Wulutu 4:1-22
4 Akee Bowaze hɔle suakpole ne anlenkɛ kpole ne anloa+ na ɔdɛnlanle ɛkɛ. Na nea! koliagya ne mɔɔ Bowaze hanle ɔ nwo edwɛkɛ la+ pɛle nu wɔ ɛkɛ. Na Bowaze hanle kɛ: “Asomasi, bɛla ɛke badɛnla aze.” Yemɔti ɔhɔle ɛkɛ na ɔdɛnlanle aze.
2 Bowaze vɛlɛle suakpole ne azo mgbanyima+ bulu na ɔzele bɛ kɛ: “Bɛdɛnla aze.” Yemɔti bɛdɛnlanle aze.
3 Akee Bowaze hanle hilele koliagya ne+ kɛ: “Ɔwɔ kɛ Nawome, mɔɔ vi Mowabe+ azɛlɛ zo ɛzia ɛra la tɔne azɛlɛ ne mɔɔ le yɛ diema Ɛlemɛlɛke ɛdeɛ la.+
4 Yemɔti menzuzule kɛ ɔwɔ kɛ memaa ɛte na mese wɔ kɛ, ‘Tɔ azɛlɛ ne wɔ menli ne nee me menli ne mgbanyima ne mɔ anye zo.+ Saa ɛbadɔ a, tɔ.* Noko saa ɛnrɛdɔ a, ka kile me maa menwu ye, ɔluakɛ wɔmɔ a ɛlɛ nwolɛ adenle ɛtɔ a, yɛɛ medame a meli ɛ nzi a.’” Ɔbuale kɛ: “Mekulo kɛ metɔ.”+
5 Bowaze akee hanle kɛ: “Kenle mɔɔ ɛbadɔ azɛlɛ ne wɔavi Nawome ɛkɛ ne la, ɔwɔ kɛ eza ɛtɔ ɛfi Mowabenli Wulutu, nrenyia ne mɔɔ ɛwu la aye ne ɛkɛ, amaa nrenyia ne mɔɔ ɛwu la duma amminli anvi ye agyapadeɛ ne anwo.”+
6 Ɛhye ati koliagya ne hanle kɛ: “Menrɛhola menrɛdɔ, ɔluakɛ bie a mebazɛkye me agyapadeɛ ɛdeɛ ne. Ɛdawɔ tɔ, memaa wɔ nwolɛ adenle, ɔluakɛ menrɛhola menrɛdɔ.”
7 Wɔ tete Yizilayɛ, saa awie lɛ adenle di agya anzɛɛ awie ɛlɛfa debie mɔɔ le ye ɛdeɛ la amaa awie gyɛne a, amaamuo mɔɔ ɛnee bɛbu amaa edwɛkɛ ne ali munli la ɛne: Ɔwɔ kɛ sonla zɔhane ye ye mgbɔlaboa+ maa ahenle mɔɔ ɔ nee ye ɛlɛyɛ ngyehyɛleɛ ne la, na ɛhye a ɛnee le debie mɔɔ bɛyɛ bɛkye ngyehyɛleɛ* bie abo wɔ Yizilayɛ a.
8 Yemɔti mɔɔ koliagya ne hanle hilele Bowaze kɛ, “Ɛdawɔ tɔ” la, ɔyele ye mgbɔlaboa ne.
9 Akee Bowaze zele mgbanyima ne mɔ nee menli ne amuala kɛ: “Ɛnɛ, bɛdi daselɛ+ kɛ melɛtɔ debie biala mɔɔ le Ɛlemɛlɛke nee Kaeleɔn yɛɛ Maalɔn ɛdeɛ la meavi Nawome ɛkɛ.
10 Eza melɛfa Mowabenli Wulutu, Maalɔn aye ne meayɛ me ye amaa nrenyia ne mɔɔ ɛwu la duma amminli anvi ye agyapadeɛ ne anwo,+ na bɛanye nrenyia ne mɔɔ ɛwu la duma bɛanvi ye abusua nee suakpole ne azo amra avinli. Bɛdi nwolɛ daselɛ ɛnɛ.”+
11 Ɛhye ati, menli mɔɔ ɛnee wɔ suakpole ne anlenkɛ kpole ne anloa la kɔsɔɔti nee mgbanyima ne mɔ hanle kɛ: “Yɛle alasevolɛ! Gyihova ɛmaa ɛ ye ne mɔɔ ɛlɛba wɔ sua nu la ɛyɛ kɛ Relahyɛle nee Liya mɔɔ bɛ mu nwiɔ bɛkyekyele Yizilayɛ sua ne la.+ Ɔwie wɔ boɛ wɔ Ɛfelata+ na nyia duma kpalɛ* wɔ Bɛtelɛhɛm.+
12 Ralɛ mɔɔ Gyihova balua bɛlɛra ɛhye anwo zo ava amaa wɔ la+ ɛmaa wɔ sua nu ɛyɛ kɛ Pilɛze+ mɔɔ Teemaa wole ye maanle Dwuda la sua nu.”
13 Yemɔti Bowaze vale Wulutu yɛle ɔ ye. Ɔ nee ye lale, na Gyihova maanle ɔnrenzɛle na ɔwole ralɛ nrenyia.
14 Akee mraalɛ ne mɔ hanle hilele Nawome kɛ: “Ayɛlɛyelɛ ɛha Gyihova mɔɔ yemaa wɔnyia koliagya ɛnɛ la. Bɛbɔ ye duma ne nolo wɔ Yizilayɛ!
15 Kakula* ɛhye ɛmaa wɔnyia ngoane* bieko na ɔbaboa wɔ, wɔ wɔ mrelera nu, ɔluakɛ wɔ ase ne mɔɔ kulo wɔ+ na ɔsonle bolɛ ɔmaa wɔ ɔtɛla mralɛ mrenyia nsuu la a ɛwo ye a.”
16 Nawome liele kakula ne na ɔvale ye ɔbɔle ye ɛbolɛ, na ɔdaye a ɔnleanle ye a.
17 Akee mraalɛ mɔɔ de kpalɛ ne azo la maanle ye duma. Bɛhanle kɛ, “Bɛwo ralɛ nrenyia bɛmaa Nawome,” na bɛdonle ye duma Obɛde.+ Ɔdaye a ɔwole Devidi papa Gyɛsi+ a.
18 Pilɛze+ abusua ɛlɔnwɔne ne* ɛne: Pilɛze wole Hɛzelɔn;+
19 Hɛzelɔn wole Relam; Relam wole Amenadabe;+
20 Amenadabe+ wole Nahyɔn; Nahyɔn wole Salemɔn;
21 Salemɔn wole Bowaze; Bowaze wole Obɛde;
22 Obɛde wole Gyɛsi;+ yɛɛ Gyɛsi wole Devidi.+
Ɔbodwɛkɛ
^ Hibulu aneɛ nu, “ɛbali agya ne a.”
^ Anzɛɛ “nɔhalɛ edwɛkɛ.”
^ Hibulu aneɛ nu, “bɛbɔ wɔ duma.”
^ Ɛhye kile, Nawome anlɔnra ne.
^ Anzɛɛ “ɛkɛla.”
^ Hibulu aneɛ nu, “awolɛndoazo ne mɔ.”
