Mateyu Edwɛkpa 11:1-30
11 Mekɛ mɔɔ Gyisɛse maanle ye ɛdoavolɛma 12 ne adehilelɛ wiele la, ɔvile ɛkɛ ne kɛ ɔkahilehile na yeaha edwɛkɛ ne wɔ bɛ azua ne mɔ azo.+
2 Mɔɔ Dwɔn la efiade+ na ɔdele gyima mɔɔ Kelaese ɛlɛyɛ la, ɔzoanle ye ɛdoavolɛma+
3 ɔmaanle bɛhɔbizale ye kɛ: “Wɔmɔ a ɛle Ahenle Mɔɔ Ɛlɛba La, anzɛɛ yɛmaa yɛ nye ɛla awie fofolɛ ade ɔ?”+
4 Gyisɛse buale bɛ kɛ: “Bɛzia bɛhɔ na bɛhɔha mɔɔ bɛde nee mɔɔ bɛnwu ye la bɛhile Dwɔn kɛ:+
5 Anyenzinliravolɛma nwu debie+ yɛɛ abuburama tia, kokobɛvolɛma+ te kpɔkɛ yɛɛ anzondiliravolɛma te edwɛkɛ, bɛdwazo mowuamra yɛɛ bɛka edwɛkpa ne bɛkile ehyiavolɛma.+
6 Anyelielɛ a le awie mɔɔ ɔnrɛlua me nwo zo ɔnrɛdɔ aze la.”+
7 Mɔɔ bɛdɔle adenle zo kɛ bɛkɔ la, Gyisɛse bɔle ɔ bo hanle Dwɔn anwo edwɛkɛ hilele menli dɔɔnwo ne kɛ: “Duzu a bɛhɔle ye ɛnleanlɛ wɔ fienemgbole ne anu a?+ Ndɔ baka* mɔɔ anwoma ɛlɛkpusu ye la ɔ?+
8 Ɛnee duzu a bɛhɔle ye ɛnleanlɛ a? Nrenyia mɔɔ wula tɛladeɛ kpalɛ la ɔ? Nea, menli mɔɔ wula adɛladeɛ mgbalɛ* la wɔ arelemgbunli azua nu.
9 Ɛnee akee duzu ati a bɛhɔle a? Bɛhɔnleanle ngapezonli ɔ? Ɛhɛe, ɔle zɔ, na meka meahile bɛ kɛ ɔtɛla ngapezonli bɔbɔ.+
10 Ɛhye a le ahenle mɔɔ bɛhɛlɛ ɔ nwo edwɛkɛ kɛ: ‘Nea! Melɛsoa me ɛbɔfoɔ meamaa yealimoa ɛ nyunlu, na yemɔ a ɔbaziezie wɔ adenle nu yeamaa wɔ a!’+
11 Nɔhalɛ nu meka meahile bɛ, wɔ menli mɔɔ mraalɛ ɛwo bɛ la anu, awie biala ɛtɛdwazole mɔɔ le kpole tɛla Dwɔn Sɔnevolɛ ne a, noko awie mɔɔ le ekyi wɔ anwuma Belemgbunlililɛ ne anu la le kpole tɛla ye.+
12 Ɔvi Dwɔn Sɔnevolɛ ne mekɛ zo badwu ɛnɛ, anwuma Belemgbunlililɛ ne a le bodane mɔɔ menli ɛlɛpele adwu nwo a, na bɛdabɛ mɔɔ bɛlɛpele bɛadwu nwo la sɔ nu ɛsesebɛ.+
13 Ɔluakɛ Ngapezoma ne nee Mɛla ne amuala, hanle ngapezo radwule Dwɔn anwo zo;+
14 na saa bɛkulo kɛ bɛdie bɛto nu a, yemɔ a le ‘Yilaegya ne mɔɔ bara la.’+
15 Bɛmaa mɔɔ lɛ ɛnzolɛ la ɛdie.
16 “Nwane anwo a menva awolɛndoazo ɛhye mendo a?+ Ɔle kɛ ngakula mɔɔ bɛde gua zo na bɛlɛtea nu bɛavɛlɛ bɛ gɔnwo mɔ
17 kɛ: ‘Yɛbɔle fulutu yɛmaanle bɛ noko bɛanzi agole; yɛdole alɔbɔlɛ edwɛne noko bɛanli nyane.’
