Dwona 4:1-11
4 Noko Dwona anye anlie ɛhye anwo fee, na ɔvale ɛya kpole.
2 Yemɔti ɔzɛlɛle Gyihova kɛ: “O Gyihova, asoo tɛ edwɛkɛ mɔɔ ɛnee gyegye me wɔ mekɛ mɔɔ mewɔ me sua zo nehane la ɛne? Yemɔti a mɔlebɛbo ne membɔle mɔdenle kɛ menriandi meahɔ Tahyehye la;+ ɔluakɛ meze kɛ ɛle ahunluyelɛyelalɛ* nee anwunvɔnezelɛ Nyamenle, ɛkyɛ na wɔava ɛya yɛɛ ɛlɔlɛ kpundii ɛyi wɔ tɛkɛɛ,+ ɛle awie mɔɔ ɛdi amaneɛnwunlɛ nwo nyane.
3 Yemɔti O Gyihova, mesɛlɛ wɔ die me ngoane* fi me sa nu, ɔluakɛ ɔle kpalɛ kɛ mekɛwu tɛla kɛ mekɛdɛnla ngoane nu.”+
4 Gyihova bizale kɛ: “Asoo ɔle kpalɛ kɛ ɛkɛva ɛya kpole zɛhae ɔ?”
5 Akee Dwona vi suakpole ne azo vindele na ɔhɔdɛnlanle suakpole ne aduduleɛ nehane. Ɔbɔle kpɔda wɔ ɛkɛ na ɔdɛnlanle ɔ bo kɛ ɔnea mɔɔ bado suakpole ne la.+
6 Akee Gyihova Nyamenle maanle awolandoba* fifile hedale Dwona anwo zo, amaa yeanyia alubo na yealie ɔ menle wɔ ye ngyegyelɛ ne anwo. Na Dwona anye liele awolandoba ne anwo kpole.
7 Noko aleɛbahye ne, nɔhalɛ Nyamenle ne maanle kɛkɛba bie mɔɔ le kɛ sonlɛ la hɔlile awolandoba* ne, na ɔwule.
8 Mɔɔ ewia ne bɔle ɔ bo kɛ ɔfi la, eza Nyamenle maanle aduduleɛ anwoma wuluwulu bie bɔle, na ewia ne bɔle Dwona ati zo kpalɛ maanle ɔ nwo yɛle ye bɛtɛɛ. Ɔhɔle zo ɔhanle kɛ ɔkulo kɛ ɔwu,* na ɔhanle kɛ, “Ɔle kpalɛ kɛ mekɛwu tɛla kɛ mekɛdɛnla ngoane nu.”+
9 Nyamenle bizale Dwona kɛ: “Asoo ɔle kpalɛ kɛ ɛkɛva awolandoba ne anwo ɛya kpole ɔ?”+
Na ɔhanle kɛ: “Melɛ adenle mefa ɛya, meva ɛya kpole mɔɔ mekulo kɛ mewu a.”
10 Noko Gyihova hanle kɛ: “Ɛlile awolandoba* ne mɔɔ wɔanyɛ nwolɛ gyima, anzɛɛ tɛ ɛdawɔ a ɛmaanle ɔfifile, ɔfifile kenle ko nɔɔzo na ɔwule kenle ko nɔɔzo la anwo nyane.
11 Asoo ɔnle kɛ medame noko medi suakpole Nenɛvɛ+ mɔɔ menli mɔɔ bo 120,000 mɔɔ bɛnze kpalɛ a bɛnze ɛtane,* nee bɛ nyɛmoa dɔɔnwo ne mɔɔ wɔ zo la anwo nyane ɔ?”+
Ɔbodwɛkɛ
^ Anzɛɛ “ɛlolɛ.”
^ Anzɛɛ “ɛkɛla.”
^ Ɔle kɛ baka ne mɔɔ so awa la.
^ Ɔle kɛ baka ne mɔɔ so awa la.
^ Anzɛɛ “kɛ ye ɛkɛla kɛwu.”
^ Ɔle kɛ baka ne mɔɔ so awa la.
^ Anzɛɛ “bɛnze bɛ bɛne nee fema.”
