Maeka 1:1-16
1 Wɔ Dwuda arelemgbunli+ Dwotam,+ Ehaze+ nee Hɛzikaya+ mekɛ zo, Gyihova edwɛkɛ ne rale Maeka*+ mɔɔ vi Molɛhyɛte la ɛkɛ, na ɔnwunle ɛnyelɛzodeɛnwunlɛ mɔɔ fale Samɛlea nee Gyɛlusalɛm anwo la kɛ:
2 “Maanle maanle kɔsɔɔti, bɛdie!
O azɛlɛ nee ninyɛne mɔɔ wɔ zo, bɛyɛ ɛnzolɛ,Na bɛmaa Tumivolɛ Awulae Gyihova ɛli daselɛ ɛtia bɛ+—wɔ Gyihova ɛzonlenlɛsua nwuanzanwuanza ne anu lɔ.
3 Ɔluakɛ nea! Gyihova vi ɛleka mɔɔ ɔde la ɔlɛba;Ɔbadwu aze na yeatietia azɛlɛ ye azo ɛzonlenlɛ ɛleka ne mɔ* azo.
4 Awoka ne mɔ baholo wɔ ɔ gyakɛ abo,+Na mbɔnza ne mɔ anu bakpakyekpakyeKɛ wolɛ ndɛlamoa mɔɔ senle ɛha ye,Kɛ nzule mɔɔ bɛwola bɛgua boka senze zo la.
5 Ɛhye mɔ amuala ɛzi ɔlua Gyekɔbo atuadelɛ ne ati,Ɔlua Yizilayɛma ɛtane ne mɔ ati.+
Gyekɔbo atuadelɛ ne a le duzu?
Asoo tɛ Samɛlea ɔ?+
Na nienwu a Dwuda ɛzonlenlɛ ɛleka ne mɔ* wɔ a?+
Asoo tɛ Gyɛlusalɛm ɔ?
6 Mebamaa Samɛlea ayɛ suakpole mɔɔ ɛzɛkye,Ɛleka mɔɔ bɛdua vanye la;Mebavuandi* ye awolɛ ne mɔ meagua bɔnza nu,Na meaza ye adiabo ne mɔ meagua zo.
7 Bɛbabubu ye ananze ne mɔ kɔsɔɔti anu azinli azinli,+Bɛbayela ahatualɛ mɔɔ ɔnyianle ye wɔ tuutuubɔlɛ nu la amuala wɔ senle nu.+
Mebazɛkye ye ananze ne mɔ amuala.
Ɔluakɛ ɔluale tuutuubɔlɛ zo a ɔnyianle bɛ a,Na eza bɛbava bɛadua tuutuubɔlɛ nwo kakɛ.”
8 Ɛhye ati mebazu alɔbɔlɛ ɛzunlɛ na meali nyane;+Mebagua me gyakɛ aze na mealɛ me nwo zɔ mealua.+
Mebazu alɔbɔlɛ ɛzunlɛ kɛ ɛzonlɛ la,Na meali nyane kɛ soholo la.
9 Ɔluakɛ bɛnrɛhola ye hanlɛ ne ayile yɛ;+Yera dedee yeradwu Dwuda.+
Ye ngyegyelɛ ne ɛdɛlɛ too yeradwu me menli ne anlenkɛ kpole ne anloa, yeradwu Gyɛlusalɛm.+
10 “Bɛmmabɔ ye nolo wɔ Gate;Bɛmmasu fee.
Bɛhundohundo bɛ nwo ɛnwea nu wɔ Bɛte-afela.*
11 O Hyeefɛma, bɛlɛ bɛ nwo zɔ na bɛva nyiane bɛdu bɛvi ɛkɛ.
Zeeyanama ɛtɛfindele.
Bɛbazu alɔbɔlɛ ɛzunlɛ wɔ Bɛte-yizɛle, na ɔnrɛboa bɛ bieko.
12 Meloma ɛlɛkendɛ mɔɔ le kpalɛ la,Noko ɛtane a vi Gyihova ɛkɛ ɛra Gyɛlusalɛm anlenkɛ kpole ne anloa a.
13 O Leekehyema,*+ bɛva bɛ konle ehwili ne mɔ bɛsosɔ mgbɔnwɔ ne mɔ.
Bɛdabɛ a bɛmaanle Zayɔn ara raalɛ ne yɛle ɛtane a,Ɔluakɛ wɔ* nuhua a bɛnwunle Yizilayɛ atuadelɛ ne mɔ a.+
14 Yemɔti a saa Molɛhyɛte-gate ɛlɛkɔ a ɛbamaa ye ahyɛlɛdeɛ la.
Ɛnee Akezebe+ azua ne mɔ le mɛlɛbɛla debie maa Yizilayɛ arelemgbunli.
15 O Malihyaama,+ bɔ zo mɔɔ mebamaa awie mɔɔ bali bɛ nwo zo konim* la ara a.+
Yizilayɛ anyunlunyia ne bara too yearadwu Adulam.+
16 Bɛkpa bɛ ti na bɛpepɛ bɛ enrinli ɔlua bɛ mra mɔɔ bɛkulo bɛ edwɛkɛ la ati.
Bɛkpa bɛ ti kolabekolabe kɛ ɛkpɔtɛ,*Ɔluakɛ bɛva bɛ bɛvi ɛ nwo ɛkɛ bɛhɔ akɛlɛzonlenlɛ nu.”+
Ɔbodwɛkɛ
^ Maekeɛle anzɛɛ Maekaya mɔɔ bɛpɛ ye sinli, ɔ bo kile “Nwane A Le Kɛ Gyihova A?”
^ Hibulu aneɛ nu, “ɛleka mɔɔ wɔ anwuma la.”
^ Hibulu aneɛ nu, “ɛleka mɔɔ wɔ anwuma la.”
^ Hibulu aneɛ nu, “Mebawola.”
^ Anzɛɛ “wɔ Afela sua nu.”
^ Hibulu aneɛ nu, “menli mɔɔ bɛde Leekehye la.”
^ Anzɛɛ ɔkola ɔkile, “Zayɔn ara raalɛ ne.”
^ Anzɛɛ “awie mɔɔ bava bɛ agyapadeɛ ne.”
^ Hibulu edwɛkɛkpɔkɛ ne kola kile kɔleɛ.