18 Zɔhane ala a Dwɔn rale la, yeanli yɛɛ yeanno, noko menli se, ‘Ɔlɛ sunsum ɛtane.’
19 Sonla Ra ne ɛra, ɔdi na ɔno,+ noko menli se, ‘Nea! Nrenyia adidikpoku nee nzanli, adwuledievolɛma nee ɛtanevolɛma agɔnwo.’+ Noko nrɛlɛbɛ dua mɔɔ vi ye gyimayɛlɛ nu ba la azo di benle.”+
20 Akee ɔbɔle ɔ bo ɔdeanle azua mɔɔ ɔyɛle nwanwane gyima dɔɔnwo wɔ zo la, ɔluakɛ bɛannu bɛ nwo:
21 “Koleezen, gyakɔ! Bɛteseeyeda, gyakɔ! ɔluakɛ nwanwane gyima mɔɔ bɛyɛle ye wɔ bɛ avinli la, saa bɛyɛle ye wɔ Taya nee Saedɛn a, anrɛɛ bɛnlunle bɛ nwo bɛhedale ɛrele na bɛbɔle nzonle dɛbadɛba.+
22 Noko meka meahile bɛ kɛ, wɔ Ndɛnebualɛ Kenle ne, ɔbayɛ bɛtɛɛ yeamaa Taya nee Saedɛn yeadɛla bɛ.+
23 Na wɔmɔ Kapɛnayɛm,+ bɛbamaa wɔ zo bɛahɔ anwuma ɔ? Nla* nu a ɛbadwu wɔahɔ a;+ ɔluakɛ saa nwanwane gyima mɔɔ bɛyɛle ye wɔ wɔ nu la, bɛyɛle ye wɔ Sodɔm a, anrɛɛ ɛnɛ nee ɛnɛ ala ɔtɛbɔ ɛkɛ.
24 Noko meka meahile bɛ kɛ, wɔ Ndɛnebualɛ Kenle ne, ɔbayɛ bɛtɛɛ yeamaa Sodɔm yeadɛla bɛ.”+
25 Mekɛ zɔhane, Gyisɛse hanle kɛ: “Egya, anwuma nee azɛlɛ Menle,* meye wɔ ayɛlɛ wɔ bagua nu, ɔluakɛ wɔva ninyɛne ɛhye mɔ wɔvea nrɛlɛbɛvolɛma nee nwomama na wɔye wɔhile ngakula.+
26 Ɛhɛe, O Egya, ɔluakɛ ɛnee ɛhye a le adenle mɔɔ ɛ nye die nwo a.
27 Me Ze ɛva ninyɛne kɔsɔɔti ɛmaa me,+ na awie biala ɛnze Ralɛ ne kpalɛ kɛ Selɛ ne;+ yɛɛ awie biala ɛnze Selɛ ne kpalɛ kɛ Ralɛ ne nee awie biala mɔɔ Ralɛ ne kulo kɛ ɔda ye ali ɔkile ye la.+
28 Bɛdabɛ mɔɔ bɛvɛ na bɛzo adesoa la amuala, bɛrɛla me nwo ɛke, na mebamaa bɛalie bɛ menle.
29 Bɛva me gyɛnvayile ne bɛdo bɛ kɔme zo na bɛzukoa me, ɔluakɛ mele bɛtɛɛ yɛɛ mebɛlɛ me nwo aze wɔ ahonle nu,+ na bɛ nwo* kɛdɔ bɛ.
30 Na me gyɛnvayile ne ɛmmaa bɛ kɔme ɛnyɛ bɛ nyane, yɛɛ me adesoa ne ɛnyɛ ɛlomboɛ.”
Ɔbodwɛkɛ
^ Nea Edwɛkɛbohilelɛ.
^ Anzɛɛ “keda ndanlɛ kpalɛ.”
^ Anzɛɛ “Hades,” ɛhye kile, alesama nla. Nea Edwɛkɛbohilelɛ.
^ Giliki aneɛ nu, “azɛlɛ ye Awulae.”
^ Anzɛɛ “bɛ ɛkɛla nwo.”
