Hozia 11:1-12
11 “Mekɛ mɔɔ Yizilayɛ le kakula la, mengulole ye,+Na menvɛlɛle me ra nrenyia ne menvile Yigyibiti.+
2 Fane dɔɔnwo mɔɔ bɛlɛfɛlɛ* bɛ la,Ɛnee bɛlɛtwe bɛ nwo bɛahɔ moa kpalɛ.+
Bɛhɔle zo bɛbɔle afɔle bɛmaanle Beeyale ananze ne mɔ+Na bɛbɔle afɔle bɛmaanle ananze mɔɔ bɛze la.+
3 Noko medame a mengilele Yifelaem ɛdialɛ a,+ mendedɛle bɛ me sa zo;+Na bɛannwu kɛ medame a menyɛle bɛ ayile a.
4 Menvale alesama nyɛma* mendwenle bɛ, menvale ɛlɔlɛ nyɛma;+Menyɛle kɛ awie mɔɔ ɛlɛye gyɛnvayile avi bɛ awudwelɛ la memaanle bɛ,Na mendɔle alagye memaanle bɛ nuhua ko biala aleɛ.
5 Bɛnrɛzia bɛnrɛhɔ Yigyibiti azɛlɛ zo, noko Aselea bayɛ bɛ belemgbunli,+Ɔluakɛ, bɛkpole kɛ bɛbazia bɛara me ɛkɛ.+
6 Na konle dadeɛ babili atia ye azuamgbole ne mɔ,+Yeabubu ye nlenkɛ mgbole nzi mbulalɛ ne mɔ na yeazɛkye bɛ ɔlua bɛ adwenle ɛtane ne ati.+
7 Me menli ne ɛva ɛzie bɛ nye zo kɛ bɛnrɛli nɔhalɛ bɛnrɛmaa me.+
Ɔwɔ nuhua kɛ bɛvɛlɛle bɛ kɛ bɛrɛla anwuma anwumanli ne ɛkɛ, noko awie biala andwazo.
8 O Yifelaem, kɛzi mekola mekpo wɔ ɛ?+
O Yizilayɛ, kɛzi mekola meye wɔ memaa ɛ?
Kɛzi mekola me nee wɔ di kɛ Ademaa la ɛ?
Kɛzi mekola meyɛ wɔ kɛ Zebɔyem ɛ?+
Mehakyi me adwenle;Yɛɛ eza me kunlu yelɛyela me.*+
9 Menrɛla me ɛya wuluwulu ne ali.
Menrɛzɛkye Yifelaem bieko,+Ɔboalekɛ mele Nyamenle, menle sonla,Nwuanzanwuanza Ko ne mɔɔ wɔ bɛ avinli la;Na menrɛva ɛya kpole menrɛra bɛ nwo zo.
10 Bɛbali Gyihova anzi, na ɔbakpo kɛ awenade;+Saa ɔtea nu a, ɔ mra ne mɔ bava anwowosolɛ avi adɔleɛ nehane ara.+
11 Bɛ nwo bawoso bɛ kɛ aloma wɔ mekɛ mɔɔ bɛlɛfi Yigyibiti bɛara la,Ɔbayɛ kɛ abubule mɔɔ ɛvi Aselea azɛlɛ zo la;+Na mebava bɛ meahɔdɛnla bɛ azua ne mɔ anu,” kɛ Gyihova se la ɛne.+
12 “Yifelaem ɛva adalɛ ɛbɔ me ɛyia,Yɛɛ Yizilayɛ sua ne ɛva mɛlɛbɛla ɛbɔ me ɛyia.+
Noko Dwuda nee Nyamenle tɛdua,Na ɔdi nɔhalɛ ɔmaa Nwuanzanwuanza Ko ne.”+
Ɔbodwɛkɛ
^ Ɛhye kile, ngapezoma nee menli gyɛne mɔɔ bɛzoanle bɛ bɛmaanle bɛhilehilele Yizilayɛ la.
^ Anzɛɛ “Menvale atiakunlukɛnlɛma nyɛma,” kɛ awovolɛ nyɛma ɛdeɛ ne la.
^ Hibulu aneɛ nu, “me kunlu ɛlɔ.”