Luku Edwɛkpa 8:1-56
-
Mraalɛ mɔɔ nee Gyisɛse luale (1-3)
-
Ɛyazonlɛnli ne anwo ndonwo ne (4-8)
-
Deɛmɔti Gyisɛse yɛle ndonwo la (9, 10)
-
Ɛyazonlɛnli ne anwo ndonwo ne ngilenu (11-15)
-
Bɛngeda kɛnlaneɛ zo (16-18)
-
Gyisɛse mame nee ɔ mediema mrenyia (19-21)
-
Gyisɛse maa ahumu bie gua dii (22-25)
-
Gyisɛse maa sunsum ɛtane ahɔwolo agbolike nu (26-39)
-
Gyeelɛse ara raalɛ ne; raalɛ bie vale ɔ sa hanle Gyisɛse tɛladeɛ aguzo ne (40-56)
8 Ɛhye anzi mekɛ ekyi bie anu, ɔdule adenle ɔhɔle azuamgbole nee namunamu zo ɔhɔbɔle Nyamenle Belemgbunlililɛ ne anwo edwɛkpa ne nolo.+ Na ɛnee Bulu Nee Nwiɔ ne boka ɔ nwo,
2 yɛɛ mraalɛ bie mɔ mɔɔ ɛnee yedu sunsum ɛtane wɔ bɛ nwo na yeyɛ bɛ ayile la: Mɛle mɔɔ bɛfɛlɛ ye Magedalene mɔɔ sunsum ɛtane nsuu vile ɔ nwo la;
3 Twuza mɔɔ nea Hɛlɔdo sua nu ɛkɛ ne la aye Dwowana;+ Susana; yɛɛ mraalɛ gyɛne dɔɔnwo mɔɔ vale bɛ ninyɛne boale* bɛ la.+
4 Mekɛ mɔɔ menli dɔɔnwo bie nee menli mɔɔ vi azua azua zo rale kɛ bɛbadie ye la yiale la, ɔvale ndonwo ɔdendɛle ɔhilele bɛ kɛ:+
5 “Ɛyazonlɛnli bie hɔle kɛ ɔkagua ye ma. Mɔɔ ɔlɛgua ma ne la, bie hɔguale adenle nloa na bɛtietiale zo, na anwomanyunlu nloma rasusole.+
6 Bie hɔguale bolɛ zo, na mɔɔ bɛfifile la bɛwule ɔluakɛ bɛannyia nzule.+
7 Bie hɔguale mbowule nu, na mbowule ne nee bɛ nyinle na ɔmianle bɛ.+
8 Bie noko hɔguale azɛlɛ kpalɛ zo, na mɔɔ bɛfifile la, bɛzole ma mɔnwo 100.”+ Mɔɔ ɔhanle ɛhye la, ɔmaanle ɔ ne zo ɔhanle kɛ: “Bɛmaa mɔɔ lɛ ɛnzolɛ kɛva kɛdie la ɛdie.”+
9 Noko ye ɛdoavolɛma ne bizale ye mɔɔ ndonwo ɛhye kile la.+
10 Ɔhanle kɛ: “Bɛmɛ bɛmaa bɛ adenle kɛ bɛde Nyamenle Belemgbunlililɛ ne anwo fealeranu edwɛkɛ nwuanzanwuanza ne abo, na bɛdabɛ mɔɔ bɛha la ɛdeɛ, bɛte ye wɔ ndonwo nu+ amaa bɛnea, bɛnea a, bɛannwu ye, bɛtie, bɛtie a, bɛande ɔ bo.+
11 Mɔɔ ndonwo ne kile la ɛne: Ma ne a le Nyamenle edwɛkɛ ne.+
12 Mɔɔ guale adenle ne anloa la a le bɛdabɛ mɔɔ bɛte edwɛkɛ ne na Abɔnsam baye edwɛkɛ ne fi bɛ ahonle nu yemɔti bɛnlie bɛnli na bɛanyia ngoane la.+
