Hagae 2:1-23
2 Siane ne mɔɔ tɔ zo nsuu, ye kenle 21 ne azo, Gyihova edwɛkɛ rale ngapezonli Hagae+ ɛkɛ ne kɛ,
2 “Mesɛlɛ wɔ biza Hyealeteɛle ara Zɛlubabɛle+ mɔɔ le Dwuda+ amɛnlado, nee Gyɛhozadake+ ara Dwɔhyua+ mɔɔ le ɛsɔfo kpanyinli la nee menli mɔɔ ɛha la kɔsɔɔti kɛ:
3 ‘Nwane mɔ a wɔ bɛ avinli mɔɔ bɛnwunle sua* ɛhye alimoa anyunlunyia ne a?+ Na kɛkala kɛzi bɛnwu ye ɛ? Saa bɛfa bɛtoto alimoa ɛdeɛ ne anwo a, asoo ɔnle debie mgbane wɔ bɛ nye zo ɔ?’+
4 “‘Noko kɛkala maa ɛ nwo ɛyɛ se, Zɛlubabɛle,’ kɛ Gyihova se la ɛne, ‘maa ɛ nwo ɛyɛ se, Gyɛhozadake ara ɛsɔfo kpanyinli Dwɔhyua.’
“‘Menli kɔsɔɔti mɔɔ wɔ azɛlɛ ne azo la, bɛmaa bɛ nwo ɛyɛ se+ na bɛyɛ gyima ne,’ kɛ Gyihova se la ɛne.
“‘Ɔluakɛ me nee bɛ lua,’+ kɛ ɛlɔne Gyihova se la ɛne.
5 ‘Bɛhakye ɛwɔkɛ mɔɔ membɔle bɛ wɔ mekɛ mɔɔ bɛvile Yigyibiti la,+ na me sunsum ne nee bɛ dɛnlanle.*+ Bɛmmasulo.’”+
6 “Ɔluakɛ mɔɔ ɛlɔne Gyihova ɛha la ɛne, ‘Ɔbazi bieko—ɔnrɛhyɛ fee—na meakpusu anwuma nee azɛlɛ ne nee nyevile yɛɛ azɛlɛ resee.’+
7 “‘Na mebakpusu maanle maanle kɔsɔɔti, na maanle maanle kɔsɔɔti anu ninyɛne mɔɔ sonle bolɛ la* bara;+ na mebamaa anyunlunyia ayi sua ɛhye,’+ ɛlɔne Gyihova a se a.
8 “‘Dwɛtɛ fufule le me ɛdeɛ yɛɛ nvutuke le me ɛdeɛ,’ kɛ ɛlɔne Gyihova se la ɛne.
9 “‘Sua ɛhye kenle bie anyunlunyia ne bayɛ kpole adɛla alimoa ɛdeɛ ne,’+ ɛlɔne Gyihova a se a.
“‘Na mebamaa anzodwolɛ adɛnla ɛke,’+ kɛ ɛlɔne Gyihova se la ɛne.”
10 Siane ne mɔɔ tɔ zo ngɔnla kenle 24 ne azo, wɔ Dalayɛse ɛvolɛ mɔɔ tɔ zo nwiɔ la anu, Gyihova edwɛkɛ rale ngapezonli Hagae+ ɛkɛ ne kɛ:
11 “Mɔɔ ɛlɔne Gyihova ɛha la ɛne, ‘Mesɛlɛ wɔ, biza ɛsɔfoma ne mɛla ne anwo edwɛkɛ:+
12 “Saa nrenyia fa nane nwuanzanwuanza gua ye tɛladeɛ nu, na ye tɛladeɛ ne ka paano anzɛɛ abomu* anzɛɛ nwanye anzɛɛ nwole anzɛɛ aleɛ biala a, asoo ɔbayɛ nwuanzanwuanza?”’”
Ɛsɔfoma ne buale kɛ: “Kyɛkyɛ!”
13 Akee Hagae bizale kɛ: “Saa awie mɔɔ anwo ɛgua evinli ɔluakɛ yeva ɔ sa yeha funli* la sɔ ninyɛne ɛhye mɔ bie anu a, nwolɛ bagua evinli ɔ?”+
Ɛsɔfoma ne buale kɛ: “Nwolɛ bagua evinli.”
