Hozia 1:1-11
1 Gyihova edwɛkɛ mɔɔ ɔhanle ɔhilele Biyɛlae ara Hozia* wɔ Dwuda Arelemgbunli Yuzaya,+ Dwotam,+ Ehaze+ nee Hɛzikaya+ yɛɛ Yizilayɛ Belemgbunli+ Gyɛlɔbowam+ mɔɔ le Dwowahye+ ara ne mekɛ zo la ɛne.
2 Mɔɔ Gyihova bɔle ɔ bo kɛ ɔ nee Hozia tendɛ la, Gyihova hanle hilele Hozia kɛ: “Kɔgya tuutuunli* raalɛ na wo tuutuu* mralɛ, ɔluakɛ ɔlua tuutuu ɛbɔlɛ* zo azɛlɛ ne ɛhwe ɔ nwo ɛvi Gyihova anwo bɔkɔɔ.”+
3 Ɔti ɔhɔgyale Debeleeyem ara raalɛ Goma, ɔnrenzɛle na ɔwole ralɛ nrenyia ɔmaanle ye.
4 Na Gyihova zele ye kɛ: “To ye Gyɛzeɛle,* ɔluakɛ ɔnrɛhyɛ mebamaa Gyihu+ abozoamra abu mgbonda wɔ mogya mɔɔ bɛha bɛgua wɔ Gyɛzeɛle la anwo na meamaa Yizilayɛ belemgbunlililɛ ne ara awieleɛ.+
5 Zɔhane kenle ne, mebabubu Yizilayɛ ɛda ne anu wɔ Gyɛzeɛle Bɔnza ne anu.”
6 Ɔnrenzɛle bieko na ɔwole ralɛ raalɛ. Na Nyamenle zele ye kɛ: “To ye Lo-wuluheema,* ɔluakɛ menrɛze Yizilayɛma anwunvɔne bieko,+ na mebavoa bɛ bɔkɔɔ.+
7 Noko mebaze Dwuda abozoamra anwunvɔne+ yɛɛ medame Gyihova bɛ Nyamenle ne,+ mebalie bɛ; menrɛlua ɛda anzɛɛ konle dadeɛ anzɛɛ konle anzɛɛ mgbɔnwɔ anzɛɛ menli mɔɔ ka mgbɔnwɔ la anwo zo menrɛlie bɛ.”+
8 Mɔɔ ɔpɛle Lo-wuluheema nyɛfonlɛ la, ɔnrenzɛle na ɔwole ralɛ nrenyia.
9 Akee Nyamenle hanle kɛ: “To ye Lo-amae,* ɔluakɛ bɛnle me menli yɛɛ menrɛyɛ bɛ Nyamenle.
10 “Na Yizilayɛma* dodo ne bayɛ kɛ ɛnweazo ɛnwea mɔɔ bɛngola bɛnzuzu anzɛɛ bɛndia la.+ Na ɛleka mɔɔ bɛhanle bɛhilele bɛ kɛ, ‘Bɛnle me menli’+ la, bɛbaha bɛahile bɛ kɛ, ‘Bɛle tease Nyamenle ne amra.’+
11 Na bɛbaboɔboa Dwudama nee Yizilayɛma anloa bɛamaa bɛayɛ ko,+ na bɛbakpa kpanyinli ko bɛamaa yeali bɛ nyunlu na bɛavi azɛlɛ ne azo, ɔluakɛ ɔbayɛ kenle kpole yeamaa Gyɛzeɛle.+
Ɔbodwɛkɛ
^ Duma Hohyaya mɔɔ bɛpɛ ye sinli, ɔ bo kile “Gyaa Liele Ye; Gyaa Ɛlie Ngoane.”
^ Anzɛɛ “adwɔmanebɔlɛ; ahulomrenyia.”
^ Anzɛɛ “adwɔmanebɔlɛ; ahulomrenyia.”
^ Anzɛɛ “adwɔmanebɔlɛ; ahulomrenyia.”
^ Ɔ bo kile “Nyamenle Balua Ma.”
^ Ɔ bo kile “Bɛnze Ye Anwunvɔne.”
^ Ɔ bo kile “Bɛnle Me Menli.”
^ Hibulu aneɛ nu, “Yizilayɛ amra mrenyia.”