛhwee a.
34 Ɔfa ɛya ɔnea debie biala mɔɔ memaa ɔ nwo zo la.
Ɔdi ɛbɔ nu nane anwo ɛzulolɛ kɔsɔɔti anwo zo belemgbunli.”
Ɔbodwɛkɛ
^ Ɔkola ɔkile ɛlɛnrɛne.
^ Hibulu aneɛ nu, “ndile,” ɛhye le ndile mɔɔ fifi azia nu mɔɔ bɛfa bɛyɛ nyɛma.
^ Hibulu aneɛ nu, “bowule.”
^ Anzɛɛ “ɔmaa ɛpɛ ɛtɔ.”
^ Hibulu aneɛ nu, “ɔ nyunlu.”
^ Anzɛɛ ɔkola ɔkile, “Ye anwomemaazo ne a le ye abonle ɛhonlone ɛhonlone ne mɔ.”
^ Anzɛɛ “gyavelin.”
^ Ɛhye kile, ma ɛwosolɛ taboa.
