Mateyu Edwɛkpa 7:1-29
7 “Bɛgyakyi ndɛnebualɛ+ na bɛambua bɛ ndɛne;
2 ɔluakɛ ndɛne mɔɔ bɛbabua awie mɔ la yɛɛ bɛbava bɛabua bɛ a,+ yɛɛ debie mɔɔ bɛfa bɛsuzu bɛmaa awie mɔ la yɛɛ bɛbava bɛazuzu bɛamaa bɛdabɛ noko a.+
3 Ɛnee duzu ati a ɛnwu baka abonle ekyi ne mɔɔ la ɛ diema anye zo la noko ɛnnwu mgbunla ne mɔɔ la ɛ nye zo la ɛ?+
4 Anzɛɛ kɛzi ɛkola ɛka ɛkile ɛ diema kɛ, ‘Maa menye baka abonle ekyi ne mɔɔ la ɛ nye zo la,’ wɔ mekɛ mɔɔ nea! mgbunla la ɛdawɔ mumua ne ɛ nye zo la ɛ?
5 Nabalabanli! Dimoa ye mgbunla ne fi ɛ nye zo, na wɔanwu kɛzi ɛbaye baka abonle ekyi ne wɔavi ɛ diema ne anye zo la.
6 “Bɛmmafa debie mɔɔ le nwuanzanwuanza la bɛmaa ahwea anzɛɛ bɛmmafuandi bɛ avikpa bɛmaa agbolike,+ amaa bɛantietia zolɛ na bɛampɛ bɛ nwo bɛamboda bɛ.
7 “Bɛhɔ zo bɛbiza, na bɛ sa baha ye;+ bɛhɔ zo bɛkpondɛ, na bɛbanwu ye; bɛhɔ zo bɛbɔ nu, na bɛbabuke bɛ;+
8 ɔluakɛ awie biala mɔɔ kɛbiza la asa ka ye,+ na awie biala mɔɔ kɛkpondɛ la nwu ye, yɛɛ awie biala mɔɔ kɛbɔ nu la, bɛbuke ye.
9 Nɔhalɛ nu, bɛ nuhua boni a, ɔ ra biza ye paano a ɔbamaa ye bolɛ a?
10 Anzɛɛ ɔbiza ye fɛlɛ a, ɔbamaa ye ɛwɔlɛ a?
11 Na saa bɛmɛ bɔbɔ mɔɔ bɛle ɛtanevolɛma la, bɛze kɛzi bɛfa ahyɛlɛdeɛ kpalɛ bɛmaa bɛ mra a, ɛnee fane nyɛ yɛɛ bɛ Ze mɔɔ wɔ anwuma la ɛnrɛva ninyɛne mgbalɛ+ ɛnrɛmaa bɛdabɛ mɔɔ bɛbiza ye la ɛ?+
12 “Yemɔti, debie biala mɔɔ bɛkulo kɛ menli yɛ maa bɛ la, bɛdabɛ noko bɛyɛ ye zɔhane ala bɛmaa bɛ.+ Nɔhalɛ nu, ɛhye a Mɛla ne nee Ngapezoma ne ka a.+
13 “Bɛva anlenkɛ ekyi ne anu,+ ɔluakɛ anlenkɛ kpole ne nee adenle tɛtɛlɛ ne kɔ ɛzɛkyelɛ nu, na menli dɔɔnwo lua nu;
14 noko anlenkɛ ekyi ne nee adenle ɛdenraa ne kɔ ngoane nu, na menli ekyi bie a nwu ye a.+
15 “Bɛnlea bɛ nwo boɛ wɔ adalɛ ngapezoma+ anwo, bɛyɛ bɛ nwo kɛ bɛle mboane,+ noko bɛle kɛ bedi mɔɔ ɛhɔne ɛlɛku bɛ la.+
16 Bɛ ma ne mɔ a bɛbava bɛanwu bɛ a. Bɛntete vanye ma wɔ kolokolonyɛma zo yɛɛ bɛntete feege wɔ evileni zo, ɔnle zɔ ɔ?+
17 Zɔhane ala a baka kpalɛ biala so ma kpalɛ, na baka ɛtane biala so ma ɛtane a.+
18 Baka kpalɛ ɛngola ɛnzo ma ɛtane, yɛɛ baka ɛtane ɛngola ɛnzo ma kpalɛ.+
19 Baka biala mɔɔ ɛnzo ma kpalɛ la bɛpɛ na bɛfa bɛwuda senle.+
20 Yemɔti, bɛ ma ne mɔ a bɛbava bɛanwu bɛ a.+
21 “Tɛ awie biala mɔɔ kɛze me kɛ, ‘Awulae, Awulae,’ la a bahɔ anwuma Belemgbunlililɛ ne anu a, emomu mɔɔ ɔyɛ mɔɔ me Ze mɔɔ wɔ anwuma la kulo la angome a bahɔ nu a.+
22 Kenle zɔhane, menli dɔɔnwo baha ahile me kɛ: ‘Awulae, Awulae,+ asoo yɛanga ngapezo wɔ wɔ duma nu, yɛandu sunsum ɛtane wɔ wɔ duma nu, yɛɛ yɛanyɛ nwanwane gyima dɔɔnwo wɔ wɔ duma nu ɔ?’+
23 Na mebaze bɛ kɛ: ‘Menze bɛ! Bɛvi me nwo ɛke bɛhɔ, bɛmɛ mɔɔ bɛnli mɛla zo a!’+
24 “Yemɔti, awie biala mɔɔ kɛde me edwɛkɛ ɛhye na ɔkɛli zo la le kɛ nrenyia badwema* bie mɔɔ zile ye sua wɔ bodane zo la.+
25 Na ezule dɔle, ɔyile ɔbule aze na anwoma dule bɔle sua ne, noko yeambu, ɔluakɛ bɛzile ye wɔ bodane zo.
26 Bieko, awie biala mɔɔ kɛde me edwɛkɛ ɛhye na ɔnli zo la le kɛ koasea bie mɔɔ zile ye sua wɔ ɛnwea nu la.+
27 Na ezule dɔle, ɔyile ɔbule aze na anwoma dule bɔle sua ne,+ na ɔbule na ɔzɛkyele bɔkɔɔ.”
28 Mɔɔ Gyisɛse hanle edwɛkɛ ɛhye mɔ wiele la, ye ngilehilelɛ ne zinle menli dɔɔnwo ne anwo,+
29 ɔluakɛ ɛnee ɔlɛkilehile bɛ kɛ awie mɔɔ lɛ tumi la,+ na ɔnle kɛ bɛ mɛla kilehilevolɛma ne la.
Ɔbodwɛkɛ
^ Anzɛɛ “nrɛlɛbɛvolɛ.”
