Hozia 5:1-15
-
Ndɛnebualɛ mɔɔ tia Yifelaem nee Dwuda (1-15)
5 “Bɛdie ɛhye, bɛmɛ ɛsɔfoma,+Bɛdie ye kpalɛ, O Yizilayɛma,Bɛdie, O belemgbunli sua nu amra,Ɔluakɛ ndɛnebualɛ ne fale bɛ nwo;Ɔboalekɛ bɛyɛ kɛ ɛhane bɛmaa MezepaYɛɛ bɛyɛ kɛ avonle mɔɔ bɛdɛlɛ nu bɛgua Teebɔ azo la.+
2 Bɛdabɛ mɔɔ bɛlɛtwe bɛ nwo bɛavi me nwo la* ka mogya gua kpalɛ,Na melɛbɔ bɛ muala kɔkɔ.*
3 Meze Yifelaem,Yɛɛ Yizilayɛ ɛnrɛhola ɛnrɛva ɔ nwo ɛnrɛvea me.
Noko kɛkala, O Yifelaem, wɔbɔ tuutuu ɛbɛla;*Yizilayɛ ɛgua ɔ nwo evinli.+
4 Bɛ nyɛleɛ ɛmmaa bɛngola bɛnzia bɛmba bɛ Nyamenle ne ɛkɛ,Ɔluakɛ tuutuu ɛbɔlɛ* sunsum wɔ bɛ nu;+Yɛɛ bɛmbu Gyihova bie.
5 Yizilayɛ anwomemaazo ne ɛli daselɛ ɛtia ye;*+Yizilayɛ nee Yifelaem amu nwiɔ ɛdɔ aze wɔ bɛ ɛtane ne mɔ anu,Na Dwuda nee bɛ ɛdɔ aze.+
6 Bɛvale bɛ mboane nee bɛ nlankɛ bɛhɔle kɛ bɛkakpondɛ Gyihova,Noko bɛannwu ye.
Yehwe ɔ nwo yevi bɛ nwo.+
7 Bɛanli nɔhalɛ bɛammaa Gyihova,+Ɔluakɛ bɛwo nyɛvolɛ mralɛ.
Na bɛbazɛkye bɛ nee bɛ agyapadeɛ* wɔ siane ko anu.
8 Bɛbɔ aweɛne+ wɔ Gebeya, bɛbɔ aweɛne tendenle ne wɔ Releema!+
Bɛva konle ɛnelɛ bɛdea nu wɔ Bɛte-eevɛn,+ O Bɛngyaman, yɛli bɛ nzi!
9 O Yifelaem, ɛ nwo bayɛ menli ɛzulolɛ wɔ kenle mɔɔ bɛbahwe ɛ nzo la.+
Memaa bɛde mɔɔ bazi Yizilayɛ mbusua ne mɔ anu la.
10 Dwuda mgbanyima le kɛ bɛdabɛ mɔɔ bɛtudu ɛweɛne bɛsie ɛleka fofolɛ la.+
Mebawola me ɛya kpole ne meagua bɛ nwo zo kɛ nzule.
11 Bɛsisi Yifelaem, ndɛnebualɛ ɛmaa yebubu,Ɔluakɛ ɔbɔle kpɔkɛ kɛ ɔdi ye agbɔvolɛ nzi.+
12 Yemɔti menyɛle kɛ kɛkɛba mɔɔ sɛkye debie la memaanle YifelaemNa menyɛle kɛ debie mɔɔ ɛkpɔlɔ la memaanle Dwudama.
13 Mekɛ mɔɔ Yifelaem nwunle ye anwodolɛ ne, na Dwuda nwunle ye nganlɛ mgbole ne la,Yifelaem hɔle Aselea+ na ɔzoanle menli wɔ belemgbunli kpole bie ɛkɛ.
Noko yeangola yeanyɛ ye ayile,Na ɔnrɛhola ɔnrɛyɛ ye nganlɛ mgbole ne ayile.
14 Ɔluakɛ mebayɛ kɛ awenade kakula meamaa Yifelaem,Na meayɛ kɛ awenade* mɔɔ anwo yɛ se la meamaa Dwudama.
Medame mumua ne mebatete bɛ nu nzokanzoka na meahɔ;+Mebazoa bɛ meahɔ, na awie biala ɛnrɛlie bɛ.+
15 Mebahɔ, na meazia meahɔ me bo zo ne kɔkpula kɛ bɛbanyia bɛ ɛtane ne anwo ahatualɛ,Na akee bɛbakpondɛ me nyunlu ɛlolɛ.+
Wɔ bɛ amaneɛnwunlɛ nu, bɛbakpondɛ me.”+
Ɔbodwɛkɛ
^ Anzɛɛ “Atuadelɛma ne.”
^ Anzɛɛ “mebadea bɛ muala.”
^ Anzɛɛ “adwɔmane ɛbɛla.”
^ Anzɛɛ “adwɔmanebɔlɛ; ahulomrenyia.”
^ Hibulu aneɛ nu, “ɛtia ɔ nyunlu.”
^ Anzɛɛ “azɛlɛ.”
^ Anzɛɛ “awenade kakula.”
