Maake Edwɛkpa 8:1-38
8 Mekɛ ne anu, menli dɔɔnwo bieko rayiale na ɛnee bɛnlɛ debie mɔɔ bɛdi a. Yemɔti ɔvɛlɛle ɛdoavolɛma ne na ɔzele bɛ kɛ:
2 “Menli ye anwo yɛ me alɔbɔlɛ,+ ɔluakɛ bɛdɛnla me nwo ɛke kenle nsa yɛɛ bɛnlɛ debie biala mɔɔ bɛbali a.+
3 Saa memaa bɛfa ɛhɔne bɛkɔ bɛ azua nu a, bɛ nye zo kɛbulu bɛ wɔ adenle nu, yɛɛ bie mɔ vi moa.”
4 Noko ye ɛdoavolɛma ne buale ye kɛ: “Ɛnee nienwu, wɔ ɛleka koonwu ɛhye, yɛɛ awie kɛnyia paano mɔɔ kɛza menli ɛhye mɔ di a?”
5 Ɛhye ati ɔbizale bɛ kɛ: “Paano nyɛ a bɛlɛ a?” Bɛhanle kɛ: “Nsuu.”+
6 Na ɔmaanle menli dɔɔnwo ne dɛnlanle aze. Akee ɔvale paano nsuu ne, ɔlale ase,* ɔbubule nu, na ɔbɔle ɔ bo ɔvale ɔmaanle ye ɛdoavolɛma ne kɛ bɛhyɛ, na bɛhyɛle bɛmaanle menli dɔɔnwo ne.+
7 Ɛnee eza bɛlɛ fɛlɛ ekyi bie wɔ ɛkɛ, na mɔɔ ɔyilale zo la, ɔzele bɛ kɛ bɛhyɛ ɔdaye noko.
8 Yemɔti bɛlile na bɛ ko yile, na bɛsesale ɔ bo zo mɔɔ hale la ahɛndɛne mgbole nsuu tetɛkɛɛ.+
9 Ɛnee mrenyia kɛyɛ 4,000 a wɔ ɛkɛ a. Akee ɔmaanle bɛhɔle.
10 Na ndɛndɛ ne ala ɔ nee ye ɛdoavolɛma ne vole ɛlɛne nu hɔle Dalemanuta maanzinli nu.+
11 Falasiima ne rale ɛkɛ na bɛbɔle ɔ bo bɛ nee ye zule kpolera, bɛzɔle ye bɛnleanle kɛ ɔyɛ sɛkɛlɛneɛ bie mɔɔ vi anwuma la.+
12 Yemɔti ɔlile nyane kpole wɔ ye ahonle nu na ɔhanle kɛ: “Duzu ati a awolɛndoazo ɛhye kpondɛ sɛkɛlɛneɛ ɛ?+ Nɔhalɛ nu meka meahile bɛ kɛ, bɛnrɛmaa awolɛndoazo ɛhye sɛkɛlɛneɛ biala.”+
13 Na ɔgyakyile bɛ ɛkɛ ne, ɔziale ɔhɔvole ɛlɛne ɔpɛle ɔhɔle azule ne anzi lɔ.
14 Noko, bɛ rɛle vile kɛ bɛkɛva paano, na ɛnee bɛnlɛ debie biala wɔ bɛ nwo wɔ ɛlɛne ne anu kɛ paano ko ala.+
15 Na ɔbɔle bɛ kɔkɔ kɛ: “Bɛmaa bɛ nye ɛla ɛkɛ; na bɛnlea boɛ wɔ Falasiima mgbɔvonle ne nee Hɛlɔdo mgbɔvonle ne anwo.”+
16 Yemɔti bɛbɔle ɔ bo bɛ nee bɛ nwo zule kpolera wɔ paano mɔɔ bɛanva la anwo.
17 Ɔnwunle ɛhye la, ɔzele bɛ kɛ: “Duzu ati a bɛlɛsu kpolera wɔ paano mɔɔ bɛanva la anwo ɛ? Bɛtɛnwunle mɔɔ ɔkile yɛɛ bɛtɛtele ɔ bo ɔ? Bɛdwenle nwo a bɛnde ɔ bo ɔ?
18 ‘Bɛlɛ ɛnyelɛ, noko bɛnnwu debie ɔ; bɛlɛ ɛnzolɛ, noko bɛnde edwɛkɛ ɔ?’ Bɛngakye
19 mekɛ mɔɔ membubule paano nnu+ ne anu memaanle mrenyia 5,000 ne la, ɔ bo zo ahɛndɛne tetɛkɛɛ nyɛ a bɛsesale a?” Bɛzele ye kɛ: “Bulu nee nwiɔ.”+
20 “Mekɛ mɔɔ membubule paano nsuu ne anu memaanle mrenyia 4,000 ne la, ɔ bo zo ahɛndɛne mgbole tetɛkɛɛ nyɛ a bɛnyianle a?” Na bɛzele ye kɛ: “Nsuu.”+
21 Na ɔzele bɛ kɛ: “Bɛtɛtele ɔ bo ɔ?”
22 Akee bɛhɔle Bɛteseeyeda. Ɛkɛ ne bɛvale nrenyia bie mɔɔ anye ɛzi la bɛrɛlɛle ye, na bɛbodole ye kɛ ɔva ɔ sa ɔha ye.+
23 Ɔzɔle nrenyia anyenzinliravolɛ ne asa ɔvale ye ɔhɔle namule ne kandiba. Ɔdole nyɛlɛ wɔ ɔ nye zo,+ ɔvale ɔ sa ɔguale ɔ nwo zo na ɔbizale ye kɛ: “Ɛnwu debie ɔ?”