13 Mɔɔ guale bolɛ zo la a le bɛdabɛ mɔɔ bɛte edwɛkɛ ne a bɛfa anyelielɛ bɛdie bɛto nu la, noko ɛhye mɔ ɛnlɛ ndinli. Bɛnyia diedi mekɛ ekyi, noko saa sɔnea ba a bɛkpo bɛ diedi ne.+
14 Mɔɔ guale mbowule nu la a le bɛdabɛ mɔɔ bɛte edwɛkɛ ne noko mekɛ ɛhye anu adwenleadwenle, anwonyia+ nee anyelielɛ ngakyile twehwe bɛ adwenle+ na ɔmia edwɛkɛ ne bɔkɔɔ, na bɛ ma ɛndi la.+
15 Mɔɔ guale azɛlɛ kpalɛ zo la a le bɛdabɛ mɔɔ bɛfa ahonle kpalɛ bɛtie edwɛkɛ ne+ na bɛdie bɛdi na bɛgyinla kpundii bɛso ma la.+
16 “Awie biala ɛnle ɛkɛ mɔɔ ɔsɔ kɛnlaneɛ a ɔfa debie ɔkeda zo anzɛɛ ɔfa ɔsie ɛkpa bo a, emomu ɔfa ɔsie kɛnlaneɛbaka zo amaa bɛdabɛ mɔɔ bɛbara ɛkɛ ne la anwu wienyi ne.+
17 Ɔluakɛ debie biala ɛnle ɛkɛ mɔɔ vea mɔɔ ɛnrɛla ali a, anzɛɛ debie biala ɛnle ɛkɛ mɔɔ bɛheda zo mɔɔ bɛnrɛnwu ye anzɛɛ ɔnrɛla ali wienyi a.+
18 Yemɔti bɛnlea kɛzi bɛtie edwɛkɛ la boɛ, ɔluakɛ mɔɔ lɛ bie la, bɛbamaa ye bie dɔɔnwo bɛaboka nwo,+ na mɔɔ ɛnlɛ bie la, mɔɔ ɔsuzu kɛ ɔlɛ bɔbɔ la, bɛbalie bɛavi ɔ sa nu.”+
19 Akee ye mame nee ɔ mediema mrenyia ne mɔ+ rale ɛkɛ, noko menli dɔɔnwo ne ati bɛangola bɛambikye ye.+
20 Ɔti bɛhɔbɔle ye amaneɛ kɛ: “Wɔ mame nee ɛ mediema mrenyia ne mɔ gyi alienwo lɔ, bɛkulo kɛ bɛnwu wɔ.”
21 Ɔbuale bɛ kɛ: “Me mame nee me mediema mrenyia a le bɛdabɛ mɔɔ bɛtie Nyamenle edwɛkɛ ne na bɛdi zo la.”+
22 Kenle ko bie ɔ nee ye ɛdoavolɛma ne hɔvole ɛlɛne nu na ɔzele bɛ kɛ: “Bɛmaa yɛpɛ yɛhɔ azule ne anzi lɔ.” Yemɔti bɛhɔle.+
23 Noko mekɛ mɔɔ bɛlɛkɔ la, ɔlafele. Na ahumu kpole bie dule azule ne anye, nzule bɔle ɔ bo hɔle bɛ ɛlɛne ne anu mɔɔ anrɛɛ ɔnoma a.+
24 Yemɔti bɛhɔdunwuele ye na bɛhanle kɛ: “Kilehilevolɛ, Kilehilevolɛ, asɛɛ yɛwu!” Akee ɔdwazole na ɔdeanle anwoma ne nee azule ne mɔɔ ɛlɛtu la, na bɛ nloa hanle aze na bɛguale dii.+
25 Akee ɔbizale bɛ kɛ: “Bɛ diedi ne wɔ nienwu?” Noko ɛzulolɛ hanle bɛ na ɔzinle bɛ nwo, bɛhanle bɛhilele bɛ nwo ngoko kɛ: “Duzu sonla a le ɛhye? Ɔtendɛ ɔkile anwoma nee azule bɔbɔ a bɛtie ye.”+
