Mateyu Edwɛkpa 12:1-50
-
Gyisɛse, “Ɛnwomenlelielɛ kenle ne Amenle” (1-8)
-
Bɛyɛle nrenyia bie mɔɔ asa ɛdwe la ayile (9-14)
-
Nyamenle sonvolɛ mɔɔ ɔkulo ye la (15-21)
-
Bɛluale sunsum nwuanzanwuanza zo bɛdule sunsum ɛtane (22-30)
-
Ɛtane mɔɔ bɛnva bɛngyɛ (31, 32)
-
Bɛdua baka ma zo bɛnwu ye (33-37)
-
Dwona sɛkɛlɛneɛ ne (38-42)
-
Saa sunsum ɛtane sia ba a (43-45)
-
Gyisɛse mame nee ɔ mediema mrenyia (46-50)
12 Mekɛ zɔhane, Gyisɛse hɔvale hwiiti ɛya bie anu wɔ Ɛnwomenlelielɛ kenle ne. Ɛhɔne hunle ye ɛdoavolɛma ne yemɔti bɛbɔle ɔ bo bɛtetele hwiiti ne bie bɛlile.+
2 Mɔɔ Falasiima ne nwunle ɛhye la, bɛzele ye kɛ: “Nea! Wɔ ɛdoavolɛma ne ɛlɛyɛ mɔɔ mɛla ɛmmaa adenle kɛ bɛyɛ ye Ɛnwomenlelielɛ kenle la.”+
3 Ɔzele bɛ kɛ: “Asoo bɛtɛkengale mɔɔ Devidi yɛle wɔ mekɛ mɔɔ ɛnee ɛhɔne ɛlɛku ye nee menli mɔɔ ɔ nee bɛ lua la ɔ?+
4 Kɛzi ɔhɔle Nyamenle sua ne anu na bɛlile paano ne mɔɔ bɛfa bɛkile la+ wɔ mekɛ mɔɔ mɛla ɛmmaa adenle kɛ ɔdaye anzɛɛ menli mɔɔ ɔ nee bɛ lua la di bie kyesɛ ɛsɔfo ne mɔ ala la ɔ?+
5 Anzɛɛ bɛtɛkengale ye wɔ Mɛla ne anu kɛ wɔ Ɛnwomenlelielɛ kenle ne, ɛsɔfoma mɔɔ bɛwɔ ɛzonlenlɛsua ne anu la yɛ gyima noko bɛnli fɔlɛ ɔ?+
6 Noko meka meahile bɛ kɛ awie mɔɔ le kpole tɛla ɛzonlenlɛsua ne la wɔ ɛke.+
7 Noko, saa bɛze mɔɔ edwɛkɛ ɛhye, ‘Mekulo anwunvɔnezelɛ+ na tɛ afɔlebɔlɛ ɔ’ kile la a,+ anrɛɛ bɛambua bɛdabɛ mɔɔ edwɛkɛ ɛnle bɛ nwo la fɔlɛ.
8 Ɔluakɛ sonla Ra ne le Ɛnwomenlelielɛ kenle ne Amenle.”+
9 Mɔɔ ɔvile ɛkɛ ne la, ɔhɔle bɛ nyianusua ne anu,
10 na nea! ɛnee nrenyia bie mɔɔ ɔ sa ɛdwe la wɔ ɛkɛ!+ Yemɔti, amaa bɛanyia ɔ nwo edwɛkɛ bɛaha la, bɛbizale ye kɛ, “Asoo mɛla maa adenle kɛ bɛkɛyɛ ayile wɔ Ɛnwomenlelielɛ kenle ɔ?”+
11 Ɔzele bɛ kɛ: “Bɛ nuhua boni a saa ɔlɛ ye boane na ɔkɔtɔ kuma nu Ɛnwomenlelielɛ kenle a, ɔnrɛzɔ ye ɔnrɛye ye a?+
12 Nea kɛzi sonla sonle bolɛ kpalɛ tɛla boane a! Yemɔti mɛla maa adenle kɛ bɛkɛyɛ debie kpalɛ wɔ Ɛnwomenlelielɛ kenle.”
13 Akee ɔzele nrenyia ne kɛ: “Tenrɛ ɛ sa nu.” Na ɔdenrɛle nu, na ɔyɛle kpalɛ kɛ ɔ sa ko ne la.
14 Noko Falasiima ne vindele na bɛhɔvale ɔ nwo adwenle kɛ bɛku ye.
15 Mɔɔ Gyisɛse nwunle ɛhye la, ɔvile ɛkɛ ne ɔhɔle. Menli dɔɔnwo doale ye,+ na ɔyɛle bɛ kɔsɔɔti ayile,
16 noko ɔbɔle bɛ kɔkɔ ɛsesebɛ kɛ bɛmmaka bɛmaa menli nwu ye,+
17 amaa mɔɔ bɛluale ngapezonli Ayezaya anwo zo bɛhanle la ara nu kɛ:
18 “Nea! Me sonvolɛ+ mɔɔ mekpa ye, mɔɔ mekulo ye na melie ye medo nu!*+ Mebava me sunsum ne meamaa ye,+ na ɔbamaa maanle maanle ne anwu mɔɔ pɛlepɛlelilɛ kile la wienyi.
