Nahum 1:1-15
1 Nrɛlaleɛ mɔɔ tia Nenɛvɛ:+ Nahum* mɔɔ vi Ɛlekɔhye la ɛnyelɛzodeɛnwunlɛ buluku:
2 Gyihova le Nyamenle mɔɔ ɔkulo kɛ bɛsonle ɔ ngomekye+ yɛɛ ɔdi nzenralɛ;Gyihova di nzenralɛ yɛɛ ɔfa ɛya.+
Gyihova di ye agbɔvolɛ nzenralɛ,Yɛɛ ye ɛya wɔ ye agbɔvolɛ nwo zo.
3 Gyihova kyɛ na yeava ɛya+ yɛɛ ɔlɛ tumi kpole,+Noko Gyihova ɛndwehwenle ɔ bo aze kɛ ɔbava anzohwenlɛ mɔɔ fɛta la yeamaa.+
Ye adenle la anwoma anloa ɛsesebɛ nee ahumu nu,Yɛɛ amungu ne le ɔ gyakɛ abo munlutu.+
4 Ɔtwi nyevile ne anyunlu+ ɔmaa ɔsesa;Yɛɛ ɔmaa azudenle kɔsɔɔti sesa.+
Beehyan nee Kamɛle nwoso,+Yɛɛ Lɛbanɔn felawɔse noko nwoso.
5 Ɔdaye ti awoka kpusu,Yɛɛ awoka ngyikyi kolo.+
Azɛlɛ ne bakpusu wɔ ɔ nyunlu,Ewiade nee bɛdabɛ mɔɔ bɛwɔ nu la amuala.+
6 Nwane a kɛhola ye ɛya ne anyunlu gyinla a?+
Yɛɛ nwane a kɛhola ye ɛya wuluwulu ne* anloa gyinla a?+
Ye ɛya ne bazɔ kɛ senle,Na ɔdaye ti bodane bakpukekpuke.
7 Gyihova le kpalɛ,+ ɔle aranemgbole wɔ anwongyelelɛ kenle nu.+
Ɔze* bɛdabɛ mɔɔ bɛkpondɛ feabelɛ wɔ ye nu la.+
8 Ɔbava azuyilɛ kpole yeazɛkye ye* ɛleka ne bɔkɔɔ,Yɛɛ awozinli bavoa ye kpɔvolɛma.
9 Duzu a bɛbadwenle nwolɛ bɛatia Gyihova a?
Ɔlɛsɛkye ninyɛne bɔkɔɔ.
Anwongyelelɛ ɛnrɛdia zolɛ nwiɔ.+
10 Ɔluakɛ bɛle kɛ mbowule mɔɔ ɛbɛkɛbɛka nu,Eza bɛle kɛ bɛdabɛ mɔɔ bɛbo nza* la;Noko bɛbayela kɛ abɛlɛ dosinli welera.
11 Wɔ ɛkɛ ne a awie mɔɔ dwenle Gyihova anwo adwenle ɛtane la vi bara,Aradu folɛ ɛtane a.
12 Kɛ Gyihova se la ɛne:
“Bɛ nwo yɛ se kpalɛ yɛɛ bɛ nwo zonle ɛdeɛ,Noko bɛbapepɛ bɛ bɛagua na bɛavi ɛkɛ.*
Mehile wɔ* nyane, noko menrɛhile wɔ nyane bieko.
13 Akee mebabubu ye gyɛnvayile ne mɔɔ la ɛ kɔme zo la anu,+Na meade wɔ kyeenyi ne anu nwiɔ.
14 Gyihova ɛha ye wɔ ɛ* nwo kɛ,‘Wɔ duma ɛnrɛdɛnla ɛkɛ ne bieko.
Mebazɛkye ananze mɔɔ bɛze nee mbulalɛ ananze* mɔɔ wɔ bɛ awozonle azua* ne mɔ anu la.
Mebapɛ nla meamaa wɔ, ɔluakɛ ɛle kyibadeɛ.’
15 Nea! Mɔɔ ɛlɛfa edwɛkpa ara la agyakɛ abo wɔ awoka ne mɔ azo,Ahenle mɔɔ ɛlɛbɔ anzodwolɛ nolo la.+
Di wɔ ɛvoyia ne mɔ,+ O Dwuda, ye wɔ ɛwɔkɛ ne mɔ,Ɔluakɛ sonlamgbane ɛnrɛpɛ nu wɔ wɔ avinli bieko.
Bɛbazɛkye ye bɔkɔɔ.”
Ɔbodwɛkɛ
^ Ɔ bo kile “Arɛlekyekyevolɛ.”
^ Hibulu aneɛ nu, “ɛya ne wuluwulu ne.”
^ Anzɛɛ “Ɔnea.”
^ Ɛhye kile, “Nenɛvɛ.”
^ Anzɛɛ “hwiiti nza.”
^ Anzɛɛ ɔkola ɔkile, “na bɛapɛ nu.”
^ Ɛhye kile, Dwuda.
^ Ɛhye kile, Aselea.
^ Anzɛɛ “ananze mɔɔ bɛgua.”
^ Anzɛɛ “ɛzonlenlɛsua.”
