Wulutu 2:1-23
2 Ɛnee Nawome ɔ hu busuanli bie mɔɔ ɛnyia ɔ nwo kpole kpalɛ la wɔ ɛkɛ; bɛfɛlɛ ye Bowaze,+ na ɔvi Ɛlemɛlɛke abusua ne anu.
2 Mowabenli Wulutu zele Nawome kɛ: “Mesɛlɛ wɔ, maa mengɔ ɛya ne mɔ anu mengɔnli awie mɔɔ kɛze me anwunvɔne la anzi mensesa ma mɔɔ bɛkɛpɛ la abo zo ne.”+ Yemɔti Nawome zele ye kɛ: “Me ra raalɛ, kɔ.”
3 Ɔti ɔhɔle na ɔhɔlile gyimayɛvoma ne anzi na ɔbɔle ɔ bo kɛ ɔsesa ma bo zo. Na ɔrale ye kɛ ɔhɔvindele ɛya bie mɔɔ le Bowaze+ mɔɔ vi Ɛlemɛlɛke+ abusua nu la ɛdeɛ la anu.
4 Yeangyɛ Bowaze vi Bɛtelɛhɛm rale na ɔzele gyimayɛvoma ne kɛ: “Gyihova nee bɛ ɛdɛnla.” Na bɛbuale ye kɛ: “Gyihova ɛyila wɔ.”
5 Akee Bowaze bizale kpavolɛ ne mɔɔ nea gyimayɛvoma ne anwo zo la kɛ: “Abusua boni anu a bɛlɛra ɛhye vi a?”
6 Kpavolɛ ne mɔɔ nea gyimayɛvoma ne anwo zo la buale kɛ: “Bɛlɛra ne le Mowabenli+ na ɔ nee Nawome vi Mowabe+ azɛlɛ zo a rale a.
7 Ɔhanle kɛ, ‘Mesɛlɛ wɔ, mebahola measesa ma ne abo zo+ nee ma* mɔɔ gyimayɛvoma ne ɛgyakyi ye bɛ nzi la bie ɔ?’ Na sumunli nwonlomɔ ye mɔɔ ɔrale la yeyɛ gyima dedee, kɛkala a yehɔdɛnla kpɔda ne abo kɛ ɔdie ɔ menle ekyii a.”
8 Akee Bowaze zele Wulutu kɛ: “Tie, me ra raalɛ. Mmakɔsesa ma bo zo wɔ ɛya fofolɛ nu, yɛɛ mmakɔ ɛleka gyɛne; di me mbɛlɛra ne mɔ anzi.+
9 Nea ɛleka mɔɔ bɛlɛte ma ne la boɛ na di bɛ nzi. Meha mehile mgbavolɛ ne mɔ kɛ bɛmmafa bɛ sa bɛka wɔ.* Saa nzuhɔne ɛlɛku wɔ a, kɔnlo nzule ne mɔɔ mgbavolɛ ne mɔ ɛza ɛgua buakɛ ne anu la bie.”
10 Wulutu hotole na ɔbutule ɔ nyunlu aze na ɔzele ye kɛ: “Duzu ati a menyia ɛ nyunlu ɛlolɛ ɛ, yɛɛ duzu ati a wɔdwenle me nwo zɛhae, wɔ mekɛ mɔɔ mele ɛyɛvolɛ la ɛ?”+
11 Bowaze buale ye kɛ: “Bɛha mɔɔ wɔyɛ wɔmaa wɔ ase ɔvi mekɛ mɔɔ ɛ hu wule nee kɛ wɔzi wɔgyakyi wɔ papa nee wɔ mame yɛɛ maanle mɔɔ wɔ mbusuafoɔ vi nu na wɔra menli mɔɔ ɛnze bɛ avinli la amuala bɛhile me.+
12 Gyihova ɛyila wɔ wɔ mɔɔ wɔyɛ la anwo,+ eza Gyihova, Yizilayɛma Nyamenle ne mɔɔ wɔarakpondɛ ɛvealeka wɔ ɔ ndɛba abo la+ ɛmaa wɔ ahatualɛ mɔɔ di munli la.”*
13 Ɔbuale ye kɛ: “Maa menyia ɛ nyunlu ɛlolɛ, me menle, ɔluakɛ wɔkyekye me rɛle na wɔha edwɛkɛ kpalɛ wɔhile wɔ sonvolɛ,* wɔ mekɛ mɔɔ memboka wɔ sonvolɛma ne anwo bɔbɔ la.”
