Ngyegyelɛ mɔɔ konle ɛva ɛra la le kpole.

•   “Kakɛ mɔɔ arane mɔɔ wɔ ewiade amuala la bɔle ye wɔ konle ngakyile nwo la dwule dɔla 2.2 trillion.”​—The Washington Post, February 13, 2024.

 Ngyegyelɛ ne ɛnle ezukoa angomekye. Suzu neazo kokye anwo nea: Ukraine konle ne.

•   Sogyama. Bɛbu mgbonda kɛ sumunli kɛ konle ne bɔle ɔ bo ɛvolɛ nwiɔ mɔɔ ɛze ɛhɔ la sogyama kɛyɛ 500,000 ɛwu anzɛɛ ɛbodɛboda.

•   Maanlema. United Nations mgbondabulɛ kile kɛ menli mɔɔ bo 28,000 la ɛwu anzɛɛ ɛbodɛboda. Noko, UN kpanyinli ko hanle kɛ: “Bɛnrɛhola bɛnrɛbu menli dodo mɔɔ konle ɛhye ɛmaa bɛwu la anwo mgbonda fɔɔnwo.” a

 Konle ngakyile mɔɔ ɛlɛkɔ zo wɔ ewiade ye la ɛmaa menli ɛnwu amaneɛ kpole.

•   Menli mgbe 114. Ɔkadwu September 2023 la, ɛnee ɛhye a le menli dodo mɔɔ konle nee basabasayɛlɛ ɛmaa bɛdu bɛvi ɛleka mɔɔ bɛwɔ la a.

•   Menli mgbe 783. Ɛhye a le menli dodo mɔɔ bɛnnyia aleɛ mɔɔ sa bɛ la bɛnli a. “Konle a maa ɛhɔne ku menli dɔɔnwo a, menli mɔɔ ɛhɔne ku bɛ wɔ ewiade la anu ɛya ko ngyɛnu abulasuu wɔ ɛleka mɔɔ konle nee basabasayɛlɛ ɛlɛkɔ zo la.”​—World Food Programme.

 Asoo konle bara awieleɛ kenle bie? Asoo anyelazo wɔ ɛkɛ ne kɛ yɛbanyia anzodwolɛ? Asoo mekɛ bara mɔɔ menli ɛnrɛli ehyia, emomu awie biala banyia aleɛ mɔɔ wɔ azɛlɛ ye azo la bie ali na ɔ ko ayi ɔ? Duzu a Baebolo ne ka a?

 Baebolo ne hanle dole ɛkɛ ne kɛ konle babu azɛlɛ ye azo, ɔhanle nwolɛ edwɛkɛ kɛ ɔnwunle kɛ awie bie de ɛkpɔnwɔ zo.

•   “Ɛkpɔnwɔ kɔkɔlɛ bie noko rale, na bɛmaanle ahenle mɔɔ de zo la adenle kɛ ɔye anzodwolɛ ɔvi azɛlɛ ye azo amaa bɛahuhu bɛ nwo, na bɛmaanle ye konle dadeɛ kpole bie.”​—Yekile 6:4.

 Ɛkpɔnwɔkavoma nwiɔ li sɛkɛlɛneɛ adenle zo ɛkpɔnwɔ ne anzi na bɛgyi ɛkɛ ne bɛmaa ɛhɔne nee ewule mɔɔ ewulenzane yɛɛ ninyɛne gyɛne fa ba la. (Yekile 6:5-8) Amaa wɔazukoa Baebolo ngapezo ɛhye anwo edwɛkɛ dɔɔnwo na wɔanwu ye kɛ ɔlɛba nu wɔ yɛ mekɛ ye azo la, kenga edwɛkɛ “Mgbɔnwɔkavoma Nna Ne​​—Bɛmɛ A Le Nwane Mɔ?”

 Ɔnrɛhyɛ biala, bɛnrɛva ezukoa mɔɔ bɛnyia ye wɔ ewiade la bɛnrɛhɔ konle bieko. Noko, tɛ sonla mɔdenlebɔlɛ a bayɛ ɛhye a. Baebolo ne ka kɛ:

•    

•   ‘Ɔbakyikyi bɛ nye anwo monle kɔsɔɔti, na ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko. Alimoa ninyɛne ne ɛpɛ nu.’​—Yekile 21:4.

•   “Me menli ne badɛnla anzodwolɛ ɛleka, tɛnlabelɛ mɔɔ banebɔlɛ nee anwodɔlɛ wɔ ɛkɛ la.”​—Ayezaya 32:18.

 Baebolo ngapezo maa yɛnwu kɛ konle ngakyile nee ninyɛne gyɛne mɔɔ ɛlɛkɔ zo ɛnɛ la kile kɛ ɔnrɛhyɛ na anzodwolɛ mekɛ ne ara.

 Kɛzi Nyamenle bamaa anzodwolɛ ɛhye ara kenle bie ɛ? Ɔbalua ye anwuma arane ne anzɛɛ Belemgbunlililɛ ne azo. (Mateyu 6:10) Amaa wɔazukoa Belemgbunlililɛ ɛhye nee mɔɔ ɔbayɛ yeamaa wɔ la anwo debie la, nea vidio sikalɛ ɛhye Duzu A Le Nyamenle Belemgbunlililɛ Ne?