Ɛzoanvolɛma Gyima 11:1-30
11 Akee ɛzoanvolɛma ne nee mediema mɔɔ wɔ Dwudiya la dele kɛ maanle maanle ne anu amra noko ɛlie Nyamenle edwɛkɛ ne ɛdo nu.
2 Yemɔti mɔɔ Pita rale Gyɛlusalɛm la, menli mɔɔ gyi mrenyiazo ɛpɛlɛ ne anzi+ la bɔle ɔ bo dendɛle tiale ye,*
3 bɛhanle kɛ: “Ɛhɔle menli mɔɔ bɛtɛpɛle bɛ mrenyiazo la sua nu ɛ nee bɛ hɔlile debie.”
4 Ɛhye ati Pita hilehilele edwɛkɛ ne kɔsɔɔti anu hilele bɛ kɛ:
5 “Ɛnee mewɔ Dwɔpa suakpole ne azo melɛyɛ asɔne, na wɔ ɛnyelɛzodeɛnwunlɛ nu menwunle kɛ bɛlɛdwula debie bie mɔɔ le kɛ lenen ɛdanlɛ kpole mɔɔ bɛsosɔ* ɔ nloa nna ne amuala anu la aze wɔ me nwo ɛkɛ ne.+
6 Meneanle nuhua kpalɛ, na menwunle kɛ azɛlɛ ye azo nane ngakyile, nane anwo ɛzulolɛ, nane mɔɔ bɛtwenle bɛ nwo aze, nee anwomanyunlu nloma wɔ nu.
7 Eza mendele kɛ ɛnelɛ bie ɛlɛka ahile me kɛ: ‘Pita, dwazo ku bie di!’
8 Noko menganle kɛ: ‘Kyɛkyɛ Awulae, ɔluakɛ metɛdile debie mɔɔ nwolɛ ɛgua evinli anzɛɛ nwolɛ ɛnde la ɛlɛ.’
9 Ɛnelɛ ne mɔɔ vi anwuma la buale me ye fane nwiɔ ne azo kɛ: ‘Mmaka kɛ ninyɛne mɔɔ Nyamenle ɛde nwolɛ la anwo ɛgua evinli.’
10 Ɛhye zile fane nsa, na bɛhwenle debie biala bɛziale bɛhɔle anwuma.
11 Mekɛ zɔhane anu ala, mrenyia nsa mɔɔ bɛzoa bɛ la vi Sizalia ragyinlanle sua ne mɔɔ yɛwɔ nu la anuhɔlɛ ne.+
12 Akee sunsum ne zele me kɛ me nee bɛ ɛhɔ, memmamaa me adwenle nu yɛ me kesee. Na mediema nsia ɛhye mɔ noko nee me hɔle na yɛhɔle nrenyia ne sua nu.
13 “Ɔhanle ɔhilele yɛ kɛ ɔnwunle anwumabɔvolɛ bie kɛ ɔgyi ye sua nu ɛkɛ ne ɔlɛka kɛ: ‘Soa menli wɔ Dwɔpa maa bɛhɔvɛlɛ Saemɔn mɔɔ bɛfɛlɛ ye Pita la bɛrɛla,+
14 na ɔbaha kɛzi ɛ nee wɔ sua nu amra amuala bahola anyia ngoane la yeahile bɛ.’
