Mateyu Edwɛkpa 25:1-46
25 “Akee anwuma Belemgbunlililɛ ne le kɛ mbɛlɛra* bulu mɔɔ vale bɛ ahɛnlaneɛ+ kɛ bɛkayia atɔfolɛ nrenyia ne la.+
2 Ɛnee bɛ nuhua nnu le ahoasea yɛɛ nnu le badwema.*+
3 Ahoasea ne vale bɛ ahɛnlaneɛ noko bɛanva nwole bɛamboka nwo,
4 noko badwema ne mɔ ɛdeɛ, bɛvale nwole bɛguale adoba nu bɛbokale bɛ ahɛnlaneɛ ne anwo.
5 Mekɛ mɔɔ atɔfolɛ nrenyia ne ɛlɛkyɛ la, bɛ muala bɛbɔle ngɔsɔkɛ na bɛlafele.
6 Wɔ nɔe ne, bɛdele kɛ bɛdea nu kɛ: ‘Atɔfolɛ nrenyia ne ɛne! Bɛvinde bɛhɔyia ye.’
7 Akee mbɛlɛra ne mɔ amuala dwazole na bɛzieziele bɛ ahɛnlaneɛ ne mɔ.+
8 Ahoasea ne mɔ zele badwema ne mɔ kɛ, ‘Bɛmaa yɛ bɛ nwole ne bie ɔluakɛ yɛ ahɛnlaneɛ ne kpondɛ anlu.’
9 Badwema ne mɔ buale kɛ: ‘Wɔannea a ɔnrɛza yɛ nee bɛdabɛ. Yemɔti bɛhɔ menli mɔɔ tɔne ye la ɛkɛ bɛhɔdɔ bie.’
10 Mekɛ mɔɔ bɛhɔle kɛ bɛkadɔ bie la, atɔfolɛ nrenyia ne rale. Mbɛlɛra ne mɔ mɔɔ bɛnyia nwolɛ la nee ye hɔle atɔfolɛlielɛ ne abo,+ na bɛdole anlenkɛ ne anu.
11 Nzinlii, mbɛlɛra ne mɔ mɔɔ ɛha la noko rale na bɛhanle kɛ, ‘Yɛmenle, Yɛmenle, buke yɛ!’+
12 Ɔbuale bɛ kɛ, ‘Meka nɔhalɛ ne meahile bɛ, menze bɛ.’
13 “Yemɔti bɛhɔ zo bɛzinza,+ ɔluakɛ bɛnze kenle ne anzɛɛ dɔnehwele ne.+
14 “Na ɔle kɛ nrenyia bie mɔɔ ɛlɛba aradu adenle mɔɔ ɔvɛlɛle ye ngɛkɛlɛ na ɔvale ye agyapadeɛ ɔwulale bɛ sa nu la.+
15 Ɔmaanle ko talɛnte nnu,* ɔmaanle ko nwiɔ, yɛɛ ko noko ɔmaanle ye ko, kɛ mɔɔ biala anwosesebɛ de la, na ɔdule adenle.
