Wulutu 1:1-22
1 Mekɛ mɔɔ ɛnee ndɛnebuavolɛma+ ɛlɛdi tumi* la, ɛhɔne zile Yizilayɛ maanle ne anu; na nrenyia bie nee ɔ ye yɛɛ ɔ mra mrenyia nwiɔ vi Bɛtelɛhɛm+ mɔɔ wɔ Dwuda la hɔdɛnlanle Mowabe+ azɛlɛ zo.*
2 Bɛfɛlɛ nrenyia ne Ɛlemɛlɛke,* bɛfɛlɛ ɔ ye Nawome* yɛɛ bɛfɛlɛ ɔ mra mrenyia nwiɔ ne Maalɔn* nee Kaeleɔn.* Bɛle Ɛfelatema, bɛvi Bɛtelɛhɛm mɔɔ wɔ Dwuda la. Bɛhɔle Mowabe azɛlɛ zo na bɛdɛnlanle ɛkɛ.
3 Mekɛ guale nu la, Nawome ahu Ɛlemɛlɛke wule na ɔhale ye nee ɔ mra mrenyia nwiɔ ne.
4 Nzinlii, ɔ mra ne mɔ gyale Mowabe mraalɛ, bɛfɛlɛ ko Ɔpa, yɛɛ bɛfɛlɛ ko ne noko Wulutu.+ Bɛdɛnlanle ɛkɛ ne kɛyɛ ɛvolɛ bulu.
5 Akee ɔ mra nwiɔ ne, Maalɔn nee Kaeleɔn noko wule na ɔhale raalɛ ne angome, ɔ mra nwiɔ ne nee ɔ hu ɛwu.
6 Yemɔti ɔyɛle kɛ ɔ nee ye ase mɔ fi Mowabe azɛlɛ zo azia ahɔ, ɔluakɛ ɔdele ye wɔ Mowabe kɛ Gyihova ɛhakye ye menli ne na yemaa bɛ aleɛ.*
7 Ɔvile ɛleka mɔɔ ɛnee ɔ nee ye ase mɔ nwiɔ ne de la. Mɔɔ bɛlua adenle nu bɛlɛsia bɛahɔ Dwuda azɛlɛ zo la,
8 Nawome zele ye ase mɔ nwiɔ ne kɛ: “Bɛhɔ, bɛ nuhua ko biala ɛzia ɛhɔ ye mame sua nu. Gyihova ɛla ɛlɔlɛ kpundii ali ɛhile bɛ+ kɛ mɔɔ bɛlale ye ali bɛhilele bɛ hu mɔ mɔɔ bɛwu nee medame la.
9 Gyihova ɛmaa bɛ nuhua ko biala ɛnyia banebɔlɛ* wɔ ɔ hu sua nu.”+ Akee ɔvole bɛ nloa anwo na bɛzunle kpole kpalɛ.
10 Bɛhɔle zo bɛzele ye kɛ: “Kyɛkyɛ, yɛ nee wɔ bahɔ wɔ menli ne anwo lɔ.”
11 Na Nawome hanle kɛ: “Me mra mraalɛ, bɛzia. Duzu ati a ɔwɔ kɛ bɛ nee me kɔ a? Asoo mebahola meawo mralɛ mrenyia bieko mɔɔ bɛbahola bɛarayɛ bɛ hu mɔ ɔ?+
12 Me mra mraalɛ, bɛzia. Bɛhɔ, ɔluakɛ meyɛ kpanyinli somaa kɛ mebahɔ agyalɛ. Saa mebahola meanyia nrenyia ɛnɛ nɔe na meawo mralɛ mrenyia bɔbɔ a,
13 asoo bɛbahɔ zo bɛahendɛ too bɛanyi? Asoo bɛdabɛ ti bɛnrɛhɔ agyalɛ bieko ɔ? Kyɛkyɛ, me mra mraalɛ, medi bɛ nwo nyane kpole, ɔluakɛ Gyihova nee me anli ye boɛ.”+
14 Bɛzunle bieko kpole kpalɛ, ɛhye anzi Ɔpa vole ye ase ne anloa anwo na ɔziale. Noko Wulutu amkponle kɛ ɔkɛzia.*
15 Yemɔti Nawome hanle kɛ: “Nea! Ɛ hola kunlavolɛ ne ɛzia ɛhɔ ye menli ne nee ye nyamenle ne mɔ ɛkɛ. Ɛ nee ɛ hola ne ɛzia ɛhɔ.”
