Dwobu 8:1-22
8 Akee Beledade+ mɔɔ vi Hyuaa+ la buale kɛ:
2 “Ɛtendɛ zɛhae wɔahɔdwu kenlenzu?+
Ɛ nloa anu edwɛkɛ le kɛ anwoma kpole bie ala!
3 Asoo Nyamenle bahakyi pɛlepɛlelilɛ nye,Anzɛɛ Tumivolɛ Bedevinli ne bahakyi tenleneyɛlɛ nye?
4 Saa ɛ mra ne mɔ yɛle ɛtane tiale ye a,Ɔmaanle bɛnyianle bɛ atuadelɛ ne anwo anzohwenlɛ;*
5 Noko saa ɛfa ɛ nye wɔado Nyamenle anwo zo+Na wɔabodo Tumivolɛ Bedevinli ne wɔakpondɛ ɔ nyunlu ɛlolɛ,
6 Na saa amgba ɛ nwo te na ɛle tenlene a,+Anrɛɛ ɔbadie wɔ*Na yeamaa wɔanyia wɔ gyinlabelɛ ne bieko.
7 Na wɔ mɔlebɛbo le ekyi ɛdeɛ,Noko wɔ kenle bie bayɛ kpole.+
8 Mesɛlɛ wɔ, biza awolɛndoazo mɔɔ ɛze ɛhɔ la,Na fa wɔ adwenle kɔ ninyɛne mɔɔ bɛ papa mɔ nwunle bɛ la azo.+
9 Ɔluakɛ yɛmɛ anoma ala a bɛwole yɛ a, yɛɛ yɛnze ɛhwee,Ɔluakɛ yɛ mekɛ wɔ azɛlɛ ye azo le kɛ ɛlawolɛ.
10 Asoo bɛnrɛhilehile wɔNa bɛnrɛha mɔɔ bɛze ye la bɛnrɛhile wɔ ɔ?*
11 Asoo ndɔ baka banyi ayɛ tendenle wɔ ɛleka mɔɔ azia ɛnle la?
Baka banyi ayɛ tendenle wɔ ɛleka mɔɔ nzule ɛnle la ɔ?
12 Mekɛ mɔɔ ɔkɛbɔ ndotolo, mɔɔ bɛtɛtetele la,Ɔwe kolaa na baka gyɛne biala awe.
13 Kɛ bɛdabɛ mɔɔ bɛ rɛle fi Nyamenle la kɔsɔɔti awieleɛ* de la ɛne,Ɔluakɛ amumuyɛma* anyelazo baminli,
14 Bɛ anwodozo le mgbaneYɛɛ mɔɔ bɛfa bɛ rɛle bɛwula nu la le kɛ kɛdɛba ndenda* mɔɔ ɛngyɛ na yeatete la.
15 Ɔbadudu yeahisa ye sua ne, noko ɔbagolo yeagua;Ɔbabɔ mɔdenle kɛ ɔsɔ nu, noko ɔnrɛgyinla.
16 Ɔle kɛ baka mɔɔ nyia nzule na ɔlɛnyi wɔ ewia nu la,Na ye ngane ne mɔ tɛlɛdɛlɛ wɔ tola ne anu.+
17 Ye ndinli wolowolo awolɛ edukue nu;Ɔkpondɛ sua wɔ awolɛ ne mɔ avinli.*
18 Noko saa bɛtu ɔ bo* bɛfi ye ɛleka ne a,Ɛleka zɔhane bakpo ye na yeaha kɛ, ‘Metɛnwunle wɔ ɛlɛ.’+
19 Ɛhɛe, kɛ ɔbazi yeaminli* la ɛne;+Akee fofolɛ bafifi ndɛtɛlɛ ne anu.
20 Nɔhalɛ nu, Nyamenle ɛnrɛkpo bɛdabɛ mɔɔ bɛfa nɔhalɛlilɛ* bɛdua* la;Yɛɛ ɔnrɛboa* ɛtanevolɛma,
21 Ɔluakɛ ɔbamaa ɛzelekɛ ayi ɛ nloa anu tɛkɛɛNa ɛ nloa babonle ne adeɛdea nu anyelielɛ nu.
22 Bɛbamaa bɛdabɛ mɔɔ bɛkpɔ wɔ la aheda anyiemgba,Na amumuyɛma ɛdanlɛsua ɛnrɛdɛnla ɛkɛ ne bieko.”
Ɔbodwɛkɛ
^ Hibulu aneɛ nu, “Ɔvale bɛ ɔwulale bɛ atuadelɛ ne asa anu.”
^ Anzɛɛ “ɔbadwazo yeagyinla yeamaa wɔ.”
^ Hibulu aneɛ nu, “Na bɛnrɛha edwɛkɛ mɔɔ wɔ bɛ ahonle nu la ɔ?”
^ Hibulu aneɛ nu, “ndenle nu.”
^ Anzɛɛ “kpɔkyevolɛma.”
^ Hibulu aneɛ nu, “sua.”
^ Anzɛɛ “Ɔnea sua mɔɔ le awolɛ la.”
^ Anzɛɛ “bɛme ye.”
^ Anzɛɛ “kɛ ye adenle ne bazɛkye.”
^ Anzɛɛ “munlililɛ.” Nea Edwɛkɛbohilelɛ.
^ Anzɛɛ “edwɛkɛ ɛnle bɛ nwo.”
^ Hibulu aneɛ nu, “ɔnrɛzɔ.”
