Maake Edwɛkpa 2:1-28
2 Noko, mekɛ bie anzi, ɔhɔle Kapɛnayɛm bieko, na bɛdele kɛ ɔwɔ sua nu.+
2 Yemɔti menli dɔɔnwo rayiale ɛkɛ ne mɔɔ ɛnee bɛnnyia adenle bɔbɔ wɔ anlenkɛ ne anloa a, na ɔbɔle ɔ bo ɔhanle edwɛkɛ ne ɔhilele bɛ.+
3 Na bɛvale nrenyia bie mɔɔ ɛbubu mɔɔ menli nna a zoale ye la bɛrɛlɛle ye.+
4 Noko menli dɔɔnwo ne ati bɛangola bɛanva ye bɛangɔ Gyisɛse anwo ɛkɛ, zɔhane ati bɛhɔpɛle tokule wɔ sua ne ati zo, ɛleka mɔɔ Gyisɛse de la, na bɛdole nrenyia ne ɛkpa zo bɛdwulale ye wɔ ɔ nwo ɛkɛ.
5 Mɔɔ Gyisɛse nwunle bɛ diedi+ ne la, ɔzele nrenyia ne mɔɔ ɛbubu la kɛ: “Me ra, bɛva wɔ ɛtane bɛhyɛ wɔ.”+
6 Ɛnee mɛla kilehilevolɛma bie mɔ dede ɛkɛ ne na bɛlɛka ye wɔ bɛ ahonle nu kɛ:+
7 “Duzu ati a nrenyia ɛhye ɛlɛtendɛ zɛhae ɛ? Ɔlɛka munzule edwɛkɛ. Nwane a kola fa ɛtane kyɛ a, asoo tɛ Nyamenle ala?”+
8 Noko ndɛndɛ ne ala, Gyisɛse nwunle bɛ adwenle yemɔti ɔzele bɛ kɛ: “Duzu ati a bɛlɛsuzu ninyɛne ɛhye mɔ anwo wɔ bɛ ahonle nu a?+
9 Boni a ɛnyɛ se a, kɛ ɛka wɔahile awie mɔɔ ɛbubu la kɛ, ‘Bɛva wɔ ɛtane bɛhyɛ wɔ,’ anzɛɛ ɛka kɛ, ‘Dwazo fa wɔ ɛkpa ne na tia’?
10 Noko amaa bɛanwu kɛ sonla Ra ne+ lɛ tumi kɛ ɔfa ɛtane ɔkyɛ wɔ azɛlɛ ye azo la ati—”+ ɔzele nrenyia ne mɔɔ ɛbubu la kɛ:
11 “Meka meahile wɔ kɛ, Dwazo, fa wɔ ɛkpa ne na kɔ sua nu.”
12 Na ɔdwazole ndɛndɛ ne ala ɔvale ye ɛkpa ne na ɔluale bɛ kɔsɔɔti bɛ nyunlu ɛkɛ ne ɔhɔle. Yemɔti ɔzinle bɛ muala bɛ nwo na bɛwulale Nyamenle anyunlunyia bɛhanle kɛ: “Yɛtɛnwunle debie zɛhae bie ɛlɛ.”+
13 Ɔhɔle nyevile ne anloa bieko, na menli dɔɔnwo ne rale ɔ nwo ɛkɛ ne na ɔbɔle ɔ bo ɔhilehilele bɛ.
14 Na mɔɔ ɔlɛpɛ nu la, ɔnwunle Afeɛse ara Livae kɛ ɔde ɛleka mɔɔ bɛtua adwule la, na ɔzele ye kɛ: “Badoa me.” Ɔti ɔdwazole na ɔdoale ye.+
15 Nzinlii mɔɔ Gyisɛse ɛlɛdi debie* wɔ Livae sua nu ɛkɛ la, adwuledievolɛma nee ɛtanevolɛma dɔɔnwo nee Gyisɛse nee ye ɛdoavolɛma ne lile debie,* ɔluakɛ bɛ nwo zonle a bɛdoale ye a.+
16 Na mɔɔ mɛla kilehilevolɛma mɔɔ bɛle Falasiima la nwunle kɛ ɔ nee ɛtanevolɛma nee adwuledievolɛma ɛlɛdi debie la, bɛbizale ye ɛdoavolɛma ne kɛ: “Duzu ati a ɔ nee ɛtanevolɛma nee adwuledievolɛma di aleɛ ɛ?”