16 Noko Wulutu hanle kɛ: “Mmabodo me kɛ mengyakyi wɔ na memmatoa wɔ; ɔluakɛ ɛleka mɔɔ ɛbahɔ la ɛkɛ ne a mebahɔ a, yɛɛ ɛleka mɔɔ ɛbala la ɛkɛ ne a mebala a. Wɔ menli ne bayɛ me menli na wɔ Nyamenle ne ayɛ me Nyamenle.+
17 Ɛleka mɔɔ ɛbawu la ɛkɛ ne a mebawu a yɛɛ ɛkɛ ne a bɛbazie me a. Kyesɛ ewule na atete yɛ avinli, saa yeamba ye zɔ a, Gyihova ɛdua me kakɛ na ɔgua me bie zo.”
18 Mɔɔ Nawome nwunle kɛ Wulutu anye ɛbolo kɛ ɔ nee ye kɔ la, yeanga ye bieko kɛ ɔzia.
19 Bɛ mu nwiɔ bɛdoale bɛ adendulɛ ne azo too bɛhɔdwule Bɛtelɛhɛm.+ Mɔɔ bɛdwule Bɛtelɛhɛm ala la, bɛdabɛ ti sua ne azo yɛle dede na ɛnee mraalɛ ne mɔ ɛlɛkeha kɛ: “Tɛ Nawome ɛne?”
20 Na ɛnee ɔka ɔkile mraalɛ ne mɔ kɛ: “Bɛmmafɛlɛ me Nawome.* Bɛvɛlɛ me Meela,* ɔluakɛ Tumivolɛ Bedevinli ne ɛmaa ɛbɛlabɔlɛ ɛyɛ ɛnwonle kpalɛ ɛmaa me.+
21 Mekɔ la ɛnee me sa ɛyi, noko Gyihova ɛmaa meva me sa mgbane mezia. Duzu ati a ɔwɔ kɛ bɛfɛlɛ me Nawome wɔ mekɛ mɔɔ Gyihova a ɛdwazo ɛtia me na Tumivolɛ Bedevinli ne ɛmaa esiane ɛdo me la ɛ?”+
22 Kɛ ɔyɛle mɔɔ Nawome nee ye ase Mowabenli Wulutu vi Mowabe+ azɛlɛ zo ziale rale la ɛne. Bɛrale Bɛtelɛhɛm wɔ mekɛ mɔɔ ɛnee bɛbɔ ɔ bo bɛlɛte baale* la.+
Ɔbodwɛkɛ
^ Hibulu aneɛ nu, “bua ndɛne.”
^ Anzɛɛ “maanzinli nu.”
^ Ɔ bo kile “Me Nyamenle Ne Le Belemgbunli.”
^ Ɔ bo kile “Me Fɛlɛkolilɛ.”
^ Ɔbayɛ kɛ ɔvi Hibulu edwɛkɛkpɔkɛ mɔɔ kile “ɛyɛ bɛtɛɛ; ɛnde kpɔkɛ” la anu.
^ Ɔ bo kile “Awie Mɔɔ Ɛlɛwu.”
^ Hibulu aneɛ nu, “paano.”
^ Hibulu aneɛ nu, “ɛnyia ɛnwomenlelielɛ ɛleka.”
^ Hibulu aneɛ nu, “betanle ye.”
^ Ɔ bo kile “Me Fɛlɛkolilɛ.”
^ Ɔ bo kile “Ɛnwonle.”
^ Baale le kɛ awule la.
