Luku Edwɛkpa 19:1-48
19 Akee ɔhɔle Gyɛleko na ɛnee ɔlɛpɛ nu wɔ ɛkɛ.
2 Ɛnee nrenyia bie mɔɔ bɛfɛlɛ ye Zakeɛse la wɔ ɛkɛ; ɔle adwuledievolɛ kpanyinli mɔɔ ɛnyia ɔ nwo.
3 Ɛnee ɔlɛbɔ mɔdenle kɛ ɔkɛnwu Gyisɛse sonla holɛ, noko menli dɔɔnwo ne ati yeangola ɔluakɛ ɔle ezinra.
4 Yemɔti ɔnriandile ɔlimoale bɛ nyunlu na ɔhɔvole sekamɔ* baka bie amaa yeanwu ye, ɔluakɛ ɛnee ɛkɛ ne a ɔbava a.
5 Mɔɔ Gyisɛse dwule ɛkɛ ne la, ɔdole ɔ nye anwuma na ɔzele ye kɛ: “Zakeɛse, ka ɛ nwo dwu aze, ɔluakɛ ɛnɛ ɔwɔ kɛ metɛnla wɔ sua nu.”
6 Yemɔti ɔyɛle ye ndɛndɛ ɔdwule aze na ɔvale anyelielɛ ɔliele ye wɔ ye sua nu.
7 Mɔɔ bɛnwunle ɛhye la, bɛ muala bɛdendɛle bɛ nzo abo kɛ: “Nrenyia ɛhye mɔɔ le ɛtanevolɛ la a yehɔ ye sua nu la.”+
8 Noko Zakeɛse dwazole gyinlanle na ɔzele Awulae kɛ: “Nea! Awulae, mebava me ninyɛne ne anu foa ko meamaa ehyiavolɛma, na debie biala mɔɔ mesisi* awie melie la, mebava ye mɔnwo nna meamaa ye.”+
9 Na Gyisɛse zele ye kɛ: “Ɛnɛ ngoanelielɛ ɛra sua nu ɛke, ɔluakɛ ɔdaye noko ɔle Ebileham ara.
10 Ɔluakɛ sonla Ra ne rale kɛ ɔbakpondɛ na yealie mɔɔ ɛminli la.”+
11 Mekɛ mɔɔ bɛlɛtie edwɛkɛ ɛhye la, ɔmaanle bɛ ndonwo bieko ɔluakɛ ɛnee yebikye Gyɛlusalɛm na bɛsuzu kɛ Nyamenle Belemgbunlililɛ ne bala ali ɛkɛ ne ala.+
12 Yemɔti ɔhanle kɛ: “Dehelɛ bie dule adenle hɔle maanle bie mɔɔ wɔ moamoa la azo+ kɛ ɔkɔ yeamaa bɛazie ye belemgbunli na yeazia yeara.
13 Ɔvɛlɛle ye ngɛkɛlɛ bulu na ɔmaanle bɛ mena* bulu na ɔzele bɛ kɛ, ‘Bɛva bɛyɛ gyima kɔkpula kɛ mekɛra.’+
14 Noko ye maanle ne anu amra kpɔle ye na bɛzoanle menli bɛmaanle bɛhɔhanle bɛhilele ye kɛ, ‘Yɛngulo kɛ nrenyia ɛhye di belemgbunli wɔ yɛ nwo zo.’
15 “Mekɛ mɔɔ bɛziele ye belemgbunli na ɔziale ɔrale la, ɔvɛlɛle ngɛkɛlɛ ne mɔ mɔɔ ɔmaanle bɛ ezukoa* ne la, amaa bɛabu gyima mɔɔ bɛyɛle la anwo mgbonda.+
16 Ɔti mɔɔ limoa la rahanle kɛ, ‘Yɛmenle, menyia mena bulu meboka wɔ mena ne anwo.’+
17 Ɔzele ye kɛ, ‘Mo, akɛlɛ kpalɛ! Kɛmɔ wɔli nɔhalɛ wɔ debie ekyi nu la ati, nea azuamgbole bulu azo.’+
18 Mɔɔ tɔ zo nwiɔ la rahanle kɛ, ‘Yɛmenle, menyia mena nnu meboka wɔ mena ne anwo.’+
19 Ɔzele ɛhye noko kɛ, ‘Ɛdawɔ noko nea azuamgbole nnu azo.’
