Luku Edwɛkpa 14:1-35
14 Mekɛ bie ɔhɔle kɛ ɔkali aleɛ wɔ Falasiima mgbanyima ne mɔ ko sua nu wɔ Ɛnwomenlelielɛ kenle, na ɛnee bɛlɛnea ye kpalɛ.
2 Na nea! ɛnee nrenyia bie mɔɔ ewule bie ɛmaa ɔ sa nee ɔ gyakɛ ɛwulowula la de ɔ nyunlu ɛkɛ.
3 Yemɔti Gyisɛse bizale bɛdabɛ mɔɔ bɛze Mɛla ne kpalɛ la nee Falasiima ne kɛ: “Asoo mɛla maa adenle kɛ bɛkɛyɛ ayile wɔ Ɛnwomenlelielɛ kenle anzɛɛ mɛla ɛmmaa adenle?”+
4 Noko bɛyɛle koonwu. Yemɔti ɔzɔle nrenyia ne, ɔyɛle ye ayile na ɔmaanle ɔhɔle.
5 Akee ɔzele bɛ kɛ: “Bɛ nuhua boni a saa ɔ ra nrenyia anzɛɛ ye ɛnlankɛ tɔ bula nu+ Ɛnwomenlelielɛ kenle a, ɔnrɛye ye ɛkɛ ne ala ɛ?”+
6 Na bɛangola bɛambua ye wɔ ɛhye noko anwo.
7 Mekɛ mɔɔ ɔnwunle kɛ menli mɔɔ bɛdo ɛsalɛ bɛvɛlɛ bɛ la ɛlɛkpondɛ ɛleka wɔ ɔ nyunlu lɔ adɛnla la, ɔmaanle bɛ ndonwo bie.+ Ɔzele bɛ kɛ:
8 “Saa awie to ɛsalɛ fɛlɛ wɔ wɔ atɔfolɛlielɛ bo a, mmakɔtɛnla ɔ nyunlu.+ Bie a ɛnee yevɛlɛ awie mɔɔ lɛ dibilɛ tɛla wɔ la noko.
9 Akee ahenle mɔɔ dole ɛsalɛ vɛlɛle bɛ mu nwiɔ la bara na yeaze wɔ kɛ, ‘Maa nrenyia ɛhye ɛdɛnla ɛ bo zo ne.’ Na ɛbava anyiemgba wɔahɔdɛnla ɔ nzi.
10 Noko saa bɛto ɛsalɛ bɛfɛlɛ wɔ a, kɔdɛnla ɔ nzi nehane amaa saa nrenyia ne mɔɔ dole ɛsalɛ vɛlɛle wɔ la ba a, yeaze wɔ kɛ, ‘Agɔnwolɛ, kɔdɛnla ɔ nyunlu lɔ.’ Na ɛbanyia anyunlunyia wɔ ɛ gɔnwo mɔ mɔɔ bɛdole ɛsalɛ bɛvɛlɛle bɛ la kɔsɔɔti anyunlu.+
11 Ɔluakɛ awie biala mɔɔ kɛmemaa ɔ nwo zo la, bɛkɛha ye aze, na awie biala mɔɔ kɛbɛlɛ ɔ nwo aze la, bɛkɛmaa ye zo.”+
12 Akee ɔhanle ɔhilele nrenyia ne mɔɔ dole ɛsalɛ vɛlɛle ye la noko kɛ: “Saa ɛto ɛkponle ewiazo anzɛɛ nɔsolɛ nu a, mmafɛlɛ ɛ gɔnwo mɔ anzɛɛ ɛ mediema anzɛɛ wɔ mbusuafoɔ anzɛɛ ɛ gɔnwo mɔ sukoavolɛma ala. Anrɛɛ bɛdabɛ noko bɛbado ɛsalɛ bɛavɛlɛ wɔ na bɛava bɛadua wɔ kakɛ.
13 Na saa ɛto ɛkponle a, fɛlɛ ehyiavolɛma, bɛdabɛ mɔɔ bɛ sa ɛdwe, abuburama, anyenzinliravolɛma;+
14 na ɛ nye balie ɔluakɛ bɛnlɛ debie mɔɔ bɛbava bɛadua wɔ kakɛ a. Na ɛbanyia wɔ ahatualɛ wɔ tenlenema ewudwazo ne anu.”+
15 Menli mɔɔ bɛdo ɛsalɛ bɛvɛlɛle bɛ la anu ko dele ɛhye la, ɔzele ye kɛ: “Anyelielɛ a le awie mɔɔ bali debie* wɔ Nyamenle Belemgbunlililɛ ne anu la.”
16 Gyisɛse zele ye kɛ: “Nrenyia bie dole ɛkponle kpole bie+ na ɔdole ɛsalɛ ɔvɛlɛle menli dɔɔnwo.
17 Aleɛlilɛ mekɛ ne dwule la, ɔzoanle ye akɛlɛ ne kɛ ɔhɔvɛlɛ bɛdabɛ mɔɔ bɛdole ɛsalɛ bɛvɛlɛle bɛ la kɛ, ‘Bɛrɛla, ɔluakɛ akee bɛwie debie biala.’
