Mateyu Edwɛkpa 21:1-46
21 Mekɛ mɔɔ bɛbikyele Gyɛlusalɛm na bɛdwule Bɛtefagye wɔ Ɔlivi Boka ne azo la, Gyisɛse zoanle ɛdoavolɛma nwiɔ,+
2 na ɔzele bɛ kɛ: “Bɛhɔ namule ne mɔɔ bɛ nye dua ye la azo, na ɛkɛ ne ala bɛbanwu asoaso bie mɔɔ bɛhenda ye la nee asoaso ralɛ. Bɛzianyi bɛ na bɛva bɛ bɛrɛlɛ me.
3 Saa awie biza bɛ nwolɛ edwɛkɛ a bɛha kɛ, ‘Awulae hyia bɛ.’ Na ɛkɛ ne ala ɔkɛmaa bɛ adenle.”
4 Nɔhalɛ nu, ɛhye zile amaa mɔɔ bɛluale ngapezonli ne anwo zo bɛhanle la ara nu kɛ:
5 “Bɛha bɛhile Zayɔn ara raalɛ ne kɛ: ‘Nea! Wɔ belemgbunli ne ɛlɛba ɛ nwo ɛkɛ,+ ɔle bɛlɛvo+ yɛɛ ɔde asoaso zo, ɛhɛe, asoaso ralɛ, nane mɔɔ soa ninyɛne la ara nwo zo.’”+
6 Yemɔti ɛdoavolɛma ne hɔle na bɛhɔyɛle ye kɛ mɔɔ Gyisɛse hilele bɛ la.+
7 Bɛvale asoaso ne nee ɔ ra ne bɛrale, na bɛvale bɛ adɛladeɛ aguzo ne mɔ bɛguale bɛ nwo zo, na ɔdɛnlanle zolɛ.+
8 Menli dɔɔnwo vale bɛ adɛladeɛ aguzo ne mɔ sesɛle adenle ne anu,+ bie mɔ noko pepɛle mbaka ngane na bɛvale bɛguale adenle ne anu.
9 Na menli dɔɔnwo ne mɔɔ li ɔ nyunlu nee ɔ nzi la deɛdeanle nu kɛ: “Yɛsɛlɛ wɔ, die ye, Devidi Ara ne!+ Nyilalɛ ɛha mɔɔ ɛlɛba wɔ Gyihova* duma nu la!+ Yɛsɛlɛ wɔ, die ye, wɔmɔ mɔɔ ɛwɔ anwuma anwuma lɔ la!”+
10 Na mɔɔ ɔdwule Gyɛlusalɛm la, sua ne azo kpudwule na bɛbizale kɛ: “Nwane ɛne?”
11 Menli dɔɔnwo ne hanle kɛ: “Ɛhye a le ngapezonli Gyisɛse+ mɔɔ vi Nazalɛte mɔɔ wɔ Galeli la!”
12 Gyisɛse hɔle ɛzonlenlɛsua ne anu na ɔvoanle bɛdabɛ mɔɔ bɛlɛtɔne ninyɛne nee bɛdabɛ mɔɔ bɛlɛtɔ debie wɔ ɛzonlenlɛsua ne anu la amuala, na ɔbutubutule menli mɔɔ senza ezukoa la ɛkponle ne mɔ na ɔhanle menli mɔɔ ɛlɛtɔne abubule la mbia ɔguale.+