14 Ɔti Hagae hanle kɛ: “‘Kɛ menli ɛhye mɔ de la ɛne, na kɛ maanle ɛhye de wɔ me nye zo la ɛne,’ Gyihova a se a, ‘yɛɛ kɛ bɛ sa anloa gyima kɔsɔɔti de la ɛne; debie biala mɔɔ bɛkɛva bɛkɛra la anwo ɛgua evinli.’
15 “‘Noko kɛkala, mesɛlɛ bɛ, bɛdwenle* mɔɔ bɛlɛyɛ ɔvi ɛnɛ mɔɔ kɔ la anwo kpalɛ: Kolaa na bɛava bolɛ bɛado bolɛ zo wɔ Gyihova ɛzonlenlɛsua ne ɛzilɛ nu la,+
16 kɛzi ɛnee ɔde ɛ? Saa awie ba ma mɔɔ bɛboɔboa ɔ nloa la anwo na ɔ nye la kɛ ɔbanyia ɛzuzudeɛ 20 a, 10 ala a ɔnyia a; yɛɛ saa awie kɔ kuma mɔɔ bɛhwihwi nwanye wɔ nu la anwo kɛ ɔbaza ɛzuzudeɛ 50 a, ɔnyia 20 ala;+
17 Menvale anwoma wuluwulu nee ngɛkɛba mɔɔ sɛkye ninyɛne nee ezuawolɛ membale bɛ nwo zo,+ nee bɛ sa anloa gyima kɔsɔɔti azo, noko bɛ nuhua biala anzia amba me ɛkɛ,’ kɛ Gyihova se la ɛne.
18 “‘Mesɛlɛ bɛ, bɛdwenle* mɔɔ bɛlɛyɛ ɔvi ɛnɛ mɔɔ kɔ la anwo kpalɛ, ɔvi siane mɔɔ tɔ zo ngɔnla kenle 24 ne azo mɔɔ bɛwulale Gyihova ɛzonlenlɛsua ne adiabo la;+ bɛdwenle ɛhye anwo kpalɛ:
19 Asoo ma tɛbɔ ninyɛnezielɛ ɛleka ne?*+ Asoo vanye, feege, pɔmegelanate nee ɔlivi baka ɛzo ɔ? Ɔvi ɛnɛ mɔɔ kɔ la mebayila bɛ.’”+
20 Gyihova edwɛkɛ ne rale Hagae ɛkɛ ne bieko wɔ siane ne kenle mɔɔ tɔ zo 24 la azo+ kɛ:
21 “Ka kile Dwuda amɛnlado, Zɛlubabɛle kɛ, ‘Mebakpusu anwuma nee azɛlɛ ne.+
22 Mebadu arelemgbunli ne mɔ mbia meagua na meazɛkye maanle maanle arelemgbunli ne mɔ anwosesebɛ;+ mebaha ehwili nee ye kavolɛma meagua, na mgbɔnwɔ nee bɛ kavolɛma badu agua, awie biala bawu ɔ diema konle dadeɛ nloa.’”+
23 Kɛ ɛlɔne Gyihova se la ɛne, “‘Kenle zɔhane, mebava wɔmɔ, me sonvolɛ Hyealeteɛle+ ara Zɛlubabɛle,’+ kɛ Gyihova se la ɛne, ‘na mebamaa wɔayɛ kɛ nzonlɛyɛlɛ kpɔdelera la, ɔluakɛ wɔmɔ a mekpa nu meye wɔ a,’ kɛ ɛlɔne Gyihova se la ɛne.”
Ɔbodwɛkɛ
^ Anzɛɛ “ɛzonlenlɛsua.”
^ Anzɛɛ ɔkola ɔkile, “mekɛ mɔɔ ɛnee me sunsum ne gyi bɛ avinli la.”
^ Anzɛɛ “ninyɛne mgbalɛ.”
^ Anzɛɛ “sutulu.”
^ Anzɛɛ “ɛkɛla.” Nea Edwɛkɛbohilelɛ.
^ Anzɛɛ “bɛzuzu.”
^ Anzɛɛ “bɛzuzu.”
^ Anzɛɛ “ma kuma ne anu?”