16 Ndɛndɛ ne ala, mɔɔ ɔnyianle talɛnte nnu ne la vale hɔyɛle gyima na ɔnyianle nnu ɔbokale nwolɛ.
17 Zɔhane ala a mɔɔ nyianle nwiɔ ne la noko nyianle nwiɔ bokale nwolɛ a.
18 Noko akɛlɛ ne mɔɔ nyianle ko ne la hɔvunle kuma na ɔvale ɔ menle ezukoa ne* ɔveale nu.
19 “Mekɛ tendenle pɛle nu la, ngɛkɛlɛ ne mɔ amenle ne rale na ɔ nee bɛ yɛle mgbonda.+
20 Ɔti mɔɔ nyianle talɛnte nnu ne la vale talɛnte nnu bokale nwo rale na ɔhanle kɛ, ‘Yɛmenle, ɛmaanle me talɛnte nnu; nea, menyia talɛnte nnu meboka nwo.’+
21 Ɔ menle ne zele ye kɛ: ‘Wɔbɔ mɔdenle, akɛlɛ kpalɛ mɔɔ di nɔhalɛ! Ɛlile nɔhalɛ wɔ ninyɛne ekyi bie anu. Mebamaa wɔanlea ninyɛne dɔɔnwo azo.+ Nyia ɛ menle anyelielɛ ne bie.’+
22 Akee mɔɔ nyianle talɛnte nwiɔ ne la rale na ɔhanle kɛ, ‘Yɛmenle, ɛmaanle me talɛnte nwiɔ; nea, menyia talɛnte nwiɔ meboka nwo.’+
23 Ɔ menle ne zele ye kɛ: ‘Wɔbɔ mɔdenle, akɛlɛ kpalɛ mɔɔ di nɔhalɛ! Ɛlile nɔhalɛ wɔ ninyɛne ekyi bie anu. Mebamaa wɔanlea ninyɛne dɔɔnwo azo. Nyia ɛ menle anyelielɛ ne bie.’
24 “Akee akɛlɛ ne mɔɔ nyianle talɛnte ko ne la rale na ɔhanle kɛ: ‘Yɛmenle, meze kɛ wɔ edwɛkɛ yɛ se, ɛleka mɔɔ wɔanlua debie la yɛɛ ɛbu a, na ɛboɔboa ma mɔɔ wɔamkpogya la anloa.+
25 Yemɔti menzulole na menvale wɔ talɛnte ne menveale azɛlɛ bo. Yemɔ ɛne, die wɔ debie.’
26 Ɔ menle ne buale ye kɛ: ‘Akɛlɛ amumuyɛ nee mgbovonle, se ɛze kɛ ɛleka mɔɔ meanlua debie la yɛɛ mebu a, na ma mɔɔ meamkpogya la yɛɛ meboɔboa ɔ nloa a?
27 Yemɔti, anrɛɛ ɔwɔ kɛ ɛfa me ezukoa ne* ɛkɔto bange na meba a meahɔlie me debie nee nwolɛ nvasoɛ.
28 “‘Ɔti, bɛza ye bɛlie talɛnte ne na bɛva bɛmaa mɔɔ lɛ talɛnte bulu ne la.+
29 Ɔluakɛ awie biala mɔɔ ɔlɛ bie la, bɛbamaa ye dɔɔnwo bɛaboka nwo na yeanyia ye molozo. Noko mɔɔ ɛnlɛ bie la, mɔɔ ɔlɛ bɔbɔ la bɛbaza ye bɛalie.+
30 Na bɛvuandi akɛlɛ ne mɔɔ nvasoɛ ɛnle ɔ nwo zo la bɛdo alienwo lɔ awozinli ne anu. Ɛkɛ ne yɛɛ ɔbazu na yeali nyane a.’
31 “Saa sonla Ra ne+ ba wɔ ye anyunlunyia nu mɔɔ ye anwumabɔvolɛma kɔsɔɔti boka ɔ nwo la a,+ ɔbadɛnla aze wɔ ye anyunlunyia belemgbunli ebia ne azo.
32 Bɛbaboɔboa maanle maanle ne amuala anloa wɔ ɔ nyunlu, na ɔbahyɛ menli ne anu nwiɔ kɛ mɔɔ mboaneneavolɛ ye mboane fi mbɔnkye nu la.
33 Na ɔbava mboane ne+ yeagua ɔ sa fema zo na yeava mbɔnkye ne yeagua ye bɛne zo.+
34 “Akee Belemgbunli ne baha ahile bɛdabɛ mɔɔ bɛwɔ ye fema zo la kɛ: ‘Bɛrɛla, bɛmɛ mɔɔ Egya ɛyila bɛ a, bɛva Belemgbunlililɛ ne mɔɔ bɛziezie bɛmaa bɛ ɔvi ewiade mɔlebɛbo ne la.