13 Na ɔzele bɛ kɛ: “Bɛhɛlɛ kɛ, ‘Bɛbavɛlɛ me sua ne asɔneyɛlɛ sua,’+ noko bɛmɛ bɛlɛyɛ ye nwule feabelɛ.”+
14 Na anyenzinliravolɛma nee abuburama rale ɔ nwo ɛkɛ wɔ ɛzonlenlɛsua ne anu, na ɔyɛle bɛ ayile.
15 Mɔɔ ɛsɔfo mgbanyinli nee mɛla kilehilevolɛma ne nwunle nwanwane ninyɛne mɔɔ ɔyɛle nee ngakula mrenyia ne mɔ mɔɔ ɛlɛteɛdea nu wɔ ɛzonlenlɛsua ne anu kɛ, “Yɛsɛlɛ wɔ, die ye, Devidi Ara ne!”+ la, bɛvale ɛya+
16 na bɛzele ye kɛ: “Ɛte mɔɔ ɛhye mɔ ɛlɛkeha la ɔ?” Gyisɛse zele bɛ kɛ: “Ɛhɛe. Asoo bɛtɛkengale ɛhye, ‘Ngakula nee mbɔdɔma anloa anu a, wɔziezie ayɛlɛyelɛ’ ɔ?”+
17 Ɔgyakyile bɛ ɛkɛ ne na ɔvile sua ne azo ɔhɔle Bɛtani na ɔlale ɛkɛ.+
18 Nwonlomɔ mangyee ne mɔɔ ɔlɛsia yeara Gyɛlusalɛm la, ɛhɔne hunle ye.+
19 Ɔnwunle feege baka bie wɔ adenle ne anloa na ɔhɔle ɔ bo noko yeannwu ɛhwee wɔ zolɛ kɛ nya ngome ala,+ na ɔzele baka ne kɛ: “Ɛnrɛzo ma bieko ɛlɛ.”+ Na ɛkɛ ne ala feege baka ne wule.
20 Mɔɔ ɛdoavolɛma ne nwunle ɛhye la, ɔzinle bɛ nwo na bɛhanle kɛ: “Kɛ ɔyɛle mɔɔ feege baka ne wule ɛkɛ ne ala ɛ?”+
21 Gyisɛse buale bɛ kɛ: “Nɔhalɛ nu meka meahile bɛ kɛ, saa bɛlɛ diedi na bɛ adwenle nu ɛnyɛ bɛ kesee a, anrɛɛ tɛ mɔɔ menyɛle feege baka ne la angome a bɛbayɛ a, emomu, saa bɛka bɛkile boka ɛhye bɔbɔ kɛ, ‘Tu kɔdɔ nyevile nu a,’ ɔkɛyɛ zɔhane.+
22 Na debie biala mɔɔ bɛkɛbiza wɔ asɔneyɛlɛ nu la, saa bɛlɛ diedi a, bɛ sa kɛha ye.”+
23 Mekɛ mɔɔ ɔhɔle ɛzonlenlɛsua ne anu na ɔlɛkilehile la, ɛsɔfo mgbanyinli nee mgbanyima ne mɔ rale ɔ nwo ɛkɛ na bɛbizale kɛ: “Tumi boni a ɛfa ɛyɛ ninyɛne ɛhye mɔ a? Na nwane a maanle wɔ tumi ɛhye a?”+
24 Gyisɛse buale bɛ kɛ: “Medame noko mebiza bɛ edwɛkɛ ko. Saa bɛbua me a, medame noko mebaha tumi ne mɔɔ mefa meyɛ ninyɛne ɛhye mɔ la meahile bɛ:
25 Tumi ne mɔɔ Dwɔn vale zɔnenle la, ɔvi ni? Ɔvi anwuma anzɛɛ ɔvi menli?” Noko bɛbɔle ɔ bo bɛzuzule nwo kɛ: “Saa yɛka kɛ, ‘Ɔvi anwuma’ a, ɔbaha yeahile yɛ kɛ, ‘Ɛnee duzu ati a bɛanlie ye bɛanli ɛ?’+
26 Noko saa yɛka kɛ, ‘Ɔvi menli’ a, yɛsulo mɔɔ menli dɔɔnwo ne kɛyɛ la, ɔluakɛ bɛ muala bɛbu Dwɔn kɛ ngapezonli.”
27 Yemɔti bɛbuale Gyisɛse kɛ: “Yɛnze.” Ɔdaye noko ɔzele bɛ kɛ: “Ɛnee medame noko menrɛha tumi ne mɔɔ mefa meyɛ ninyɛne ɛhye mɔ la menrɛhile bɛ.
28 “Kɛzi bɛdwenle nwo ɛ? Ɛnee nrenyia bie lɛ mralɛ nwiɔ. Ɔhɔle mɔɔ limoa la ɛkɛ na ɔzele ye kɛ, ‘Me ra, ɛnɛ kɔyɛ gyima wɔ vanye egyinli ne anu.’
29 Ɔbuale ye kɛ, ‘Menrɛhɔ,’ noko nzinlii ɔnlunle ɔ nwo na ɔhɔle.
30 Ɔhɔle mɔɔ tɔ zo nwiɔ la ɛkɛ na ɔhɔhanle edwɛkɛ ko ne ala. Ɔbuale ye kɛ, ‘Egya, mebahɔ,’ noko yeangɔ.
