Mateyu Edwɛkpa 22:1-46
22 Gyisɛse vale ndonwo dendɛle hilele bɛ bieko kɛ:
2 “Anwuma Belemgbunlililɛ ne le kɛ belemgbunli bie mɔɔ liele atɔfolɛ+ maanle ɔ ra nrenyia la.
3 Na ɔzoanle ye ngɛkɛlɛ ne mɔ kɛ bɛhɔvɛlɛ bɛdabɛ mɔɔ bɛdole ɛsalɛ bɛvɛlɛle bɛ la kɛ bɛrɛla atɔfolɛlielɛ ne abo, noko bɛamba.+
4 Eza ɔzoanle ngɛkɛlɛ fofolɛ na ɔzele bɛ kɛ, ‘Bɛha bɛhile bɛdabɛ mɔɔ bɛdole ɛsalɛ bɛvɛlɛle bɛ la kɛ: “Nea! Meziezie me aleɛ ne mewie, mehu me nlankɛ nee me nane mɔɔ ɛlɔ la, bɛwie debie biala. Bɛrɛla atɔfolɛlielɛ ne abo.”’
5 Noko bɛbule bɛ nye bɛguale zolɛ na bɛhɔle bɛ ɛleka bie, ko hɔle ye ɛya nu, ko noko hɔlile ye gua;+
6 bɛdabɛ mɔɔ bɛhale la hyele ye ngɛkɛlɛ ne mɔ bole bɛ na bɛhunle bɛ.
7 “Belemgbunli ne vale ɛya na ɔzoanle ye ɛlɔne ɔmaanle bɛhɔhunle ahodiawu ne mɔ na bɛyelale bɛ suakpole ne.+
8 Akee ɔzele ye ngɛkɛlɛ ne mɔ kɛ, ‘Bɛwie atɔfolɛ aleɛ ne siezie, noko menli mɔɔ bɛdole ɛsalɛ bɛvɛlɛle bɛ la ɛnfɛta.+
9 Yemɔti, bɛhɔ sua ne awɔdenle ne mɔ azo, na awie biala mɔɔ bɛkɛnwu ye la bɛdo ɛsalɛ bɛvɛlɛ ye bɛmaa ɔrɛla atɔfolɛlielɛ ne abo.’+
10 Zɔhane ati, ngɛkɛlɛ ne mɔ hɔle awɔdenle ne mɔ azo hɔboɔboale menli mɔɔ bɛnwunle bɛ la anloa, ɛtanevolɛma nee kpalɛma amuala; na menli mɔɔ rale aleɛ ne ɛlilɛ* la yile atɔfolɛlielɛ sua ne tɛkɛɛ.
11 “Mekɛ mɔɔ belemgbunli ne ranleanle nyɛvolɛ ne mɔ la, ɔ nye bɔle nrenyia bie mɔɔ ɔnwula atɔfolɛlielɛ tɛladeɛ ne bie la anwo zo.
12 Yemɔti ɔbizale ye kɛ, ‘Ayi, kɛzi ɛrale ɛke mɔɔ ɛnwula atɔfolɛlielɛ tɛladeɛ ne bie ɛ?’ Ɔdɔle mumule.
13 Akee belemgbunli ne zele ye sonvolɛma ne kɛ, ‘Bɛkyekye ɔ sa nee ɔ gyakɛ na bɛvuandi ye bɛdo alienwo lɔ awozinli ne anu. Ɛkɛ ne a ɔbazu na yeali nyane a.’
14 “Na bɛvɛlɛ menli dɔɔnwo, noko ekyi bie a bɛva bɛ a.”
15 Akee Falasiima ne hɔbɔle kpɔkɛ amaa bɛalua ye ɛdendɛlɛ zo bɛ sa aha ye.+
16 Yemɔti bɛzoanle bɛ ɛdoavolɛma nee Hɛlɔdo eku ne+ anu amra bie wɔ ɔ nwo ɛkɛ ne na bɛhanle kɛ: “Kilehilevolɛ, yɛze kɛ ɛka nɔhalɛ, yɛɛ ɛkilehile Nyamenle adenle ne wɔ nɔhalɛ nu, yɛɛ ɛmkpondɛ awie biala anyunlu ɛlolɛ, ɔluakɛ ɛnnea sonla nyunlu.
17 Yemɔti, ka kile yɛ, kɛzi ɛdwenle nwo ɛ? Asoo mɛla maa adenle* kɛ bɛdua adwule bɛmaa Siza anzɛɛ ɔmmaa adenle?”
18 Noko kɛmɔ Gyisɛse nwunle bɛ adwenle ɛtane ne la ati, ɔhanle kɛ: “Nabalabama, duzu ati a bɛlɛsɔ me bɛanlea ɛ?
19 Bɛva ezukoa ne mɔɔ bɛfa bɛtua adwule ne la bie bɛrahile me.” Bɛvale denale* bɛmaanle ye.
20 Ɔzele bɛ kɛ: “Nwane nvoninli nee ye ngɛlɛlera a le ɛhye?”
