Ɛzoanvolɛma Gyima 5:1-42
5 Noko, nrenyia bie mɔɔ bɛfɛlɛ ye Ananayase la nee ɔ ye Safaela dɔnenle bɛ agyapadeɛ bie.
2 Na ɔyele ezukoa ne bie ɔziele, mɔɔ ɛnee ɔ ye ze a, na ɔvale ekyi bie ɔrɛlɛle ɛzoanvolɛma ne.+
3 Noko Pita hanle kɛ: “Ananayase, duzu ati a wɔmaa Seetan ɛzi wɔ ahonle kɛ ɛbɔ adalɛ+ ɛhile sunsum nwuanzanwuanza+ ne na ɛde azɛlɛ ne ezukoa ne bie ɛzie ɛ?
4 Mɔɔ ɛtɛtɔnenle azɛlɛ ne la, ɛnee ɔnle wɔ ɛdeɛ ɔ? Yɛɛ mekɛ mɔɔ ɛdɔnenle ye la, ɛnee ezukoa ne ɛnle wɔ ɛkɛ ɔ? Kɛ ɔyɛle mɔɔ ɛnyianle adwenle zɛhae wɔ wɔ ahonle nu ɛ? Wɔbɔ adalɛ wɔhile Nyamenle, wɔambɔ wɔangile menli.”
5 Mɔɔ Ananayase dele edwɛkɛ ɛhye la, ɔpɛle ɔfinle na ɔwule. Na ɛzulolɛ kpole hanle bɛdabɛ mɔɔ bɛdele la amuala.
6 Akee mgbavolɛ ne mɔ dwazole na bɛvale ɛdanlɛ bɛkyekyele ye, bɛvale ye bɛvindele na bɛhɔziele ye.
7 Akee kɛyɛ dɔnehwele nsa anzi, ɔ ye rale ɛkɛ na ɛnee ɔnze mɔɔ ɛzi a.
8 Pita bizale ye kɛ: “Asoo ezukoa mɔɔ bɛ mu nwiɔ bɛdɔnenle azɛlɛ ne bɛnyianle la ɛne?” Ɔbuale kɛ: “Ɛhɛe, ɔ muala ɔ.”
9 Ɔti Pita zele ye kɛ: “Duzu ati a bɛ mu nwiɔ bɛli bɛ nloa kɛ bɛsɔ Gyihova* sunsum ne bɛanlea ɛ? Nea! Bɛdabɛ mɔɔ bɛhɔziele ɛ hu la a ɛdwu anlenkɛ ne anloa la, na bɛbava ɛdawɔ noko bɛahɔ.”
10 Ɛkɛ ne ala ɔpɛle ɔfinle ɔ gyakɛ anwo ɛkɛ na ɔwule. Mekɛ mɔɔ mgbavolɛ ne mɔ rale la, bɛnwunle kɛ yewu na bɛmaanle ye zo bɛhɔziele ye wɔ ɔ hu anwo ɛkɛ.
11 Yemɔti ɛzulolɛ kpole hanle asafo ne nee bɛdabɛ mɔɔ bɛdele edwɛkɛ ɛhye la amuala.
12 Bieko, ɛzoanvolɛma ne yɛle sɛkɛlɛneɛ nee nwanwane ninyɛne dɔɔnwo;+ na ɛnee bɛ muala bɛyia nu wɔ Sɔlɔmɔn Abenlana ne anu.+
13 Nɔhalɛ nu, bɛdabɛ mɔɔ bɛha la anu biala annyia akɛnrasesebɛ amboka bɛ nwo, noko akee ɛnee menli ne ka bɛ nwo edwɛkɛ kpalɛ.