19 Ɔnrɛli butule+ yɛɛ ɔnrɛdeɛdea nu, yɛɛ awie ɛnrɛde ɔ ne wɔ awɔdenle ne mɔ azo.
20 Ɔnrɛbu ndɔ baka mɔɔ bɛkposo ye la, yɛɛ ɔnrɛnlua kɛnlaneɛ nu nyɛma mɔɔ asɛɛ ɛnlu la,+ kɔkpula kɛ ɔkɛmaa pɛlepɛlelilɛ kɛli konim.
21 Nɔhalɛ nu, maanle maanle ne banyia anyelazo wɔ ye duma nu.”+
22 Akee bɛvale nrenyia bie mɔɔ sunsum ɛtane wɔ ɔ nwo na ɔle anyenzinliravolɛ nee mumule la bɛrɛlɛle ye, na ɔyɛle ye ayile ɔmaanle nrenyia mumule ne dendɛle na ɔnwunle debie.
23 Ɛhye zinle menli ne anwo na bɛbɔle ɔ bo bɛhanle kɛ: “Asoo tɛ Devidi Ara ne ɛne?”
24 Mɔɔ Falasiima ne dele ɛhye la, bɛhanle kɛ: “Nrenyia ɛhye dua Biyɛlezibɛbe,* sunsum ɛtane ne mɔ kpanyinli ne anwo zo a ɔtu sunsum ɛtane ne mɔ a.”+
25 Mɔɔ ɔnwunle bɛ adwenle la, ɔzele bɛ kɛ: “Belemgbunlililɛ biala mɔɔ anu kɛhyɛ na bɛko bɛtia bɛ nwo la ɛnrɛgyinla, yɛɛ suakpole anzɛɛ awuke biala mɔɔ anu kɛhyɛ na bɛko bɛtia bɛ nwo la babɔ.
26 Yemɔti, saa Seetan tu Seetan a, ɛnee ɔlɛko yeatia ɔ nwo; na kɛ ɔkɛyɛ na ye belemgbunlililɛ ne agyinla ɛ?
27 Bieko, saa medua Biyɛlezibɛbe anwo zo a metu sunsum ɛtane ne mɔ a, ɛnee nwane anwo zo a bɛ mra ne mɔ dua tu bɛ a? Ɛhye ati a bɛbabua bɛ ndɛne la.
28 Noko saa medua Nyamenle sunsum ne azo a metu sunsum ɛtane ne mɔ a, ɛnee Nyamenle Belemgbunlililɛ ne ɛdwu bɛ nwo ɛke dɛbadɛba.+
29 Anzɛɛ kɛ ɔkɛyɛ na awie ahola ahɔ katakyie sua nu ahɔva ye ninyɛne ɛ? Kyesɛ ɔdimoa ɔkyekye katakyie ne na yeahola yeasesa ye sua ne anu ninyɛne ne.
30 Awie biala mɔɔ ɛnle me afoa la dwazo tia me, yɛɛ mɔɔ nee me ɛnguohua la sande nu.+
31 “Ɛhye ati meka meahile bɛ kɛ, bɛbava ɛtane nee munzule edwɛkɛ biala bɛahyɛ menli, noko bɛnrɛva munzule edwɛkɛ mɔɔ bɛka bɛtia sunsum ne la bɛnrɛhyɛ.+
32 Kɛ neazo la, awie biala mɔɔ kɛha edwɛkɛ bie kɛtia sonla Ra ne la, bɛbava bɛahyɛ ye;+ noko awie biala mɔɔ kɛdendɛ kɛtia sunsum nwuanzanwuanza ne la, bɛnrɛva bɛnrɛhyɛ ye wɔ mekɛ ɛhye anu* anzɛɛ kenle bie.+
33 “Saa bɛmaa baka ne yɛ kpalɛ a, yɛɛ ye ma ne bayɛ kpalɛ a, noko saa bɛmaa baka ne kpɔlɔ a, ye ma ne noko bakpɔlɔ, ɔluakɛ baka ne ma a kile ye baka holɛ a.+
34 Nwɔlɛ mralɛ,+ kɛ ɔkɛyɛ na bɛaha edwɛkɛ kpalɛ wɔ mekɛ mɔɔ bɛle ɛtanevolɛma la ɛ? Ɔluakɛ mɔɔ ɛyi ahonle nu la a finde bɛ nloa a.+
35 Sonlakpalɛ fa ninyɛne mgbalɛ mɔɔ yeboɔboa ɔ nloa la bie maa, yɛɛ sonlatane fa ninyɛndane mɔɔ yeboɔboa ɔ nloa la bie maa.+
36 Meka meahile bɛ kɛ, edwɛkɛ biala mɔɔ nvasoɛ ɛnle zo mɔɔ menli kɛha la, bɛbabu nwolɛ mgbonda+ wɔ Ndɛnebualɛ Kenle ne;
37 ɔluakɛ bɛ edwɛkɛ zo a bɛbalua bɛabua bɛ tenlenema a, yɛɛ bɛ edwɛkɛ zo a bɛbalua bɛabua bɛ fɔlɛ a.”