21 Bɛhanle kɛ: “Siza ɔ.” Akee ɔzele bɛ kɛ: “Ɛnee bɛva Siza ɛdeɛ bɛmaa Siza na bɛva Nyamenle ɛdeɛ bɛmaa Nyamenle.”+
22 Mekɛ mɔɔ bɛdele ɛhye la, ɔzinle bɛ nwo, na bɛgyakyile ye ɛkɛ ne bɛhɔle.
23 Kenle zɔhane, Sadusiima mɔɔ bɛka kɛ ewudwazo+ ɛnle ɛkɛ ne la rale ɛkɛ na bɛbizale ye kɛ:+
24 “Kilehilevolɛ, Mosisi hanle kɛ: ‘Saa nrenyia bie wu na ɔnlɛ mralɛ a, ɔwɔ kɛ ɔ diema nrenyia gya ɔ ye ne na ɔ nee ye wo mralɛ maa ɔ diema ne.’+
25 Ɛnee mediema mrenyia nsuu bie wɔ yɛ nwo ɛke. Mɔɔ limoa la gyale raalɛ na ɔ nee ye anwo yɛɛ ɔwule a, yemɔti ɔgyakyile ɔ ye ɔmaanle ɔ diema.
26 Edwɛkɛ ko ne ala dole mɔɔ tɔ zo nwiɔ nee nsa ne too ɔhɔdwule nsuu ne amuala anwo zo.
27 Nzinlii raalɛ ne wule.
28 Ɔti ewudwazo ne anu, menli nsuu ne anu boni a raalɛ ne bayɛ ɔ ye a? Ɔluakɛ bɛ muala bɛgyale ye bie.”
29 Gyisɛse buale bɛ kɛ: “Bɛvo, ɔboalekɛ bɛnze Ngɛlɛlera ne anzɛɛ Nyamenle tumi ne;+
30 ɔluakɛ ewudwazo ne anu, mrenyia ɛnrɛgya anzɛɛ bɛnrɛva mraalɛ bɛnrɛmaa agyalɛ, emomu, bɛbayɛ kɛ anwumabɔvolɛma mɔɔ wɔ anwuma la.+
31 Mɔɔ fale mowuamra ewudwazo ne anwo la, asoo bɛtɛkengale mɔɔ Nyamenle hanle hilele bɛ kɛ:
32 ‘Mame a mele Ebileham Nyamenle ne nee Ayezeke Nyamenle ne yɛɛ Gyekɔbo Nyamenle ne’ la ɔ?+ Ɔnle mowuamra Nyamenle, emomu teasema Nyamenle.”+
33 Menli dɔɔnwo ne dele ɛhye la, ye ngilehilelɛ ne yɛle bɛ azibɛnwo.+
34 Mekɛ mɔɔ Falasiima ne dele kɛ yemaa Sadusiima ne ɛha bɛ nloa ɛdo nu la, bɛyɛle ko na bɛrale ɔ nwo ɛkɛ.
35 Na bɛ nuhua ko mɔɔ ze Mɛla ne kpalɛ la zɔle ye nleanle na ɔbizale ye kɛ:
36 “Kilehilevolɛ, Mɛla ne anu boni a le kpole kpalɛ a?”+
37 Ɔzele ye kɛ: “‘Fa wɔ ahonle muala nee wɔ ɛkɛla* muala nee wɔ adwenle muala kulo Gyihova* wɔ Nyamenle ne.’+
38 Ɛhye a le mɛla kpole kpalɛ nee mɔɔ limoa a.
39 Mɔɔ tɔ zo nwiɔ mɔɔ le kɛ ɔdaye la a le ɛhye: ‘Kulo ɛ gɔnwo kɛ ɛ nwo.’+
40 Mɛla nwiɔ ɛhye mɔ azo a Mɛla ne amuala nee Ngapezoma ne gyi a.”+
41 Mɔɔ Falasiima ne anloa yiale la, Gyisɛse bizale bɛ kɛ:+
42 “Adwenle boni a bɛlɛ ye wɔ Kelaese ne anwo a? Nwane ara ɔ?” Bɛzele ye kɛ: “Devidi ɔ.”+
43 Ɔbizale bɛ kɛ: “Ɛnee kɛmɔti a sunsum ne maanle Devidi+ vɛlɛle ye Awulae na ɔhanle kɛ,
44 ‘Gyihova* zele me Awulae kɛ: “Tɛnla me sa fema zo kɔkpula kɛ mebava wɔ agbɔvolɛ meawula ɛ gyakɛ abo” ɛ’?+
45 Yemɔti saa Devidi vɛlɛle ye Awulae a, ɛnee kɛzi ɔyɛ ɔ ra ɛ?”+
46 Na awie biala angola ɔ nloa ye, na ɔvi kenle zɔhane mɔɔ kɔ la, awie biala angola ambiza ye edwɛkɛ bieko.