20 Na ko noko rahanle kɛ, ‘Yɛmenle, wɔ mena ne mɔɔ menvale ɛdanlɛ menkyekyele nwo menziele la ɛne.
21 Ɛze ɔ, ɛnee mesulo wɔ, ɔluakɛ wɔ edwɛkɛ yɛ se; ɛfa mɔɔ wɔanva wɔando ɛkɛ la, yɛɛ mɔɔ wɔanlua la yɛɛ ɛbu a.’+
22 Ɔzele ye kɛ, ‘Ɛ nloa anu edwɛkɛ a medua zo meabua wɔ ndɛne a, akɛlɛ amumuyɛ. Se ɛze kɛ me edwɛkɛ yɛ se, mefa mɔɔ meanva meando ɛkɛ la yɛɛ mɔɔ meanlua la a mebu a?+
23 Kɛmɔti a wɔanva me ezukoa* ne wɔando bange ɛ? Anrɛɛ meba a meahɔlie me debie nee nwolɛ nvasoɛ.’
24 “Yemɔti ɔzele menli mɔɔ gyigyi ɛkɛ ne la kɛ, ‘Bɛlie mena ne bɛvi ɔ sa nu na bɛva bɛmaa mɔɔ lɛ bulu ne la.’+
25 Noko bɛzele ye kɛ, ‘Yɛmenle, ɔlɛ mena bulu!’—
26 ‘Meka meahile bɛ kɛ, awie biala mɔɔ lɛ bie la, bɛbamaa ye dɔɔnwo bɛaboka nwo, noko mɔɔ ɛnlɛ bie la, mɔɔ ɔlɛ bɔbɔ la bɛbaza ye bɛalie.+
27 Eza bɛva me agbɔvolɛ ɛhye mɔ mɔɔ bɛngulo kɛ medi belemgbunli wɔ bɛ nwo zo la bɛrɛla na bɛrahu bɛ wɔ me nyunlu ɛke.’”
28 Mɔɔ ɔhanle ɛhye ɔwiele la, ɔdoale zo kɛ ɔkɔ Gyɛlusalɛm.
29 Mekɛ mɔɔ ɔbikyele Bɛtefagye nee Bɛtani wɔ boka ne mɔɔ bɛfɛlɛ ye Ɔlivi Boka la azo la,+ ɔzoanle ɛdoavolɛma ne anu nwiɔ+
30 kɛ: “Bɛhɔ namule ne mɔɔ bɛ nye dua ye la azo, na bɛdwu ɛkɛ ne a bɛbanwu asoaso ralɛ mɔɔ awie biala ɛtɛtɛnlanle zo ɛlɛ la kɛ bɛhenda ye wɔ ɛkɛ. Bɛzianyi ye na bɛva ye bɛrɛla.