14 Mɔɔ tɛla ɛhye la, mrenyia nee mraalɛ dɔɔnwo liele Awulae lile na bɛrayɛle ɛdoavolɛma.+
15 Bɛvale wuliravolɛma bɔbɔ bɛrale awɔdenle mgbole ne mɔ anloa na bɛvale bɛ bɛguale ɛsokpa ngyikyi nee ɛkpa zo, na ɛnee bɛ nye la kɛ saa Pita se ɛkɛ a, ye ɛlawolɛ badɔ bɛ nwo zo na bɛade kpɔkɛ.+
16 Eza menli dɔɔnwo vi azuamgbole mɔɔ bikye Gyɛlusalɛm la azo vale bɛ menli mɔɔ ɛnde kpɔkɛ nee bɛdabɛ mɔɔ sunsum ɛtane wɔ bɛ nwo la rale, na bɛyɛle bɛ muala ayile.
17 Noko ɛsɔfo kpanyinli ne nee bɛdabɛ mɔɔ bɛboka ɔ nwo, mɔɔ bɛwɔ Sadusiima eku ne anu la amuala dwazole, na ɛnee bɛva ɛya kpole.
18 Na bɛhyele ɛzoanvolɛma ne na bɛhɔguale bɛ efiade.+
19 Noko nɔe ne, Gyihova* anwumabɔvolɛ bukebukele efiade ne nlenkɛ ne mɔ,+ ɔmaanle bɛvindele na ɔhanle kɛ:
20 “Bɛhɔgyinla ɛzonlenlɛsua ne anu na bɛha ngoane ne mɔɔ ɛlɛba la anwo edwɛkɛ bɛhile menli ne amuala.”
21 Mɔɔ bɛdele ɛhye la, bɛhɔle ɛzonlenlɛsua ne anu nwonlomɔ mangyee ne na bɛbɔle ɔ bo kɛ bɛkilehile.
Na mɔɔ ɛsɔfo kpanyinli ne nee bɛdabɛ mɔɔ bɛboka ɔ nwo la rale la, bɛvɛlɛle Sanhedelin ne nee Yizilayɛ mgbanyima ne mɔ amuala na bɛzoanle bɛmaanle bɛhɔle efiade ɛkɛ ne kɛ bɛhɔva ɛzoanvolɛma ne bɛrɛla.
22 Noko mɔɔ sinzavolɛma ne dwule ɛkɛ ne la, bɛannwu bɛ wɔ efiade ɛkɛ ne. Yemɔti bɛziale bɛrabɔle bɛ amaneɛ,
23 bɛhanle kɛ: “Yɛnwunle kɛ bɛdo efiade ne anu kpalɛ, yɛɛ sinzavolɛma ne gyigyi nlenkɛ ne mɔ anloa, noko mɔɔ yɛbukele la, yɛannwu awie biala wɔ ɛkɛ.”
24 Na mekɛ mɔɔ ɛzonlenlɛsua ne azo neavolɛ ne nee ɛsɔfo mgbanyima ne mɔ dele edwɛkɛ ɛhye la, ɔzinle bɛ nwo na ɛnee bɛnze mɔɔ bazi bieko a.
25 Noko awie rabɔle bɛ amaneɛ kɛ: “Bɛnlea! Menli ne mɔɔ bɛguale bɛ efiade la wɔ ɛzonlenlɛsua ne anu lɔ, bɛgyi ɛkɛ bɛlɛkilehile menli ne.”