31 Ngakula nwiɔ ne anu boni a yɛle ye papa ɛhulolɛdeɛ a?” Bɛbuale kɛ: “Mɔɔ limoa la ɔ.” Gyisɛse zele bɛ kɛ: “Nɔhalɛ nu meka meahile bɛ kɛ adwuledievolɛma yɛɛ tuutuuma ɛlɛdimoa bɛ nyunlu ahɔ Nyamenle Belemgbunlililɛ ne anu.
32 Ɔluakɛ Dwɔn rahilele bɛ tenlene adenle ne noko bɛanlie ye bɛanli. Noko, adwuledievolɛma nee tuutuuma liele ye lile,+ na nzinlii bɔbɔ mɔɔ bɛnwunle ɛhye la, bɛannu bɛ nwo na bɛalie ye bɛali.
33 “Bɛdie ndonwo fofolɛ: Nrenyia bie mɔɔ lɛ azɛlɛ la yɛle vanye egyinli+ na ɔliele nwolɛ bane na ɔdule kuma mɔɔ bɛbahwihwi vanye ma ne nu la wɔ nu na ɔzile tawa;+ akee ɔvale ɔwulale ɛyazonlɛma asa anu na ɔdule adenle.+
34 Mɔɔ ma ɛdelɛ mekɛ ne dwule la, ɔzoanle ye ngɛkɛlɛ ne mɔ kɛ bɛhɔ ɛyazonlɛma ne ɛkɛ bɛhɔlie ye ma ɛdeɛ ne bɛrɛlɛ ye.
35 Noko, ɛyazonlɛma ne hyele ye ngɛkɛlɛ ne mɔ, bɛbole ko, bɛhunle ko, na bɛzile ko awolɛ.+
36 Eza ɔzoanle ngɛkɛlɛ mɔɔ zonle tɛla alimoa ɛdeɛ ne la, na bɛyɛle bɛdabɛ noko zɔhane ala.+
37 Nzinlii ɔzoanle ɔ ra nrenyia wɔ bɛ nwo lɔ na ɔhanle kɛ, ‘Bɛbabu me ra ne.’
38 Mɔɔ ɛyazonlɛma ne nwunle ɔ ra ne la, bɛhanle bɛhilele bɛ nwo ngoko kɛ, ‘Koliagya ne ɛne.+ Bɛrɛla bɛmaa yɛhu ye na yɛva ye agyapadeɛ ne!’
39 Yemɔti bɛhyele ye na bɛhwenle ye bɛhɔdole vanye egyinli ne anzi lɔ na bɛhunle ye.+
40 Yemɔti, saa vanye egyinli menle ne ba a, duzu a ɔkɛyɛ ɛyazonlɛma ne a?”
41 Bɛhanle bɛhilele ye kɛ: “Kɛmɔ bɛle amumuyɛma la ati, ɔbazɛkye bɛ bɔkɔɔ na yeava vanye egyinli ne yeawula ɛyazonlɛma fofolɛ mɔɔ saa ɔso ma a bɛbava bɛamaa ye la asa anu.”
42 Gyisɛse zele bɛ kɛ: “Bɛtɛkengale ye wɔ Ngɛlɛlera ne anu kɛ, ‘Bolɛ ne mɔɔ suasivoma ne kpole la, ɛrayɛ mgbɛnezo bolɛ mɔɔ anwo hyia kpalɛ a.*+ Ɛhye vi Gyihova,* na ɔyɛ nwanwane wɔ yɛ nye zo’ ɔ?+
43 Zɔhane ati meka meahile bɛ kɛ, bɛbalie Nyamenle Belemgbunlililɛ ne bɛavi bɛ sa nu na bɛava bɛamaa maanle mɔɔ so ye ma la.
44 Na awie mɔɔ badɔ bolɛ ɛhye azo la batete.+ Yɛɛ awie biala mɔɔ bolɛ ne badɔ ɔ nwo zo la, ɔbadi ye.”+
45 Mɔɔ ɛsɔfo mgbanyinli nee Falasiima ne dele ye ndonwo ne la, bɛnwunle kɛ ɔlɛka bɛ nwo edwɛkɛ.+
46 Bɛyɛle kɛ bɛkye ye, noko bɛzulole menli dɔɔnwo ne ɔluakɛ bɛbule ye kɛ ngapezonli.+
Ɔbodwɛkɛ
^ Bɛfa bolɛ ɛhye bɛto bane nwiɔ ayia zo bɛmaa ɔgyinla kpundii.
