Ɛzoanvolɛma Gyima 26:1-32
26 Agelepa+ zele Pɔɔlo kɛ: “Ɛlɛ adenle ɛka wɔ edwɛkɛ ne.” Akee Pɔɔlo dɛlɛle ɔ sa nu na ɔhilehilele ye edwɛkɛ ne anu kɛ:
2 “Belemgbunli Agelepa, ɔyɛ me fɛ kɛ ninyɛne mɔɔ Dwuuma ɛdo me ɛzonle wɔ nwolɛ la amuala,+ ɛ nyunlu a mekilehile me edwɛkɛ ne anu ɛnɛ kenle ye a,
3 titili, ɔluakɛ ɛze Dwuuma amaamuo nee bɛ kpolerazulɛ ne mɔ amuala kpalɛ. Yemɔti mesɛlɛ wɔ si abotane tie me.
4 “Nɔhalɛ nu, ɔvi me ngakula nu ɛbɛla mɔɔ membɔle ye wɔ me maanle ne anu nee Gyɛlusalɛm la, Dwuuma amuala ze ye kpalɛ+
5 yemɔti bɛze me dɛba, saa bɛkulo kɛ bɛdi ɛhye anwo daselɛ a, bɛbahola bɛaha bɛahile wɔ kɛ ɛnee meboka Falasiima eku ne mɔɔ yɛ se la anwo.+
6 Noko kɛkala ɛwɔkɛ mɔɔ Nyamenle bɔle yɛ nenyia mɔ la anu anyelazo mɔɔ melɛ la ati+ a bɛlɛdi me edwɛkɛ a;
7 ɛwɔkɛ ɛhye ala a yɛ mbusua 12 ne anye la zo kɛ ɔbara nu na ɔlua zo bɛsonle ye ɛsesebɛ alehyenlɛ nee aledwolɛ a. O Nana, anyelazo ɛhye ati a Dwuuma ɛdo me ɛzonle a.+
8 “Duzu ati a bɛnlie bɛnli kɛ Nyamenle dwazo mowuamra ɛ?
9 Mame, ɛnee medie medi kɛ ɔwɔ kɛ meyɛ ninyɛne dɔɔnwo metia Gyisɛse mɔɔ vi Nazalɛte la duma ne.
10 Ɛhye pɛpɛɛpɛ a menyɛle ye wɔ Gyɛlusalɛm a, na menguale nwuanzanwuanzama dɔɔnwo efiade,+ ɔluakɛ menliele tumi wɔ ɛsɔfo mgbanyinli ne mɔ ɛkɛ;+ na saa bɛku bɛ a medie meto nu.
11 Mendwenle bɛ nzo fane dɔɔnwo wɔ nyianu azua ne mɔ anu, membɔle mɔdenle kɛ memaa bɛakpo bɛ diedi; na kɛmɔ menvale bɛ nwo ɛya kpole la ati, mengɔle azuamgbole ngakyile zo bɔbɔ kɛ mekayɛ bɛ kpɔdekpɔde.
12 “Kenle ko bie, ɛnee melɛkɔ Damasekɛse ɔluakɛ ɛsɔfo mgbanyinli ne mɔ maanle me tumi na bɛzoanle me kɛ mengɔnyɛ gyima ko ne ala bie wɔ lɔ,
13 mɔɔ melua adenle nu na bɛbɔle ewiazo bulu nee nwiɔ la, O Nana, menwunle kɛ wienyi bie mɔɔ ta tɛla sɛnzɛne ne la vi anwuma rabɔle yiale me nee menli mɔɔ nee me lua la.+
14 Na mekɛ mɔɔ yɛ muala yɛpɛle yɛfinle la, mendele ɛnelɛ bie kɛ ɔlɛka yeahile me wɔ Hibulu aneɛ nu kɛ: ‘Sɔɔlo, Sɔɔlo, duzu ati a ɛlɛyɛ me kpɔdekpɔde ɛ? Ɛkɔ zo ɛto ɛ gyakɛ ɛwɔ kpɔma* nloa a, ɛboda ɛ nwo.’
15 Noko menganle kɛ: ‘Yɛmenle, ɛdawɔ nwane ɔ?’ Na Awulae zele me kɛ: ‘Medame Gyisɛse mɔɔ ɛlɛyɛ me kpɔdekpɔde la ɔ.
16 Noko dwazo gyinla ɛ gyakɛ anu. Ɛhye ati a meye me nwo mehile wɔ a, kɛ mekpa wɔ kɛ me sonvolɛ na wɔali me nwo daselɛ wɔ ninyɛne mɔɔ wɔnwu ye nee mɔɔ mebamaa wɔanwu ye wɔ me nwo la anwo.+
17 Na mebalie wɔ meavi menli ɛhye nee maanle maanle mɔɔ melɛsoa wɔ wɔ bɛ avinli la asa anu+
18 na wɔabuke bɛ nye,+ wɔamaa bɛavi awozinli nu+ bɛara wienyi nu+ na bɛavi Seetan tumi bo+ bɛara Nyamenle ɛkɛ, amaa bɛanyia ɛtanefakyɛ+ na bɛanyia agyapadeɛ wɔ bɛdabɛ mɔɔ bɛlua me nu diedi zo bɛde bɛ nwo la avinli.’