31 Saa awie biza bɛ kɛ, ‘Duzu ati a bɛlɛsianyi ye a?’ bɛha kɛ, ‘Awulae hyia nwolɛ.’”
32 Yemɔti menli mɔɔ ɔzoanle bɛ la hɔle na bɛhɔnwunle ye kɛ mɔɔ Gyisɛse hanle hilele bɛ ala la.+
33 Na mekɛ mɔɔ bɛlɛsianyi asoaso ralɛ ne la, ɔ menle mɔ bizale bɛ kɛ: “Duzu ati a bɛlɛsianyi asoaso ralɛ ne a?”
34 Bɛhanle kɛ: “Awulae hyia nwolɛ.”
35 Na bɛvale ye bɛhɔmaanle Gyisɛse, bɛvale bɛ adɛladeɛ aguzo ne mɔ bɛguale asoaso ralɛ ne azo na bɛmaanle Gyisɛse dɛnlanle zolɛ.+
36 Mekɛ mɔɔ ɔlɛba la, bɛvale bɛ adɛladeɛ aguzo ne mɔ bɛsesɛle adenle ne anu.+
37 Mekɛ mɔɔ ɔbikyele adenle ne mɔɔ vi Ɔlivi Boka ne azo tolo anwo ala la, ɛdoavolɛma dɔɔnwo bɔle ɔ bo vale fɛlɛkolilɛ maanle bɛ ne zo yele Nyamenle ayɛlɛ ɔlua nwanwane gyima kɔsɔɔti mɔɔ bɛnwu ye la ati,
38 na bɛhanle kɛ: “Nyilalɛ ɛha mɔɔ ɛlɛba kɛ Belemgbunli wɔ Gyihova* duma nu la! Anzodwolɛ wɔ anwuma, yɛɛ anyunlunyia wɔ anwuma anwuma lɔ!”+
39 Noko Falasiima mɔɔ wɔ menli ne anu la bie mɔ zele ye kɛ: “Kilehilevolɛ, tea wɔ ɛdoavolɛma ne.”+
40 Na ɔbuale bɛ kɛ: “Meka meahile bɛ kɛ, saa ɛhye mɔ mua bɛ nloa bɔbɔ a, awolɛ badeɛdea nu.”
41 Mɔɔ ɔbikyele ɛkɛ ne la, ɔnleanle suakpole ne na ɔzunle,+
42 na ɔhanle kɛ: “Saa ɛnwunle ninyɛne mɔɔ bamaa wɔanyia anzodwolɛ a anrɛɛ ɔle kpalɛ, noko kɛkala bɛva ninyɛne ɛhye mɔ bɛvea wɔ.+
43 Ɔluakɛ mekɛ bara mɔɔ wɔ agbɔvolɛ bava mbaka mɔɔ bɛzinzi ɔ ti la abɛnga wɔ ayia na bɛamaa ɛ nwo ahyele wɔ wɔ ɛleka biala a.+
44 Bɛbazuhu ɛdawɔ nee ɛ mra bɛagua bɛ aze,+ na bɛnrɛgyakyi bolɛ wɔ bolɛ zo wɔ sua ɛhye azo,+ ɔluakɛ Nyamenle rabuale wɔ ndɛne noko wɔannwu ye.”
45 Akee ɔhɔle ɛzonlenlɛsua ne anu na ɔbɔle ɔ bo ɔvoanle bɛdabɛ mɔɔ bɛlɛtɔne ninyɛne la,+
46 na ɔzele bɛ kɛ: “Bɛhɛlɛ kɛ, ‘Bɛbavɛlɛ me sua ne asɔneyɛlɛ sua,’+ noko bɛmɛ bɛyɛ ye nwule feabelɛ.”+
47 Ɔhɔle zo ɔhilehilele alehyenlɛ biala wɔ ɛzonlenlɛsua ne anu. Noko ɛnee ɛsɔfo mgbanyinli nee mɛla kilehilevolɛma nee menli titili ne mɔ ɛlɛkpondɛ ye ahu ye;+
48 noko bɛannwu adenle biala mɔɔ bɛdua zo bɛayɛ ɛhye a, ɔluakɛ ɛnee menli ne amuala kɔ ɔ nwo ɛkɛ kɔtie ye.+
Ɔbodwɛkɛ
^ Anzɛɛ “feege baka.”
^ Anzɛɛ “mebɛlɛbɛla.”
^ Giliki aneɛ nu, “dwɛtɛ fufule.”
^ Giliki aneɛ nu, “me dwɛtɛ fufule.”