26 Na bɛhɔdwule aze wɔ Gɛlasa maanzinli ne ɛnwea nloa,+ ɔ nee Galeli anye bɔ zo.
27 Mɔɔ Gyisɛse dwule aze la, nrenyia bie mɔɔ sunsum ɛtane wɔ ɔ nwo mɔɔ vi suakpole ne azo la rayiale ye. Mekɛ dɔɔnwo mɔɔ ɛze la, ɔnwula tɛladeɛ, ɔndɛnla sua nu emomu nla* ne azo ala.+
28 Mɔɔ ɔnwunle Gyisɛse la, ɔdeanle nu na ɔradule ɔdɔle ɔ nyunlu ɛkɛ na ɔvale ɛnelɛ kpole ɔhanle kɛ: “Duzu a ɛkpondɛ wɔavi me ɛkɛ a, Gyisɛse, Anwuma Anwuma Nyamenle ne Ara? Mesɛlɛ wɔ, mmakile me nyane.”+
29 (Ɛnee Gyisɛse ɛze sunsum ɛtane ne kɛ ɔvi nrenyia ne nu. Ɔluakɛ ɛnee yegyegye ye fane dɔɔnwo,*+ bɛvale mbulalɛ nee kyeenyi bɛkyekyele ye fane dɔɔnwo na bɛmaanle awie zinzale ye, noko ɔbubule mbulalɛ ne na ɔtetele kyeenyi ne na ɛnee sunsum ɛtane ne fa ye kɔ ɛleka koonwu bie mɔ.)
30 Gyisɛse bizale ye kɛ: “Kɛ bɛfɛlɛ wɔ ɛ?” Ɔbuale kɛ: “Ɛlɔne,” ɔluakɛ ɛnee sunsum ɛtane dɔɔnwo wɔ ɔ nwo.
31 Yemɔti bɛhɔle zo bɛzɛlɛle ye kɛ ɔmmamaa bɛkɔ kuma kuloonwu ne anu.+
32 Ɛnee agbolike dɔɔnwo+ bie ɛlɛdidi boka ne azo wɔ ɛkɛ, yemɔti bɛzɛlɛle ye kɛ ɔmaa bɛ adenle ɔmaa bɛhɔwolo agbolike ne mɔ anu, na ɔmaanle bɛ adenle.+
33 Yemɔti sunsum ɛtane ne mɔ vile nrenyia ne anwo na bɛhɔwolole agbolike ne mɔ anu, na bɛvi boka ne azo bɛdule twi bɛhɔguale azule ne anu bɛnlomanle.
34 Mɔɔ menli mɔɔ nea agbolike ne mɔ la nwunle mɔɔ ɛzi la, bɛnriandile bɛhɔhanle ye wɔ suakpole ne nee namunamu ne mɔ azo.
35 Akee menli hɔle kɛ bɛkanlea mɔɔ ɛzi la. Yemɔti bɛrale Gyisɛse anwo ɛkɛ na bɛnwunle nrenyia ne mɔɔ sunsum ɛtane ne ɛvi ɔ nwo la kɛ ɔwula tɛladeɛ na ɔ nye zo ɛtete ye, ɔde Gyisɛse anwo ɛkɛ, na ɔyɛle bɛ ɛzulolɛ.
36 Menli mɔɔ nwunle ye la hanle kɛzi nrenyia ne mɔɔ ɛnee sunsum ɛtane wɔ ɔ nwo la dele kpɔkɛ la hilele bɛ.
37 Akee menli dɔɔnwo mɔɔ wɔ maanzinli ne mɔɔ bikye Gɛlasa anu la zele Gyisɛse kɛ ɔvi ɛkɛ ne ɔhɔ, ɔluakɛ ɛnee ɛzulolɛ kpole ɛha bɛ. Ɔti ɔhɔvole ɛlɛne ne anu kɛ ɔkɔ.
38 Noko nrenyia ne mɔɔ sunsum ɛtane ne mɔ vile ɔ nwo la kpale ye kyɛlɛ kɛ ɔ nee ye kɔ, na yeammaa ye adenle, emomu ɔhanle kɛ:+
39 “Sia kɔ sua nu na kɔha mɔɔ Nyamenle ɛyɛ ɛmaa wɔ la kile awie biala.” Yemɔti ɔhɔle na ɔhɔbɔle mɔɔ Gyisɛse ɛyɛ ɛmaa ye la nolo wɔ suakpole ne azo amuala.