18 Noko bɛ muala bɛvale edwɛkɛ bɛyele bɛ nloa.+ Mɔɔ limoa la zele ye kɛ, ‘Medɔ azɛlɛ na ɔwɔ kɛ mekɔnea; mesɛlɛ wɔ ye me fi nu.’
19 Ko noko hanle kɛ, ‘Medɔ nlankɛ bulu na mekanlea kɛzi bɛde la; mesɛlɛ wɔ ye me fi nu.’+
20 Ko ɔdaye ɔhanle kɛ, ‘Mengyale raalɛ la ɛtɛkyɛle, ɛhye ati menrɛhola ba.’
21 Yemɔti akɛlɛ ne rahanle ɛhye mɔ amuala hilele ɔ menle ne. Na awuke menle ne vale ɛya na ɔzele ye akɛlɛ ne kɛ, ‘Kɔ suakpole ne gua ne nee awɔdenle ne mɔ azo na kɔva ehyiavolɛma, bɛdabɛ mɔɔ bɛ sa ɛdwe, anyenzinliravolɛma nee abuburama bɛla.’
22 Nzinlii, akɛlɛ ne hanle kɛ, ‘Yɛmenle, meyɛ mɔɔ wɔha la, noko ɛleka tɛbɔ ɛkɛ.’
23 Yemɔti awuke menle ne zele akɛlɛ ne kɛ, ‘Kɔ adenle ne anloa nee awɔdenle ne azo kɔva bɛ bɛla amaa me sua ne ayi.+
24 Na meka meahile bɛ kɛ, bɛdabɛ mɔɔ bɛdole ɛsalɛ bɛvɛlɛle bɛ la anu biala ɛnrɛli me aleɛ ne bie.’”+
25 Ɛnee menli dɔɔnwo nee ye lua, yemɔti ɔhakyile ɔ nwo ɔzele bɛ kɛ:
26 “Saa awie ba me ɛkɛ na ɔmkpɔ* ye papa nee ye mame nee ɔ ye nee ɔ mra nee ɔ mediema mrenyia nee ɔ mediema mraalɛ, ɛhɛe, nee ɔdaye mumua ne ye ngoane* a,+ ɔnrɛhola ɔnrɛyɛ me ɛdoavolɛ.+
27 Awie biala mɔɔ anzoa ye amaneɛnwunlɛ baka* ne na yeandoa me la ɛnrɛhola ɛnrɛyɛ me ɛdoavolɛ.+
28 Kɛ neazo la, bɛ nuhua boni a kpondɛ kɛ ɔsi tawa a ɔnlimoa ɔndɛnla aze ɔnsese ye bolɛ ɔnlea kɛ saa ɔlɛ dɔɔnwo mɔɔ ɔbava yeawie la a?
29 Saa yeanyɛ ye zɔ a ɔbawula ɔ bo noko ɔnrɛhola ɔnrɛwie na bɛdabɛ mɔɔ bɛbanwu ye la kɔsɔɔti babɔ ɔ bo agolo ɔ nwo
30 kɛ: ‘Nrenyia ɛhye bɔle ɔ bo kɛ ɔsi sua noko yeangola yeanwie.’
31 Anzɛɛ belemgbunli boni a saa ɔ nee belemgbunli fofolɛ ɛlɛkɔ ahɔho a ɔnrɛlimoa ɔnrɛdɛnla aze ɔ nee menli ɛnrɛzuzu nwo saa ɔbahola yeava sogyama 10,000 yeahɔyia ko ne mɔɔ nee sogyama 20,000 ɛlɛba la a?
32 Nɔhalɛ nu, saa ɔnrɛhola ɔnrɛyɛ zɔ a, mekɛ mɔɔ belemgbunli ko ne wɔ moamoa la, ɔbadu menli yeamaa bɛahɔha ye anzodwolɛ nu.
33 Zɔhane ala a ɔwɔ kɛ bɛdabɛ noko bɛnwu ye kɛ awie biala mɔɔ angyakyi ye ninyɛne kɔsɔɔti anzi ɛlilɛ la ɛnrɛhola ɛnrɛyɛ me ɛdoavolɛ a.+
34 “Nɔhalɛ nu, ngyenle le kpalɛ. Noko saa ngyenle menlemenle ne fi nu a, kɛ ɔkɛyɛ na bɛamaa yeayɛ menlemenle bieko ɛ?+
35 Ɔngola ɔmboa azɛlɛ anzɛɛ bɛfa bɛyɛ debie biala a ɔnyɛ boɛ. Bɛgua ye lɔ. Bɛmaa mɔɔ lɛ ɛnzolɛ kɛva kɛdie la ɛdie.”+
