Wulutu 3:1-18
3 Akee ye ase Nawome zele ye kɛ: “Me ra raalɛ, asoo ɔnle kɛ mekpondɛ awuke* memaa wɔ+ amaa yeawie wɔ boɛ ɔ?
2 Asoo Bowaze ɛnle yɛ busuanli ɔ?+ Ye mbɛlɛra ne mɔ a ɛnee ɛ nee bɛ ɛlɛyɛ gyima la. Nɔsolɛ, ɔbakpogya baale wɔ ma ɛwosolɛ ɛleka ne.
3 Yemɔti bia ɛ nwo na fa nwole evuanlɛ kpokpa; akee siezie ɛ nwo* na kɔ ma ɛwosolɛ ɛleka ne. Mmamaa nrenyia ne nwu kɛ wɔra ɛkɛ kɔkpula kɛ ɔbali aleɛ na yeanlo nza yeawie la.
4 Saa ɔda a, yɛ ɛleka mɔɔ ɔbala la nzonlɛ; akee kɔye ɔ gyakɛ anwo ɛdanlɛ ne na da ɛkɛ. Ɔbaha mɔɔ ɔwɔ kɛ ɛyɛ la yeahile wɔ.”
5 Zɔhane ati ɔbuale ye kɛ: “Mebayɛ mɔɔ wɔha wɔhile me la amuala.”
6 Yemɔti ɔhɔle ma ɛwosolɛ ɛleka ne na ɔyɛle mɔɔ ye ase hanle hilele ye kɛ ɔyɛ la amuala.
7 Zɔhane mekɛ ne, Bowaze lile debie na ɔnlonle nza na ɔ nye liele. Akee ɔhɔlale ma ne mɔɔ bɛhuohua la anwo ɛkɛ. Ɛhye anzi, Wulutu yɛle nyaa nyaa hɔle ɔ nwo ɛkɛ, ɔyele ɔ gyakɛ anwo ɛdanlɛ ne na ɔlale ɛkɛ.
8 Wɔ nɔe ne,* ɛyɛlɛ hunle nrenyia ne, yemɔti ɔmaanle ɔ ti zo na ɔnwunle kɛ raalɛ bie la ɔ gyakɛ anu.
9 Ɔhanle kɛ: “Ɛdawɔ nwane ɔ?” Ɔbuale kɛ: “Medame, wɔ sonvolɛ Wulutu ɔ. Twe wɔ ɛdanlɛ* ne bie gua wɔ sonvolɛ anwo zo ɔluakɛ ɛle koliagya.”+
10 Zɔhane ati ɔhanle kɛ: “Gyihova ɛyila wɔ, me ra raalɛ. Wɔla wɔ ɛlɔlɛ kpundii ne ali kpole wɔ deɛ ɛhye mɔɔ li awieleɛ mɔɔ wɔyɛ la anu wɔdɛla alimoa ɛdeɛ ne,+ ɔluakɛ wɔandoa mgbavolɛ ne mɔ, kɛ bɛle ehyiavolɛma anzɛɛ sukoavolɛma la.
11 Noko kɛkala me ra raalɛ, mmasulo. Mebayɛ debie biala mɔɔ wɔha la meamaa wɔ,+ ɔluakɛ awie biala mɔɔ wɔ suakpole ye azo la* ze kɛ ɛle raalɛ kpalɛ.
12 Ɔle nɔhalɛ kɛ mele koliagya ɛdeɛ,+ noko koliagya mɔɔ bikye bɛ kpalɛ tɛla me la wɔ ɛkɛ.+
13 Da ɛke ɛnɛ nɔe, na saa aleɛ kye na ɔbalie wɔ a, edwɛkɛ kpalɛ ɔ! Maa ɔlie wɔ.+ Noko saa ɔngulo kɛ ɔyɛ a, wɔ mekɛ ala mɔɔ Gyihova de aze la, yemɔ mebalie wɔ. Da ɛke maa aleɛ ɛhye.”
14 Yemɔti ɔlale ɔ gyakɛ anu ɛkɛ ne too nwonlomɔ, na ɔdwazole wɔ mekɛ mɔɔ ɛnee maanle nu ɛtɛtetele la amaa awie annwu ye. Akee Bowaze hanle kɛ: “Mmamaa awie nwu ye kɛ raalɛ rale ma ɛwosolɛ ɛleka ne.”
15 Eza ɔhanle kɛ: “Fa wɔ ɛdanlɛ ne mɔɔ gua ɛ nwo la bɛla na tɛlɛ nuhua.” Yemɔti ɔdɛlɛle nuhua, na ɔzule baale ɛzuzudeɛ nsia* ɔguale nu na ɔvale ɔzoale ye. Ɛhye anzi Bowaze hɔle suakpole ne azo.
16 Wulutu ziale hɔle ye ase anwo lɔ, na ɔbizale ye kɛ: “Me ra raalɛ, kɛ ninyɛne hɔle ye maanle wɔ ɛ?”* Ɔhanle debie biala mɔɔ nrenyia ne yɛle maanle ye la ɔhilele ye ase.
17 Ɔvale ɔdoale zo kɛ: “Ɔzuzule baale ɛzuzudeɛ nsia ɛhye ɔmaanle me na ɔzele me kɛ, ‘Mmafa ɛ sa mgbane ɛsia ɛkɔ wɔ ase anwo lɔ.’”
18 Zɔhane ati ɔhanle kɛ: “Me ra raalɛ, tɛnla ɛke kɔkpula kɛ ɛbanwu kɛzi edwɛkɛ ne bahɔwie ye la, ɔluakɛ nrenyia ne babɔ mɔdenle biala ali* edwɛkɛ ne anwo gyima ɛnɛ.”
Ɔbodwɛkɛ
^ Hibulu aneɛ nu, “ɛnwomenlelielɛ ɛleka.”
^ Anzɛɛ “fa wɔ tɛladeɛ aguzo ne wula.”
^ Anzɛɛ “alevinli mu nwiɔ avinli.”
^ Anzɛɛ “ɛdanlɛ ne anloa.”
^ Hibulu aneɛ nu, “me menli ne anlenkɛ kpole ne amuala.”
^ Hibulu aneɛ nu, “Ɛdawɔ nwane ɔ?”
^ Hibulu aneɛ nu, “nrenyia ne ɛnrɛlie ɔ menle kɔkpula kɛ ɔbali.”