24 Nrenyia ne maanle ɔ nye zo na ɔhanle kɛ: “Menwu menli, noko bɛle kɛ mbaka mɔɔ ɛlɛtiedia la.”
25 Ɔvale ɔ sa ɔhanle nrenyia ne anye bieko, na nrenyia ne nwunle debie kpalɛ. Ɔ nye ne yɛle boɛ, na ɛnee ɔkola ɔnwu debie biala wienyi.
26 Yemɔti ɔmaanle ɔhɔle sua nu, na ɔhanle kɛ: “Mmasia ɛkɔ namule ne azo.”
27 Akee Gyisɛse nee ye ɛdoavolɛma ne vile ɛkɛ ne hɔle Sizalia Felepae namunamu ne mɔ azo, na mɔɔ bɛlɛkɔ la ɔbizale ye ɛdoavolɛma ne kɛ: “Menli se mele nwane?”+
28 Bɛhanle bɛhilele ye kɛ: “Dwɔn Sɔnevolɛ ne,+ noko bie mɔ se Yilaegya,+ yɛɛ bie mɔ noko se, ngapezoma ne anu ko.”
29 Na ɔbizale bɛ kɛ: “Na bɛdabɛ noko ɛ, bɛse mele nwane?” Pita buale ye kɛ: “Wɔmɔ a ɛle Kelaese ne a.”+
30 Na ɔbɔle bɛ nloa ɛsesebɛ kɛ bɛmmaka ɔ nwo edwɛkɛ bɛkile awie biala.+
31 Eza ɔbɔle ɔ bo ɔhilehilele bɛ kɛ ɔwɔ kɛ sonla Ra ne nwu amaneɛ dɔɔnwo na mgbanyima nee ɛsɔfo mgbanyinli yɛɛ mɛla kilehilevolɛma ne mɔ kpo ye na bɛku ye,+ na ye kenle nsa ne azo yeadwazo.+
32 Nɔhalɛ nu, ɔhanle edwɛkɛ ɛhye wɔ bɛ nyunlu ɛkɛ. Noko Pita vale ye hɔle ahane na ɔbɔle ɔ bo kɛ ɔtwi ɔ nyunlu.+
33 Na ɔhakyile ɔ nwo ɔnleanle ye ɛdoavolɛma ne, na ɔdeanle Pita ɔhanle kɛ: “Se di me nzi, Seetan! ɔluakɛ wɔ adwenle ne ɛnle Nyamenle adwenle, emomu sonla adwenle.”+
34 Akee ɔvɛlɛle menli dɔɔnwo ne nee ye ɛdoavolɛma ne wɔ ɔ nwo ɛkɛ ne na ɔzele bɛ kɛ: “Saa awie kulo kɛ ɔtoa me a, maa ɔkpo ɔ nwo na ɔva ye amaneɛnwunlɛ baka* ne na ɔhɔ zo ɔdoa me.+
35 Ɔluakɛ awie biala mɔɔ kulo kɛ ɔbɔ ye ngoane* nwo bane la ɔbavi ɔ sa, na awie biala mɔɔ me nee edwɛkpa ne ati ye ngoane* bavi ɔ sa la asa baha ye.+
36 Nɔhalɛ nu, saa sonla nyia ewiade ye amuala na ɔminli ye ngoane* a, nvasoɛ boni a ɔbanyia a?+
37 Na duzu bɔbɔ a sonla kɛva kɛzenza ye ngoane* a?+
38 Na awie biala mɔɔ medame nee me edwɛkɛ ne anwo kɛyɛ ye nyiane wɔ awolɛndoazo ɛhye mɔɔ bɛsɛkye agyalɛ* na bɛyɛ ɛtane la anyunlu la, ɔ nwo bayɛ sonla Ra ne noko nyiane+ wɔ mekɛ mɔɔ ɔbara ɔ Ze anyunlunyia nu mɔɔ ye anwumabɔvolɛma nwuanzanwuanza ne boka ɔ nwo la.”+
Ɔbodwɛkɛ
^ Anzɛɛ “ɔyɛle asɔne.”
^ Nea Edwɛkɛbohilelɛ.
^ Anzɛɛ “ye ɛkɛla.”
^ Anzɛɛ “ye ɛkɛla.”
^ Anzɛɛ “ye ɛkɛla.”
^ Anzɛɛ “ye ɛkɛla.”
^ Anzɛɛ “bɛnli nɔhalɛ.”