35 Ɔluakɛ ɛhɔne hunle me na bɛmaanle me debie menlile; nzuhɔne hunle me na bɛmaanle me nzule. Menyɛle ɛyɛvolɛ na bɛliele me kɛnlɛma;+
36 me nwo lale zo* na bɛmaanle me ɛdanlɛ.+ Me nwo dole me na bɛnleanle me. Menlale efiade na bɛrakpɔlale me.’+
37 Na tenlenema ne babua ye kɛ: ‘Awulae, kenlenzu a yɛnwunle wɔ kɛ ɛhɔne ɛlɛku wɔ mɔɔ yɛmaanle wɔ aleɛ, anzɛɛ nzuhɔne ɛlɛku wɔ mɔɔ yɛmaanle wɔ nzule a?+
38 Kenlenzu a yɛnwunle wɔ kɛ ɛle ɛyɛvolɛ mɔɔ yɛliele wɔ kɛnlɛma, anzɛɛ ɛ nwo la zo mɔɔ yɛmaanle wɔ ɛdanlɛ a?
39 Kenlenzu a yɛnwunle wɔ kɛ ɛnde kpɔkɛ anzɛɛ ɛla efiade mɔɔ yɛrakpɔlale wɔ a?’
40 Belemgbunli ne babua bɛ kɛ, ‘Nɔhalɛ nu meka meahile bɛ kɛ, kɛ mɔɔ bɛyɛle bɛmaanle me mediema ngyikyi ɛhye mɔ anu ko la, bɛyɛle bɛmaanle me.’+
41 “Akee ɔbaha yeahile menli mɔɔ wɔ ye bɛne zo la kɛ: ‘Bɛvi me nwo ɛke,+ munzule menli, bɛhɔ senle ne mɔɔ ɛnnu ɛlɛ+ mɔɔ bɛziezie bɛmaa Abɔnsam nee ye anwumabɔvolɛ ne mɔ la anu.+
42 Ɔluakɛ ɛhɔne hunle me, na bɛammaa me ɛhwee meanli; yɛɛ nzuhɔne hunle me, na bɛammaa me ɛhwee meanlo.
43 Menyɛle ɛyɛvolɛ, noko bɛanlie me kɛnlɛma; me nwo lale zo, noko bɛammaa me ɛdanlɛ; me nwo dole me yɛɛ menlale efiade, na bɛamkpo me bo zo.’
44 Na bɛdabɛ noko bɛbabua kɛ: ‘Awulae, kenlenzu a yɛnwunle wɔ kɛ ɛhɔne anzɛɛ nzuhɔne ɛlɛku wɔ anzɛɛ ɛle ɛyɛvolɛ anzɛɛ ɛ nwo la zo anzɛɛ ɛnde kpɔkɛ anzɛɛ ɛla efiade mɔɔ yɛamboa wɔ a?’
45 Akee ɔbabua bɛ kɛ: ‘Nɔhalɛ nu meka meahile bɛ kɛ, kɛ mɔɔ bɛanyɛ bɛammaa me mediema ngyikyi ɛhye mɔ anu ko la, bɛanyɛ bɛammaa me.’+
46 Na ɛhye mɔ bavi ɛkɛ ahɔ dahuu ɛzɛkyelɛ nu,*+ na tenlenema ne ahɔ dahuu ngoane nu.”+
Ɔbodwɛkɛ
^ Anzɛɛ “mbɛlɛra mɔɔ bɛnze mrenyia la.”
^ Anzɛɛ “nrɛlɛbɛvolɛma.”
^ Giliki aneɛ nu, “dwɛtɛ fufule ne.”
^ Giliki aneɛ nu, “dwɛtɛ fufule ne.”
^ Anzɛɛ “meanziezie me nwo kpalɛ.”
^ Giliki aneɛ nu, “bɛbapɛ bɛ bɛavi ɛkɛ ne bɔkɔɔ kɛ mɔɔ bɛpɛ baka ngane la.”