38 Akee mɛla kilehilevolɛma nee Falasiima bie mɔ buale ye zele kɛ: “Kilehilevolɛ, yɛkulo kɛ ɛyɛ sɛkɛlɛneɛ bie ɛmaa yɛnea.”+
39 Ɔbuale bɛ kɛ: “Awolɛndoazo amumuyɛ mɔɔ bɛsɛkye agyalɛ* la kɔ zo kpondɛ sɛkɛlɛneɛ, noko bɛnrɛmaa bɛ sɛkɛlɛneɛ biala kyesɛ ngapezonli Dwona sɛkɛlɛneɛ ne ala.+
40 Na kɛ mɔɔ Dwona lile alehyenlɛ nee aledwolɛ too kenle nsa wɔ fɛlɛ kpole ne akunlu la,+ zɔhane ala a sonla Ra ne noko bali alehyenlɛ nee aledwolɛ kenle nsa wɔ azɛlɛ ne abo a.+
41 Menli mɔɔ wɔ Nenɛvɛ la nee awolɛndoazo ɛhye badwazo wɔ ndɛnebualɛ mekɛ ne anu, na bɛabua awolɛndoazo ɛhye fɔlɛ, ɔluakɛ Dwona edwɛkɛ ne maanle menli mɔɔ wɔ Nenɛvɛ la nlunle bɛ nwo.+ Noko nea! awie mɔɔ le kpole tɛla Dwona la wɔ ɛke.+
42 Nyiakɛ ɔbahyema ne nee awolɛndoazo ɛhye badwazo wɔ ndɛnebualɛ mekɛ ne anu na yeabua ye fɔlɛ, ɔluakɛ ɔvi moamoa nehane ɔradiele Sɔlɔmɔn nrɛlɛbɛ ne.+ Noko nea! awie mɔɔ le kpole tɛla Sɔlɔmɔn la wɔ ɛke.+
43 “Saa sunsum ɛtane bie fi awie anwo a, ɔkɔduolua ɛleka resee kɛ ɔkpondɛ ɛleka mɔɔ ɔbalie ɔ menle la, na ɔnnyia bie.+
44 Akee ɔka kɛ, ‘Mesia meahɔ me sua ne mɔɔ menvile nu la anu,’ saa ɔbadwu ɛkɛ a, ɔnwu kɛ awie biala ɛnde sua ne anu noko bɛkpoɔkpoa nu na bɛziezie nu kɛnlɛma.
45 Akee ɔkɔ na ɔkɔfa sunsum ngakyile nsuu mɔɔ bɛ ti yɛ se tɛla ye la, na bɛwolo nu a, bɛtɛnla ɛkɛ; nzinlii ahenle tɛnlabelɛ ne akee sɛkye tɛla alimoa ne.+ Zɔhane ala a ɔbado awolɛndoazo amumuyɛ ɛhye noko a.”
46 Mekɛ mɔɔ ɔ nloa wɔ zo ɔlɛtendɛ yeahile menli dɔɔnwo ne la, ye mame nee ɔ mediema mrenyia ne mɔ+ ragyinlanle alienwo ɛkɛ, na ɛnee bɛkulo kɛ bɛ nee ye tendɛ.+
47 Yemɔti awie hanle hilele ye kɛ: “Nea! Wɔ mame nee ɛ mediema mrenyia ne mɔ gyi alienwo lɔ, na bɛkulo kɛ bɛ nee wɔ tendɛ.”
48 Ɔbuale ahenle mɔɔ nee ye dendɛle la kɛ: “Me mame a le nwane, yɛɛ me mediema mrenyia a le nwane mɔ?”
49 Akee ɔdendenle ɔ sa wɔ ye ɛdoavolɛma ne anwo zo na ɔhanle kɛ: “Nea! Me mame nee me mediema mrenyia ɛne!+
50 Ɔluakɛ awie biala mɔɔ yɛ mɔɔ me Ze mɔɔ wɔ anwuma la kulo la, yemɔ a le me diema nrenyia nee me diema raalɛ nee me mame a.”+
Ɔbodwɛkɛ
^ Anzɛɛ “me ɛkɛla ɛlie ye ɛdo nu.”
^ Ɔle duma mɔɔ bɛfa bɛfɛlɛ Seetan.
^ Nea Edwɛkɛbohilelɛ.
^ Anzɛɛ “mɔɔ bɛnli nɔhalɛ.”