26 Na ɛzonlenlɛsua ne azo neavolɛ ne nee ye sinzavolɛma ne hɔvale bɛ rale, noko bɛanyɛ bɛ basabasa biala ɔluakɛ ɛnee bɛsulo kɛ menli ne bazi bɛ awolɛ.+
27 Ɔti bɛvale bɛ bɛragyinlanle Sanhedelin ne anyunlu. Na ɛsɔfo kpanyinli ne bizebizale bɛ edwɛkɛ
28 na ɔhanle kɛ: “Yɛduale bɛ kpunli kɛ bɛmmakilehile wɔ duma ɛhye anu bieko,+ noko nea! bɛva bɛ ngilehilelɛ ne bɛkponde Gyɛlusalɛm amuala na bɛyɛ bɛamaa yɛali nrenyia ɛhye ewule ne anwo ɛzonle.”+
29 Pita nee ɛzoanvolɛma ne mɔɔ ɛha la buale bɛ kɛ: “Ɔwɔ kɛ yɛtie Nyamenle kɛ tumivolɛ na tɛ menli ɔ.+
30 Yɛ nenyia mɔ Nyamenle ne dwazole Gyisɛse mɔɔ bɛhendanle ye baka zo bɛhunle ye la.+
31 Yemɔ a Nyamenle ɛkpogya ye zo kɛ Adekilevolɛ Kpanyinli+ nee Ngoanedievolɛ+ wɔ ɔ sa fema zo+ a, amaa Yizilayɛma ahola anlu bɛ nwo na bɛanyia ɛtanefakyɛ.+
32 Na yɛle edwɛkɛ ɛhye mɔ anwo alasevolɛ,+ yɛɛ sunsum nwuanzanwuanza ne+ mɔɔ Nyamenle ɛva ɛmaa bɛdabɛ mɔɔ bɛtie ye kɛ tumivolɛ la noko di nwolɛ daselɛ.”
33 Mekɛ mɔɔ bɛdele ɛhye la, bɛvale ɛya* kpole na ɛnee bɛkpondɛ kɛ bɛku bɛ.
34 Noko Falasiinli bie mɔɔ bɛfɛlɛ ye Gameeleɛle+ la dwazole gyinlanle wɔ Sanhedelin ne anu; ɔle Mɛla kilehilevolɛ mɔɔ menli ne amuala bu ye, na ɔmaanle bɛvale ɛzoanvolɛma ne bɛvindele ekyii.
35 Akee ɔzele bɛ kɛ: “Yizilayɛma, bɛnlea boɛ wɔ mɔɔ bɛkulo kɛ bɛfa bɛyɛ menli ɛhye mɔ la anwo.
36 Kɛ neazo la, mekɛ bie mɔɔ ɛraze ɛhɔ la, Tiyudase mɔɔ ɔhanle kɛ ɔle sonla titili la dwazole na menli kɛyɛ 400 lile ɔ nzi. Noko bɛhunle ye na menli mɔɔ li ɔ nzi la kɔsɔɔti bɔle asande na bɛ bo zo minlinle.
37 Yemɔ anzi, Dwudase mɔɔ vi Galeli la noko dwazole wɔ menli ɛdianlɛ mekɛ ne anu, na ɔhwenle menli ɔlile ɔ nzi. Nrenyia ɛhye noko abo zo minlinle na bɛdabɛ mɔɔ bɛlile ɔ nzi la kɔsɔɔti bɔle asande.
38 Ɛhye ati, meka meahile bɛ kɛ bɛmmafa bɛ nloa bɛwulowula menli ɛhye mɔ edwɛkɛ nu, bɛgyakyi bɛ. Ɔluakɛ saa ngyehyɛleɛ ɛhye anzɛɛ gyima ɛhye vi sonla a ɔbazɛkye;
39 noko saa ɔvi Nyamenle a, bɛnrɛhola bɛnrɛzɛkye bɛ.+ Emomu, bɛannea boɛ a ɔbayɛ kɛ bɛ nee Nyamenle mumua ne a ɛlɛko a.”+
40 Bɛdiele ye folɛdulɛ ne na bɛvɛlɛle ɛzoanvolɛma ne, bɛbole bɛ+ na bɛhanle bɛhilele bɛ kɛ bɛmmaka Gyisɛse duma ne anwo edwɛkɛ bieko, na bɛgyakyile bɛ bɛmaanle bɛhɔle.
41 Ɔti bɛvale fɛlɛkolilɛ+ bɛvile Sanhedelin ne anyunlu ɛkɛ bɛhɔle, ɔluakɛ bɛbule bɛ kɛ ye duma ne ati ɔfɛta kɛ bɛgua bɛ nyunlu aze.
42 Na alehyenlɛ biala bɛhɔle ɛzonlenlɛsua ne anu nee azua nu+ bɛhilehilele na bɛhanle Kelaese Gyisɛse anwo edwɛkpa ne bɛhilele mɔɔ bɛangyakyi a.+