17 Mɔɔ Gyisɛse dele ɛhye la, ɔhanle kɛ: “Bɛdabɛ mɔɔ bɛte kpɔkɛ la ɛngyia ayileyɛvolɛ nwo, emomu bɛdabɛ mɔɔ bɛnde kpɔkɛ la a hyia bie a. Membale kɛ mebavɛlɛ ɛtanevolɛma na tɛ tenlenema ɔ.”+
18 Ɛnee Dwɔn ɛdoavolɛma nee Falasiima kye ɛhɔne. Yemɔti bɛrahanle bɛhilele ye kɛ: “Duzu ati a Dwɔn ɛdoavolɛma nee Falasiima ɛdoavolɛma ne mɔ kye ɛhɔne noko wɔ ɛdoavolɛma ne ɛngye ɛhɔne ɛ?”+
19 Yemɔti Gyisɛse zele bɛ kɛ: “Mekɛ mɔɔ atɔfolɛ nrenyia ne+ wɔ ɔ gɔnwo mɔ anwo ɛkɛ la ɔngyia kɛ atɔfolɛ nrenyia ne agɔnwo mɔ kɛhye ɛhɔne, ɔnle zɔ ɔ? Mekɛ ala mɔɔ atɔfolɛ nrenyia ne wɔ bɛ nwo ɛkɛ la, bɛnrɛhola bɛnrɛhye ɛhɔne.
20 Noko mekɛ bara mɔɔ bɛbaye atɔfolɛ nrenyia ne bɛavi bɛ nwo ɛkɛ a,+ na akee bɛbahye ɛhɔne wɔ mekɛ zɔhane.
21 Awie biala ɛnva ɛdanlɛ fofolɛ ɛnda ɛdanlɛ dɛba nu. Saa ɔyɛ ye zɔ a, ɛdanlɛ fofolɛ ne bamaa dɛba ne ade na tokule ne ayɛ kpole.+
22 Bieko, awie ɛnva nwanye fofolɛ ɛngua nwanye nwoma kodoku dɛba nu. Saa ɔyɛ ye zɔ a, nwanye ne bakpuke nwoma kodoku ne, na nwanye ne nee nwoma kodoku ne azɛkye. Emomu, bɛfa nwanye fofolɛ bɛgua nwanye nwoma kodoku fofolɛ nu.”
23 Mɔɔ ɔlua hwiiti ɛya bie anu wɔ Ɛnwomenlelielɛ kenle ne la, ye ɛdoavolɛma ne bɔle ɔ bo tetele hwiiti ne bie wɔ mekɛ mɔɔ bɛlɛkɔ la.+
24 Yemɔti Falasiima ne zele ye kɛ: “Nea! Duzu ati a bɛlɛyɛ debie mɔɔ mɛla ɛmmaa adenle kɛ bɛyɛ ye Ɛnwomenlelielɛ kenle la ɛ?”
25 Noko ɔzele bɛ kɛ: “Asoo bɛtɛkengale mɔɔ Devidi yɛle wɔ mekɛ mɔɔ ɛnee ɔnlɛ aleɛ biala na ɛhɔne ɛlɛku ye nee menli mɔɔ ɔ nee bɛ lua la ɛlɛ ɔ?+
26 Kɛ mɔɔ ɔwɔ ɛsɔfo kpanyinli Abayata+ anwo edwɛkɛ ne anu la, kɛzi Devidi hɔle Nyamenle sua ne anu na ɔlile paano ne mɔɔ bɛfa bɛkile mɔɔ mɛla ɛmmaa adenle kɛ awie di bie kyesɛ ɛsɔfo ne mɔ ala,+ na eza ɔvale bie ɔmaanle menli mɔɔ ɔ nee bɛ lua noko la ɔ?”
27 Akee ɔzele bɛ kɛ: “Sonla ti a Ɛnwomenlelielɛ kenle ne rale a,+ na tɛ Ɛnwomenlelielɛ kenle ne ati a sonla rale a.
28 Ɔti sonla Ra ne le Ɛnwomenlelielɛ kenle ne noko Amenle.”+
