Mateyu Edwɛkpa 19:1-30
19 Mekɛ mɔɔ Gyisɛse wiele ɛhye ka la, ɔvile Galeli na ɔhɔle Dwudiya ɛweɛne zo wɔ Dwɔdan ne anzi lɔ.+
2 Menli dɔɔnwo doale ye wɔ ɛkɛ na ɔyɛle bɛ ayile.
3 Na Falasiima rale ɔ nwo ɛkɛ, na kɛmɔ bɛkulo kɛ bɛsɔ ye bɛnea la ati, bɛbizale ye kɛ: “Asoo mɛla maa adenle kɛ nrenyia kola bɔ ɔ ye ewole wɔ edwɛkɛ biala anwo?”+
4 Ɔbuale bɛ kɛ: “Bɛtɛkengale kɛ ahenle mɔɔ bɔle bɛ la bɔle bɛ nrenyia nee raalɛ wɔ mɔlebɛbo ne+
5 na ɔhanle kɛ: ‘Ɛhye ati a nrenyia bagyakyi ye papa nee ye mame na yeahɔbeta ɔ ye anwo na bɛ mu nwiɔ bɛayɛ nwonane ko la ɔ’?+
6 Yemɔti bɛnle nwiɔ bieko, emomu nwonane ko. Zɔhane ati, mɔɔ Nyamenle ɛha ɛbɔ nu la, mmamaa awie biala kpakye nu.”+
7 Bɛhanle bɛhilele ye kɛ: “Ɛnee duzu ati a Mosisi hanle kɛ ɔmaa ye ewolebɔlɛ kɛlata na ɔgyakyi ye ɛ?”+
8 Ɔzele bɛ kɛ: “Bɛ ahonle ɛsesebɛ ne ati a Mosisi maanle bɛ adenle kɛ bɛbɔ bɛ ye mɔ ewole a,+ na tɛ kɛ ɛnee ɔde ye wɔ mɔlebɛbo ne la ɛne.+
9 Meka meahile bɛ kɛ, awie biala mɔɔ tɛ adwɔmane ɛbɛla* ti ɔkɛbɔ ɔ ye ewole na ɔkɛgya fofolɛ la ɛzɛkye agyalɛ.”+
10 Ɛdoavolɛma ne zele ye kɛ: “Saa kɛ edwɛkɛ ne de ye wɔ nrenyia nee ɔ ye avinli la ɛdeɛ a, ɛnee ɔnle kpalɛ kɛ bɛkɛgya.”
11 Ɔzele bɛ kɛ: “Tɛ menli kɔsɔɔti a kɛlie edwɛkɛ ɛhye kɛdo nu a, kyesɛ menli mɔɔ lɛ ahyɛlɛdeɛ ne la ala.+
12 Ɔluakɛ menli wɔ ɛkɛ mɔɔ bɛngya mɔɔ bɛvale bɛwole bɛ a, yɛɛ menli wɔ ɛkɛ mɔɔ bɛngya mɔɔ menli a ɛyɛ bɛ zɔ a, yɛɛ bie mɔ noko anwuma Belemgbunlililɛ ne ati a bɛngya a. Bɛmaa mɔɔ kɛlie kɛdo nu la ɛyɛ ye zɔ.”+
13 Akee bɛvale ngakula ngyikyi bɛrɛlɛle ye kɛ ɔva ɔ sa ɔgua bɛ nwo zo na ɔyɛ asɔne ɔmaa bɛ, noko ɛdoavolɛma ne deanle bɛ.+
14 Noko Gyisɛse hanle kɛ: “Bɛgyakyi ngakula ne mɔ, bɛmmasi bɛ adenle kɛ bɛkɛmaa bɛkɛra me nwo, ɔluakɛ anwuma Belemgbunlililɛ ne le bɛdabɛ mɔɔ bɛle kɛ ɛhye mɔ zɛhae la ɛdeɛ.”+
