Baebolo Nwuanzanwuanza ne le Nyamenle edwɛkɛ mɔɔ bɛhɛlɛ bɛmaa yɛ muala a. Ɔwɔ kɛ yɛsukoa na yɛnwu ye Kɛlɛvolɛ ne. (Dwɔn 17:3; 2 Timote 3:16) Gyihova maa yɛnwu bodane mɔɔ ɔlɛ ɔmaa alesama nee azɛlɛ ye mɔɔ le bɛ sua nu la wɔ nu.—Gyɛnɛsese 3:15; Yekile 21:3, 4.

Buluku gyɛne biala ɛnle ɛkɛ mɔɔ ka menli ɛbɛlabɔlɛ zɛhae a. Baebolo ne ka yɛ maa yɛda Nyamenle subane mɔɔ le ɛlɔlɛ, anwunvɔnezelɛ nee ahunluyelɛyelalɛ la ali. Ɔmaa anyelazo, na ɔboa menli ɔmaa bɛgyinla amaneɛnwunlɛ mɔɔ anu yɛ se kpalɛ bɔbɔ la anloa. Na ɔkɔ zo ɔmaa yɛnwu ewiade ɛhye anu ninyɛne mɔɔ nee Nyamenle ɛhulolɛdeɛ ne mɔɔ di munli la ɛnle ko la.—Edwɛne 119:105; Hibuluma 4:12; 1 Dwɔn 2:15-17.

Bɛhile Baebolo ne mɔɔ bɛlimoale bɛhɛlɛle ye wɔ Hibulu, Elam aneɛ yɛɛ Giliki nu la amuala anzɛɛ ye foa bie abo bɛhɔ aneɛ mɔɔ bo 3,000 la anu. Yemɔ a le buluku mɔɔ bɛhile ɔ bo na bɛva dɔɔnwo bɛmaa wɔ tetedwɛkɛ nu a. Kɛ ɔwɔ kɛ ɔba ye la ɛne. Baebolo ngapezo ka kɛ: “Bɛbabɔ Belemgbunlililɛ ne anwo edwɛkpa ɛhye [edwɛkɛ titili mɔɔ wɔ Baebolo ne anu la] nolo wɔ azɛlɛ ye azo amuala bɛava bɛali maanle maanle ne amuala daselɛ, kolaa na awieleɛ ne ara.”—Mateyu 24:14.

Kɛmɔ yɛnwu kɛ Baebolo ne anu edwɛkɛ ne anwo hyia la ati, yɛ bodane a le kɛ yɛyɛ Baebolo mɔɔ nuhua edwɛkɛ ne le nɔhalɛ kɛ mɔlebɛbo ɛdeɛ ne na eza nuhua la ɛkɛ mɔɔ ye ɛgengalɛ ɛnyɛ se a. Mokanwo edwɛkɛ “Baebolo Ngilebɛbo Nwo Ngyinlazo,” “Ninyɛne Mɔɔ Wɔ Baebolo Ɛhye Anu La” nee “Kɛ Ɔyɛle Mɔɔ Yɛnyianle Baebolo Ne La” ka Baebolo ngilebɛbo nwo ngyinlazo bie mɔ mɔɔ yɛvale yɛlile gyima nee ninyɛne gyɛne mɔɔ wɔ Baebolo ɛhye anu la anwo edwɛkɛ.

Menli mɔɔ kulo Gyihova Nyamenle na bɛsonle ye la kulo Nyamenle Edwɛkɛ ne mɔɔ bɛhile ɔ bo kpalɛ na ndelebɛbo wɔ nu la. (1 Timote 2:4) Ɛhye ati a yɛyɛ Baebolo ɛhye wɔ Nzema nu a, amaa bodane mɔɔ yɛlɛ kɛ yɛkile Ewiade Fofolɛ Ngilebɛbo ne abo yɛahɔ aneɛ dɔɔnwo anu la ara nu. Kengavolɛ, yɛ anyelazo nee yɛ asɔneyɛlɛ a le kɛ, Ngɛlɛlera Nwuanzanwuanza ɛhye baboa wɔ wɔ mekɛ mɔɔ ɛlɛbɔ mɔdenle ‘wɔakpondɛ Nyamenle abo zo kɔkpula kɛ ɛkɛnwu ye’ la.—Gyima ne 17:27.