14 Ɔdwule aleɛlilɛ mekɛ la, Bowaze zele ye kɛ: “Bɛla ɛke, di paano ne bie na fa wɔ paano sinli ne bɔ nza nyinyialera ne anu.” Ɔti ɔdɛnlanle gyimayɛvoma ne anwo ɛkɛ. Akee ɔmaanle ye ma ne mɔɔ bɛhyehye la bie, ɔlile na ɔ ko yile, na bie hale.
15 Mɔɔ ɔdwazole kɛ ɔsesa ma ne abo zo la,+ Bowaze zele ye mgbavolɛ ne mɔ kɛ: “Bɛmaa ɔsesa ma ne mɔɔ bɛboɔboa ɔ nloa bɔbɔ la* bie, na bɛmmagyegye ye.+
16 Eza ɔwɔ kɛ bɛtwehwe mɔɔ bɛkyekye bɛ avile avile la bie bɛgua aze bɛmaa ɔsesa, na bɛmmaka edwɛkɛ biala bɛmaa ɔgyakyi.”
17 Yemɔti ɔdoale zo ɔsesale ma too ɔhɔdwule nɔsolɛ nu.+ Mɔɔ ɔbolole mɔɔ ɔsesale la, ɔnyianle baale kɛyɛ yifa* ko.
18 Akee ɔvale ɔhɔle sua zo, na ye ase ne nwunle ma ne mɔɔ yehɔsesa la. Wulutu eza vale aleɛ ne mɔɔ ɔlile na ɔ ko yile la mɔɔ hale la+ ɔmaanle ye.
19 Ye ase ne zele ye kɛ: “Nienwu a ɛhɔsesale ma ne ɛnɛ a? Nienwu a ɛyɛle gyima a? Nyilalɛ ɛha ahenle mɔɔ lale ahunlunyele ali hilele wɔ la.”+ Ɔti ɔhanle ahenle mɔɔ ɔ nee ye yɛle gyima la anwo edwɛkɛ ɔhilele ye ase ne, ɔse: “Bɛfɛlɛ nrenyia ne mɔɔ me nee ye yɛle gyima ɛnɛ la Bowaze.”
20 Ɔti Nawome zele ye ase ne kɛ: “Gyihova mɔɔ da ɛlɔlɛ kpundii ali kile anyewɔzoamra nee mowuamra la ɛyila ye.”+ Nawome doale zo kɛ: “Nrenyia ne le yɛ busuanli.+ Ɔboka yɛ koliagyama ne anwo.”*+
21 Akee Mowabenli Wulutu hanle kɛ: “Eza ɔzele me kɛ, ‘Di me mgbavolɛ ne mɔ anzi kɔkpula kɛ bɛbawie me ma ne amuala te la.’”+
22 Nawome zele ye ase Wulutu kɛ: “Me ra raalɛ, ɔle kpalɛ kɛ ɛbali ye mbɛlɛra ne mɔ anzi tɛla kɛ ɛbahɔ ɛya fofolɛ nu na bɛagyegye wɔ la.”
23 Ɔti ɔlile Bowaze mbɛlɛra ne mɔ anzi ɔsesale ma too bɛdele baale+ nee hwiiti ne bɛwiele. Na ɔhɔle zo ɔ nee ye ase ne dɛnlanle.+
Ɔbodwɛkɛ
^ Anzɛɛ ɔkola ɔkile, “ma ne mɔɔ bɛkyekye ye avile avile.”
^ Anzɛɛ “bɛmmagyegye wɔ.”
^ Anzɛɛ “ahatualɛ mɔɔ fɛta bɔkɔɔ la.”
^ Hibulu aneɛ nu, “wɔdendɛ wɔhile wɔ sonvolɛ ahonle.”
^ Anzɛɛ ɔkola ɔkile, “ma ne mɔɔ bɛkyekye ye avile avile la.”
^ Anzɛɛ “ɔle yɛ mbusuafoɔ mɔɔ bɛkola bɛkpɔne (bɛdie) yɛ la anu ko.”