15 Na ɔvale ɔ sa ɔguale bɛ nwo zo na ɔvile ɛkɛ ne ɔhɔle.
16 Akee nea! awie rale ɔ nwo ɛkɛ razele ye kɛ: “Kilehilevolɛ, kpalɛ boni a ɔwɔ kɛ meyɛ na meanyia dahuu ngoane a?”+
17 Ɔzele ye kɛ: “Duzu ati a ɛlɛbiza me mɔɔ le kpalɛ la anwo edwɛkɛ ɛ? Awie kokye ala a le kpalɛ a.+ Emomu, saa ɛkpondɛ kɛ ɛnyia ngoane a, kɔ zo di mɛla ne mɔ azo.”+
18 Ɔzele ye kɛ: “Nuhua ne boni?” Gyisɛse hanle kɛ: “Mmayɛ kodiawu,+ mmasɛkye agyalɛ,+ mmawua,+ mmadi daselɛ adalɛ,+
19 di wɔ papa nee wɔ mame eni,+ na kulo ɛ gɔnwo kɛ ɛ nwo.”+
20 Kpavolɛ ne zele ye kɛ: “Meli ɛhye mɔ amuala azo; duzu bieko a ɔwɔ kɛ meyɛ a?”
21 Gyisɛse zele ye kɛ: “Saa ɛkulo kɛ ɛdi munli a, ɛnee kɔdɔne ninyɛne mɔɔ ɛlɛ la na fa ezukoa ne maa ehyiavolɛma, na ɛbanyia anwonyia wɔ anwuma;+ na bɛla badoa me.”+
22 Mɔɔ kpavolɛ ne dele ɛhye la, ɔvale alɔbɔlɛ ɔhɔle, ɔluakɛ ɛnee ɔlɛ agyapadeɛ dɔɔnwo.+
23 Akee Gyisɛse zele ye ɛdoavolɛma ne kɛ: “Nɔhalɛ nu meka meahile bɛ kɛ, ɔbayɛ se yeamaa sukoavolɛ kɛ ɔkɛhɔ anwuma Belemgbunlililɛ ne anu.+
24 Meka meazi zolɛ bieko kɛ, ɔla aze ɔmaa afunlumu kɛ ɔkɛwolo agbuyia nye* nu tɛla kɛ sukoavolɛ kɛhɔ Nyamenle Belemgbunlililɛ ne anu.”+
25 Mɔɔ ɛdoavolɛma ne dele ɛhye la, ɔzinle bɛ nwo kpole na bɛhanle kɛ: “Ɛnee akee nwane a kɛnyia ngoane a?”+
26 Gyisɛse nleanle bɛ koonwu na ɔzele bɛ kɛ: “Sonla ɛdeɛ ɛhye yɛ se maa ye, noko Nyamenle ɛdeɛ ɔkola ɔyɛ debie biala.”+
27 Akee Pita buale ye kɛ: “Nea! Yɛgyakyi debie biala yɛɛ yɛdoa wɔ a; ɛnee duzu a yɛbanyia a?”+
28 Gyisɛse zele bɛ kɛ: “Nɔhalɛ nu meka meahile bɛ, mekɛ mɔɔ bɛyɛ ninyɛne fofolɛ na sonla Ra ne de ye anyunlunyia belemgbunli ebia ne anu la, bɛdabɛ mɔɔ bɛdoa me la, bɛbadɛnla arelemgbunli mbia 12 azo bɛabua Yizilayɛ mbusua 12 ne ndɛne.+
29 Na awie biala mɔɔ ɛgyakyi azua anzɛɛ mediema mrenyia anzɛɛ mediema mraalɛ anzɛɛ papa anzɛɛ mame anzɛɛ mralɛ anzɛɛ azɛlɛ wɔ me duma nu la banyia ye mɔnwo ɛya na yeanyia dahuu ngoane.+
30 “Noko alimoamra dɔɔnwo bali amozi, na amozi amra alimoa.+
