Malakae 2:1-17
2 “Na kɛkala, O ɛsɔfoma, mɛla ɛhye le bɛ ɛdeɛ.+
2 Saa bɛandie me ne na bɛanvi bɛ ahonle nu bɛanwula me duma ne anyunlunyia a, mebamaa munzule ado bɛ+ na meamaa bɛ nyilalɛ ne mɔ ahakyi munzule.+ Ɛhɛe, memaa nyilalɛ ne mɔ ɛhakyi munzule ɔluakɛ bɛanva bɛanzie bɛ ahonle nu,” ɛlɔne Gyihova a se a.
3 “Bɛnlea! Bɛdabɛ ti, mebazɛkye* bɛ ma mɔɔ bɛlua la,+ na meakponde ebinli wɔ bɛ nyunlu, bɛ ɛvoyia ne mɔ* ebinli ne; na bɛbava bɛ bɛaboka nwo bɛahɔgua ɛleka mɔɔ bɛgua nyɛmoa ebinli la.
4 Akee bɛbanwu kɛ meva mɛla ɛhye memaa bɛ amaa ngyekyeleɛ mɔɔ me nee Livae yɛle la adɛnla ɛkɛ dahuu,”+ ɛlɔne Gyihova a se a.
5 “Ngyekyeleɛ ne mɔɔ me nee ye yɛle la le ngoane nee anzodwolɛ ngyekyeleɛ, menvale memaanle ye amaa yeazulo* me. Ɔzulole me, ɛhɛe, me duma ne maanle ɔ nwo wosole ye.
6 Ɛnee nɔhalɛ mɛla* wɔ ɔ nloa anu,+ yɛɛ yeanga edwɛkɛ ɛtane ɛlɛ. Ɔ nee me luale wɔ anzodwolɛ nee tenlene nu,+ na ɔmaanle menli dɔɔnwo gyakyile ɛtaneyɛlɛ.
7 Ɔwɔ kɛ ɛsɔfo kilehile menli ne Nyamenle anwo edwɛkɛ, na ɔwɔ kɛ menli kola biza ye mɛla* ne anwo edwɛkɛ,+ ɔluakɛ ɔle ɛlɔne Gyihova ɛbɔfoɔ.
8 “Noko bɛdabɛ mumua ne bɛvi adenle ne azo. Bɛmaa menli dɔɔnwo ɛdɔ aze wɔ mɛla ne anwo.*+ Bɛzɛkye Livae ngyekyeleɛ ne,”+ ɛlɔne Gyihova a se a.
9 “Ɔti mebagua bɛ nyunlu aze na meabɛlɛ bɛ aze wɔ menli kɔsɔɔti anyunlu, ɔluakɛ bɛanlua me ndenle ne mɔ azo, emomu, bɛyɛle nyeyenu wɔ mɛla ne azo ɛlilɛ nu.”+
10 “Asoo yɛ kɔsɔɔti yɛ papa ɛnle ko?+ Asoo tɛ Nyamenle kokye a bɔle yɛ a? Ɛnee duzu ati a yɛnli nɔhalɛ yɛmmaa yɛ nwo ngoko,+ na yɛgua yɛ nenyia mɔ ngyekyeleɛ ne anwo evinli ɛ?
11 Dwuda anli nɔhalɛ, yɛɛ bɛyɛ kyibadeɛ wɔ Yizilayɛ nee Gyɛlusalɛm; ɔluakɛ Dwuda ɛgua Gyihova nwuanzanwuanzayɛlɛ* ne mɔɔ Ɔkulo la anwo evinli,+ na yehɔgya adalɛ nyamenle bie ara raalɛ.+
12 Gyihova baye awie biala mɔɔ yɛ ɛhye bie la yeavi Gyekɔbo ɛdanlɛ azua nu, awie biala,* bɔbɔ mɔɔ fa afɔlebɔdeɛ bɛlɛ ɛlɔne Gyihova la.”+
13 “Na debie bieko wɔ ɛkɛ mɔɔ bɛyɛ mɔɔ yemaa bɛva monle nee ɛzunlɛ nee nyane bɛheda Gyihova afɔlemokyea ne azo a, ɛhye ati ɔnnea afɔle mɔɔ bɛbɔ la bieko anzɛɛ ɔ nye ɛnlie bɛ sa nu debie biala anwo.+
14 Na bɛka kɛ, ‘Duzu ati ɔ?’ Gyihova mumua ne ɛli daselɛ ɛtia bɛ, ɔluakɛ bɛanli nɔhalɛ bɛammaa bɛ ye mɔ mɔɔ bɛgyale bɛ wɔ bɛ mgbavolɛ nu la, noko bɛle bɛ ye mɔ, bɛ ngyekyeleɛ mraalɛ.*+
15 Noko awie wɔ ɛkɛ mɔɔ yeanyɛ bie a, ɔluakɛ ɛnee ɔlɛ sunsum ne mɔɔ ɛha la bie. Na duzu a ɛnee ahenle zɔhane ɛlɛkpondɛ a? Nyamenle ara* ne. Ɔti bɛnlea bɛ nwo boɛ wɔ bɛ sunsum ne anwo, na bɛmmabɛlɛbɛla bɛ ye mɔ mɔɔ bɛgyale bɛ bɛ mgbavolɛ nu la.”
16 Gyihova, Yizilayɛ Nyamenle ne se, “Mekyi* ewolebɔlɛ+ yɛɛ mekyi awie mɔɔ fa basabasayɛlɛ keda ye ɛdanlɛ zo* la,” ɛlɔne Gyihova a se a. “Na bɛnlea bɛ nwo boɛ wɔ bɛ sunsum ne anwo, yɛɛ bɛmmabɛlɛbɛla awie.+
17 “Bɛmaa bɛ edwɛkɛ ɛvonlo Gyihova.+ Noko bɛse, ‘Kɛzi yɛmaa yɛ edwɛkɛ ɛvonlo ye ɛ?’ Ɔluakɛ bɛka kɛ, ‘Awie biala mɔɔ yɛ ɛtane la le kpalɛ wɔ Gyihova anye zo, yɛɛ ɔ nye die ɔ nwo,’+ anzɛɛ bɛbiza kɛ, ‘Pɛlepɛlelilɛ Nyamenle ne wɔ nienwu?’”
Ɔbodwɛkɛ
^ Hibulu aneɛ nu, “mebadea.”
^ Ɛhye kile, nyɛmoa mɔɔ bɛva bɛbɔ afɔle la.
^ Anzɛɛ “yeabu.”
^ Anzɛɛ “adehilelɛ.”
^ Anzɛɛ “adehilelɛ.”
^ Anzɛɛ ɔkola ɔkile, “ɔlua bɛ adehilelɛ zo.”
^ Anzɛɛ ɔkola ɔkile, “ɛzonlenlɛsua.”
^ Hibulu aneɛ nu, “awie mɔɔ ɛdunwue nee awie mɔɔ bua edwɛkɛ.”
^ Anzɛɛ “bɛ ye mɔ wɔ mɛla adenle zo.”
^ Hibulu aneɛ nu, “Nyamenle abo zo sonla.”
^ Hibulu aneɛ nu, “Ɔkyi.”
^ Anzɛɛ “fa ɔ nwo wula basabasayɛlɛ nu.”
