Hozia 9:1-17
9 “O Yizilayɛ, mmadi fɛlɛko,+Mmamaa ɛ nye die kɛ menli ne mɔ la.
Ɔluakɛ wɔlua tuutuu ɛbɔlɛ* zo wɔhwe ɛ nwo wɔvi wɔ Nyamenle ne anwo.+
Wɔhulo tuutuunli ahatualɛ wɔ ma ɛwosolɛ ɛleka biala.+
2 Noko ma ɛwosolɛ ɛleka ne nee nwanye ɛhwihwinlɛ kuma ne ɛnrɛmaa bɛ aleɛ,Yɛɛ ɔnrɛnyia nwanye fofolɛ.+
3 Bɛnrɛhɔ zo bɛnrɛdɛnla Gyihova azɛlɛ ne azo;+Emomu, Yifelaem bazia ahɔ Yigyibiti,Yɛɛ bɛbali debie mɔɔ nwolɛ ɛnde la wɔ Aselea.+
4 Bɛnrɛva nwanye bɛnrɛbɔ afɔle bieko bɛnrɛmaa Gyihova;+Ɔ nye ɛnrɛlie bɛ afɔlebɔlɛ ne mɔ anwo.+
Bɛle kɛ nyanelilɛ mekɛ nu paano;Menli mɔɔ di bie la kɔsɔɔti bagua bɛ nwo evinli.
Ɔluakɛ bɛ paano ne le bɛ ngome bɛ* ɛdeɛ;Bɛnrɛva bɛnrɛra Gyihova sua ne anu.
5 Duzu a bɛbayɛ ye wɔ ayia kenle ne,*Wɔ Gyihova ɛvoyialilɛ kenle ne a?
6 Nea! ɔlua ɛzɛkyelɛ ti, ɔwɔ kɛ bɛnriandi.+
Yigyibiti baboɔboa bɛ nloa,+ na Mɛmefese bazie bɛ.+
Ndile bava bɛ dwɛtɛ fufule ninyɛne mɔɔ sonle bolɛ la,Yɛɛ mbowule bafifi bɛ ɛdanlɛ azua ne mɔ anu.
7 Mekɛ mɔɔ bɛbava bɛabu mgbonda la bara,+Bɛ ndeanlɛ mekɛ bara,Na Yizilayɛ banwu ye.
Bɛ ngapezonli ne bayɛ koasea, yɛɛ sonla ne mɔɔ ka sunsum nu edwɛkɛ la bazɛ;Kɛmɔ wɔ ɛtane ne zonle la ati, ɛ nwo ɛkpɔlɛ zonle.”
8 Ɛnee Yifelaem sinzavolɛ ne+ wɔ me Nyamenle ne anwo ɛkɛ.+
Noko kɛkala ye ngapezoma ne mɔ+ ndenle kɔsɔɔti le kɛ nlomakyevolɛ ngane;Ɛkpɔlɛ wɔ ye Nyamenle ne sua nu.
9 Bɛ ti ɛmi ninyɛne mɔɔ bamaa bɛazɛkye bɛ la ɛyɛlɛ nu kɛ Gebeya mekɛ zo ɛdeɛ ne la.+
Ɔbahakye bɛ ɛtane ne na yeahwe bɛ nzo wɔ bɛ ɛtane ne mɔ anwo.+
10 “Menwunle Yizilayɛ kɛ fienemgbole nu vanye ma la.+
Menwunle wɔ nenyia mɔ kɛ feege baka mɔɔ bɔ zo mɔɔ ɛzo la azo ma.
Noko bɛhɔle Beeyale mɔɔ wɔ Piyɔ la;+Bɛdule bɛ nwo bɛmaanle anyiemgba deɛ ne,*+Na bɛyɛle kyibadeɛ kɛ deɛ ne mɔɔ bɛhulole la.
11 Yifelaem anyunlunyia ne tu kɔ kɛ aloma;Bɛnwo, bɛnnrenzɛ yɛɛ bɛnva ɛkolɛ.+
12 Saa bɛtete ngakula bɔbɔ a,Mebahu bɛ, ko bɔbɔ ɛnrɛha;+Ɛhɛe, saa metwe me nwo mefi bɛ nwo a, bɛ gyakɔ!+
13 Wɔ me afoa nu, ɛnee Yifelaem mɔɔ bɛlua ye wɔ azɛlɛ mɔɔ nane didi zolɛ azo la le kɛ Taya la;+Kɛkala ɔwɔ kɛ Yifelaem fa ɔ mra ne mɔ kɔ ɔmaa bɛku bɛ.”
14 O Gyihova, fa mɔɔ ɔwɔ kɛ ɛfa ɛmaa bɛ la maa bɛ;Ɛkolɛ mɔɔ kpɔne yɛɛ nyɛfonlɛ mɔɔ nzule ɛnle nu* la.
15 “Ɛnee bɛ amumuyɛyɛlɛ ne amuala wɔ Gelegale,+ ɔluakɛ ɛkɛ ne a memkpɔle bɛ a.
Mebavoa bɛ meavi me sua nu ɔlua bɛ ninyɛndane ti.+
Menrɛhulo bɛ bieko;+Bɛ mgbanyima kɔsɔɔti anzo yɛ se.
16 Bɛbabɔ Yifelaem bɛado ye aze.+
Bɛ ndinli bawe, na bɛnrɛzo ma biala.
Saa bɛwo bɔbɔ a, mebahu bɛ mra ne mɔ mɔɔ bɛkulo bɛ la.”
17 Me Nyamenle ne bakpo bɛ,Ɔluakɛ bɛandie ye,+Na akpɔsa badɔ bɛ nwo wɔ maanle maanle ne mɔ anu.+
Ɔbodwɛkɛ
^ Anzɛɛ “adwɔmanebɔlɛ; ahulomrenyia.”
^ Anzɛɛ “bɛ ngome bɛ ɛkɛla.”
^ Anzɛɛ “ɛkponledolɛ mekɛ ne.”
^ Anzɛɛ “anyiemgba nyamenle ne.”
^ Anzɛɛ “mɔɔ ɛbɔndɔbɔndɔ.”