19 “Ɛhye ati, Belemgbunli Agelepa, meanyɛ anzosesebɛ wɔ anwuma ɛnyelɛzodeɛnwunlɛ ne anwo,
20 emomu menlimoale menganle edwɛkɛ ne mengilele bɛdabɛ mɔɔ bɛwɔ Damasekɛse la,+ yɛɛ akee bɛdabɛ mɔɔ bɛwɔ Gyɛlusalɛm+ nee Dwudiya maanle ne anu amuala yɛɛ maanle maanle ne mɔ, kɛ bɛnlu bɛ nwo na bɛrɛla Nyamenle ɛkɛ na bɛyɛ ninyɛne mɔɔ kile anlubɛnwo la.+
21 Ɛhye ati a Dwuuma ne hyele me wɔ ɛzonlenlɛsua ne anu na bɛbɔle mɔdenle kɛ bɛku me la.+
22 Noko kɛmɔ menyia Nyamenle moalɛ ne la ati, mehɔ zo meli menli mɔɔ lɛ dibilɛ nee mɔɔ bɛnlɛ bie la daselɛ too yeradwu ɛnɛ, metɛkanle ɛhwee kyesɛ mɔɔ Ngapezoma ne nee Mosisi hanle kɛ ɔbazi la ala+—
23 kɛ Kelaese ne banwu amaneɛ+ na kɛmɔ bɛbalimoa bɛadwazo ye bɛavi mowuamra anu la ati,+ ɔbaha wienyi ne anwo edwɛkɛ yeahile menli ɛhye mɔ nee maanle maanle ne.”+
24 Na mɔɔ Pɔɔlo ɛlɛka ɛhye mɔ ava ahilehile ye edwɛkɛ ne anu la, Fɛsetɛse deanle nu kɛ: “Pɔɔlo, ɛlɛbɔ ɛlane! Nwomazukoalɛ dɔɔnwo ɛlɛmaa wɔabɔ ɛlane!”
25 Noko Pɔɔlo hanle kɛ: “Anyunlunyianli Fɛsetɛse, membɔ ɛlane, emomu melɛka nɔhalɛ edwɛkɛ mɔɔ nrɛlɛbɛ wɔ nu la.
26 Nɔhalɛ nu, belemgbunli ne mɔɔ melɛtendɛ meahile ye mɔɔ menzulo la ze ninyɛne ɛhye mɔ kpalɛ; na medie medi kɛ ɔnwunle ninyɛne ɛhye mɔ amuala, ɔluakɛ bɛanyɛ ɛhye mɔ biala wɔ fealeranu.+
27 Belemgbunli Agelepa, ɛdie Ngapezoma ne ɛdi ɔ? Meze kɛ ɛdie bɛ ɛdi.”
28 Noko Agelepa zele Pɔɔlo kɛ: “Mekɛ ekyi ɛhye ala anu ɛmaa meayɛ Kilisienenli.”
29 Na Pɔɔlo hanle kɛ: “Mesɛlɛ Nyamenle kɛ mekɛ ekyi nu o, mekɛ tendenle nu o, tɛ ɛ ngome ala, emomu menli kɔsɔɔti mɔɔ ɛlɛtie me ɛnɛ la bayɛ kɛ medame la, mɔɔ efiade ɛlalɛ ɛmboka nwo a.”
30 Akee belemgbunli ne, amɛnlado ne yɛɛ Bɛnise nee menli mɔɔ bɛ nee bɛ dede ɛkɛ ne la dwazole.
31 Noko mɔɔ bɛlɛkɔ la, bɛbɔle ɔ bo bɛhanle kɛ: “Nrenyia ɛhye ɛtɛyɛle debie mɔɔ fɛta ewule anzɛɛ efiadedolɛ a.”+
32 Agelepa zele Fɛsetɛse kɛ: “Saa nrenyia ɛhye ando edwɛkɛ ne ammaa Siza a, anrɛɛ ɔwɔ kɛ bɛgyakyi ye.”+
Ɔbodwɛkɛ
^ Kpɔma ɛhye le baka mɔɔ bɛzinzi ɔ ti mɔɔ bɛfa bɛka nane.