15 Na membɔle ɔ bo kɛ metendɛ la, sunsum nwuanzanwuanza ne rale bɛ nwo zo kɛ mɔɔ ɔrale yɛdayɛ noko yɛ nwo zo wɔ mɔlebɛbo ne la.+
16 Na mengakyele Awulae edwɛkɛ ne mɔɔ ɛnee ɔta ɔka la kɛ: ‘Dwɔn vale nzule a zɔnenle a,+ na bɛmɛ bɛbava sunsum nwuanzanwuanza ne a bɛazɔne bɛ a.’+
17 Ɔti saa Nyamenle ɛva ahyɛlɛdeɛ ne mɔɔ ɔfa ɔmaa mgbane mɔɔ ɔvale ɔmaanle yɛ la bie yemaa bɛdabɛ mɔɔ bɛlie Awulae Gyisɛse Kelaese bɛli la a, ɛnee mame a le nwane mɔɔ ɔwɔ kɛ mesi Nyamenle adenle a?”+
18 Mɔɔ bɛdele ɛhye la bɛanga edwɛkɛ bieko,* na bɛwulale Nyamenle anyunlunyia bɛhanle kɛ: “Yemɔti Nyamenle ɛmaa menli mɔɔ wɔ maanle maanle ne anu la adenle kɛ bɛnlu bɛ nwo na bɛnyia ngoane.”+
19 Na bɛdabɛ mɔɔ amaneɛnwunlɛ ne mɔɔ dole Sitivin la maanle bɛbɔle asande+ la, hɔle too hɔvindele Fonehyea, Saepelɛse nee Anteɔko, noko bɛhanle edwɛkɛ ne bɛhilele Dwuuma ala.+
20 Na bɛ nuhua bie mɔ mɔɔ bɛvi Saepelɛse nee Saelini la noko hɔle Anteɔko na bɛdendɛle bɛhilele menli mɔɔ ka Giliki aneɛ la, na bɛhanle Awulae Gyisɛse anwo edwɛkpa ne.
21 Bieko, ɛnee Gyihova* asa wɔ bɛ nwo zo, na menli dɔɔnwo rayɛle diedima na bɛhakyile bɛrale Awulae ɛkɛ.+
22 Bɛ nwo edwɛkɛ hɔdwule asafo ne mɔɔ wɔ Gyɛlusalɛm la anzo nu, na bɛzoanle Baanabase+ bɛmaanle ɔhɔle too ɔhɔdwule Anteɔko.
23 Mekɛ mɔɔ ɔdwule ɛkɛ ne na ɔnwunle Nyamenle ɛlolɛ kpole ne la, ɔlile fɛlɛko na ɔbɔle ɔ bo ɔmaanle bɛ kɔsɔɔti anwosesebɛ kɛ, bɛva bɛ ahonle muala bɛhɔ zo bɛdoa Awulae;+
24 ɔluakɛ ɛnee ɔle sonla kpalɛ yɛɛ ɔlɛ diedi na sunsum nwuanzanwuanza ɛyi ye tɛkɛɛ. Ɛhye ati, menli dɔɔnwo liele Awulae lile.+
25 Ɔti ɔhɔle Taasɛse kɛ ɔkakpondɛ Sɔɔlo ɛsesebɛ.+
26 Na mɔɔ ɔnwunle ye la, ɔ nee ye rale Anteɔko. Yemɔti ɛvolɛ ko anu, bɛ nee asafo ne mɔɔ wɔ ɛkɛ ne la yiale nu na bɛhilehilele menli dɔɔnwo, na Anteɔko a bɛlimoale bɛluale Nyamenle adehilelɛ zo bɛvɛlɛle ɛdoavolɛma ne Kilisienema a.+
27 Mekɛ zɔhane anu, ngapezoma+ vi Gyɛlusalɛm rale Anteɔko.
28 Bɛ nuhua ko mɔɔ bɛfɛlɛ ye Agabɛse+ la dwazole na ɔluale sunsum ne azo ɔhanle ɔdole ɛkɛ ne kɛ ɛhɔne kpole bara azɛlɛ ye azo amuala,+ na ɔrale nu wɔ Kolɔdeɛse mekɛ zo.
29 Yemɔti mediema ne mɔ bɔle kpɔkɛ kɛ awie biala ɛva debie* biala mɔɔ ɔkɛnyia la ɛrɛla na bɛva bɛhɔmaa+ mediema mɔɔ wɔ Dwudiya la;
30 na bɛyɛle ye zɔ, bɛvale bɛmaanle Baanabase nee Sɔɔlo+ hɔmaanle mgbanyima ne mɔ.
Ɔbodwɛkɛ
^ Anzɛɛ “nee ye zule kpolera.”
^ Anzɛɛ “bɛdedɛ.”
^ Giliki aneɛ nu, “bɛyɛle koonwu.”
^ Anzɛɛ “moalɛ ninyɛne.”