40 Mekɛ mɔɔ Gyisɛse ziale rale la, menli dɔɔnwo ne liele ye kɛnlɛma ɔluakɛ ɛnee bɛ nye la ye ade.+
41 Noko nea! nrenyia bie mɔɔ bɛfɛlɛ ye Gyeelɛse la rale; nrenyia ɛhye le nyianusua ne anu kpanyinli. Na ɔdule ɔdɔle Gyisɛse agyakɛ anu na ɔbɔle ɔ bo ɔzɛlɛle kɛ ɔmaa bɛhɔ ye sua nu,+
42 ɔluakɛ ɛnee ɔ ra raalɛ kokye mɔɔ ɛli ɛvolɛ kɛyɛ 12 la kpondɛ awu.
Mɔɔ Gyisɛse ɛlɛkɔ la, menli dɔɔnwo hyelele ɔ nwo zo.
43 Ɛnee raalɛ bie mɔɔ ɛdudu mogya+ too ɛvolɛ 12 na awie biala ɛtɛkolale ye ayile yɛ la wɔ ɛkɛ.+
44 Ɔralile ɔ nzi na ɔvale ɔ sa ɔhanle ye tɛladeɛ aguzo ne anloa,+ na ɛkɛ ne ala mogya ne mɔɔ ɛlɛtu ye la pɛle.
45 Yemɔti Gyisɛse hanle kɛ: “Nwane a vale ɔ sa hanle me a?” Mɔɔ awie biala hanle kɛ tɛ ɔdaye la, Pita hanle kɛ: “Kilehilevolɛ, ɛgyi menli avinli yɛɛ bɛhyele ɛ nwo zo.”+
46 Na Gyisɛse hanle kɛ: “Awie ɛva ɔ sa ɛha me, ɔluakɛ menwu kɛ tumi+ ɛvi me nu.”
47 Mɔɔ raalɛ ne nwunle kɛ yenwu ye la, ɔvale anwowosolɛ ɔrahotole ɔ nyunlu ɛkɛ na ɔhanle deɛmɔti ɔvale ɔ sa ɔhanle ye nee kɛzi ɔdele kpɔkɛ ɛkɛ ne ala la wɔ menli ne amuala anyunlu.
48 Noko ɔzele ye kɛ: “Me ra raalɛ, wɔ diedi ɛmaa wɔde kpɔkɛ. Kɔ anzodwolɛ nu.”+
49 Mekɛ mɔɔ ɔ nloa wɔ zo ɔlɛtendɛ la, awie vi nyianusua ne anu kpanyinli ne sua nu rahanle kɛ: “Ɛ ra raalɛ ne ɛwu; mmagyegye Kilehilevolɛ ne bieko.”+
50 Mɔɔ Gyisɛse dele ɛhye la, ɔzele ye kɛ: “Mmasulo, wɔmɔ nyia diedi ala na ɔbanyia ngoane.”+
51 Mɔɔ ɔdwule sua nu ɛkɛ ne la, yeammaa awie biala andoa ye kɛ Pita, Dwɔn, Gyemise, yɛɛ kakula raalɛ ne papa nee ye mame ala.
52 Noko ɛnee menli ne ɛlɛsu ali ɔ nwo nyane kpalɛ. Yemɔti ɔhanle kɛ: “Bɛmmasu,+ ɔluakɛ ɔtɛwule, yelafe ala.”+
53 Yemɔti bɛbɔle ɔ bo bɛzelele ye, ɔluakɛ ɛnee bɛze kɛ yewu.
54 Noko ɔzɔle ɔ sa na ɔzele ye kɛ: “Kakula, dwazo!”+
55 Yemɔti ɔrale ngoane nu,*+ na ɔdwazole ɛkɛ ne ala,+ na ɔzele bɛ kɛ bɛmaa ye debie bɛmaa ɔli.
56 Na ye awovolɛ anye liele kpalɛ, noko ɔzele bɛ kɛ bɛmmaka mɔɔ ɛzi la bɛkile awie biala.+
Ɔbodwɛkɛ
^ Giliki aneɛ nu, “zonlenle.”
^ Anzɛɛ “ngakyelɛ nla.”
^ Anzɛɛ ɔkola ɔkile, “yegyegye ye mekɛ tendenle.”
^ Anzɛɛ “ɔziale ɔnyianle ngoane tumi.”
