Mateyu Edwɛkpa 4:1-25
4 Akee sunsum ne vale Gyisɛse hɔle fienemgbole ne anu, na Abɔnsam zɔle ye nleanle.+
2 Ɔhyele ɛhɔne alehyenlɛ nee aledwolɛ kenle 40 ɔwiele la, ɛhɔne hunle ye.
3 Na Sɔneavolɛ+ ne rale ɔ nwo ɛkɛ na ɔzele ye kɛ: “Saa ɛle Nyamenle ara a, ka kile awolɛ ɛhye mɔ maa bɛhakyi paano.”
4 Noko ɔbuale kɛ: “Bɛhɛlɛ kɛ: ‘Tɛ paano angome a maa sonla tɛnla ngoane nu a, emomu edwɛkɛ biala mɔɔ vi Gyihova* anloa anu la noko.’”+
5 Akee Abɔnsam vale ye hɔle suakpole nwuanzanwuanza ne azo,+ na ɔvale ye ɔhɔziele ɛzonlenlɛsua ne ati zo+
6 na ɔzele ye kɛ: “Saa ɛle Nyamenle ara a, fuandi ɛ nwo te aze, ɔluakɛ bɛhɛlɛ kɛ: ‘Ɛdawɔ ti ɔbaha yeahile ye anwumabɔvolɛma ne,’ na ‘Bɛbalɛ wɔ bɛ sa zo, amaa ɛ gyakɛ amkpula bolɛ.’”+
7 Gyisɛse zele ye kɛ: “Eza bɛhɛlɛ kɛ: ‘Mmasɔ Gyihova* wɔ Nyamenle ne ɛnea.’”+
8 Akee Abɔnsam vale ye hɔle boka tendenle bie azo na ɔhilele ye ewiade arelemgbunlililɛ kɔsɔɔti nee nuhua anyunlunyia.+
9 Na ɔzele ye kɛ: “Saa ɛkoto ɛsonle me kokye ala a, mebava ninyɛne ɛhye mɔ amuala meamaa wɔ.”
10 Akee Gyisɛse zele ye kɛ: “Fi ɛke kɔ Seetan! Ɔluakɛ bɛhɛlɛ kɛ: ‘Gyihova* wɔ Nyamenle ne a ɔwɔ kɛ ɛsonle ye a,+ na ɔ ngome ala a ɔwɔ kɛ ɛkoto ye a.’”*+
11 Akee Abɔnsam gyakyile ye hɔle,+ na nea! anwumabɔvolɛma raboale ye.+
12 Mɔɔ ɔdele kɛ bɛhye Dwɔn la,+ ɔvile ɛkɛ ne ɔhɔle Galeli.+
13 Eza mɔɔ ɔvile Nazalɛte la, ɔradɛnlanle Kapɛnayɛm+ ɛnweazo wɔ Zɛbulɛn nee Nafetalae maanzinli ne mɔ anu,
14 amaa mɔɔ bɛluale ngapezonli Ayezaya anwo zo bɛhanle la ara nu kɛ:
15 “O Zɛbulɛn azɛlɛ nee Nafetalae azɛlɛ mɔɔ wɔ nyevile ne anloa adenle ne azo wɔ Dwɔdan ne anzi lɔ, maanle maanle ne mɔ Galeli!
16 Menli mɔɔ de awozinli nu la nwunle wienyi kpole bie, yɛɛ bɛdabɛ mɔɔ bɛwɔ maanzinli mɔɔ ewule alubo ɛheda zo anu la, wienyi+ dale bɛ nwo zo.”+
17 Ɔvi mekɛ zɔhane, Gyisɛse bɔle nolo na ɔhanle kɛ: “Bɛnlu bɛ nwo, ɔluakɛ anwuma Belemgbunlililɛ ne ɛbikye.”+
18 Mɔɔ ɔlua Galeli Nyevile ne anloa la, ɔnwunle mediema nwiɔ bie, Saemɔn mɔɔ bɛfɛlɛ ye Pita la,+ nee ɔ diema Andelu kɛ bɛlɛgua asawu wɔ nyevile ne anu, ɔluakɛ bɛle fɛlɛkyevoma.+
19 Na ɔzele bɛ kɛ: “Bɛdoa me, na mebamaa bɛahye menli kɛ bɛkye fɛlɛ la.”+
20 Ɛkɛ ne ala bɛgyakyile bɛ asawu ne ɛkɛ na bɛdoale ye.+
21 Ɔvile ɛkɛ ne mɔɔ ɔlɛkɔ la, ɔnwunle mediema nwiɔ bieko, Zɛbɛdi ara Gyemise nee ɔ diema Dwɔn.+ Ɛnee bɛ nee bɛ papa Zɛbɛdi de ɛlɛne nu bɛlɛyɛ bɛ avonle boɛ,* na ɔvɛlɛle bɛ.+
22 Ɛkɛ ne ala bɛgyakyile ɛlɛne ne nee bɛ papa ɛkɛ na bɛdoale ye.
23 Akee ɔhɔkpɔsale Galeli amuala,+ ɔhilehilele wɔ bɛ nyianu azua ne mɔ anu+ na ɔbɔle Belemgbunlililɛ ne anwo edwɛkpa ne nolo na ɔyɛle menli mɔɔ anwodolɛ nee ewule ngakyile wɔ bɛ nwo la ayile.+
24 Na bɛdele ɔ nwo edwɛkɛ wɔ Selea amuala, na bɛvale menli mɔɔ ewule ngakyile ɛha bɛ na bɛlɛnwu amaneɛ,+ bɛdabɛ mɔɔ sunsum ɛtane nee mgbutike wɔ bɛ nwo+ nee bɛdabɛ mɔɔ bɛbubu+ la kɔsɔɔti bɛrɛlɛle ye, na ɔyɛle bɛ ayile.
25 Ɛhye ati, menli dɔɔnwo mɔɔ vi Galeli nee Dɛkapɔlese* nee Gyɛlusalɛm nee Dwudiya yɛɛ Dwɔdan ne anzi lɔ la doale ye.
Ɔbodwɛkɛ
^ Anzɛɛ “ɛfa ɛzonlenlɛ nwuanzanwuanza ɛmaa ye a.”
^ Anzɛɛ “bɛlɛsa bɛ avonle.”
^ Anzɛɛ “Azuamgbole Bulu Maanzinli ne anu.”
