BƐHƆ ZO BƐZINZA!
Kilisienema Nee Konle—Boni A Baebolo Ne Ka A?
Kɛ mɔɔ yɛnwu ye wɔ Ukraine konle ne anu la, ɛzonlenlɛ nu mgbanyima dɔɔnwo mɔɔ bɛle Kilisienema la ɛlɛmaa menli anwosesebɛ kɛ bɛva bɛ nwo bɛwula konle nu. Yɛ kɛzi ɛsɔfo ne mɔ bie mɔ gyi afoa nwiɔ ne biala anzi la nzonlɛ:
“Yɛyɛ sogyama kɔsɔɔti mɔɔ bɛlɛko bɛabɔ bɛ maanle Ukraine anwo bane avi bɛ agbɔvolɛ asa anu la mo somaa . . . Yɛfi yɛ ahonle nu yɛyɛ asɔne yɛmaa bɛ na yɛbahɔ zo yɛaboa bɛ dahuu.”—Metropolitan Epiphanius I of Kyiv, kɛ mɔɔ The Jerusalem Post, March 16, 2022 bɔ amaneɛ la.
“Kpanyinli mɔɔ la Russia Ɔtɔdɔso Asɔne ne anloa la yɛle ɛzonlenlɛ titili bie maanle Russia sogyama wɔ Molɛ na ɔmaanle bɛ anwosesebɛ kɛ bɛbɔ bɛ maanle ne anwo bane. Ɔluakɛ ‘Russiama ala a bahola’ aboa amaa Moscow ahɔ zo aho konle ne wɔ Ukraine a.”—Reuters, April 3, 2022.
Asoo ɔwɔ kɛ Kilisienema kɔ konle? Duzu a Baebolo ne ka a?
Mɔɔ Baebolo ne ka la
Baebolo ne kilehile kɛ Gyisɛse Kelaese nɔhalɛ ɛdoavolɛma ɛnva bɛ nwo ɛnwulowula konle nu.
“Sia fa wɔ dadeɛ ne wula ɔbo zo ne, ɔluakɛ bɛdabɛ mɔɔ bɛtwe dadeɛ la kɔsɔɔti bawu dadeɛ nloa.”—Mateyu 26:52.
Asoo awie mɔɔ die konle to nu anzɛɛ ɔfa ɔ nwo ɔwula nu la di Gyisɛse edwɛkɛ ne azo ɔ?
“Melɛmaa bɛ mɛla fofolɛ kɛ bɛhulo bɛ nwo ngoko; kɛ mɔɔ mehulo bɛ la, bɛdabɛ noko bɛhulo bɛ nwo ngoko. Saa bɛkulo bɛ nwo a—menli kɔsɔɔti banwu kɛ bɛle me ɛdoavolɛma.”—Dwɔn 13:34, 35.
Asoo awie bahola aha kɛ ɔlɛda ɛlɔlɛ ɛhye mɔɔ Gyisɛse hanle nwolɛ edwɛkɛ la ali wɔ mekɛ mɔɔ ɔgyi afoa bie wɔ konle nu la ɔ?
Saa ɛkpondɛ nwolɛ edwɛkɛ dɔɔnwo a, kenga edwɛkɛ mɔɔ se “Is War Compatible With Christianity?”
Kilisienema nee konle ɛnɛ
Asoo ɔbahola yeayɛ boɛ kɛ Kilisienema ɛnrɛva bɛ nwo ɛnrɛwula konle nu ɛnɛ ɔ? Ɛhɛe. Mɔɔ Baebolo ne ka yɛ mekɛ ye anwo edwɛkɛ la ɔhanle ɔdole ɛkɛ ne kɛ, “wɔ awieleɛ mekɛ ne anu,” menli mɔɔ vi maanle maanle kɔsɔɔti anu la bɛali Gyisɛse ngilehilelɛ ne azo, ɔlua konle mɔɔ ‘bɛnrɛzukoa ye ɛhonlɛ bieko la.’—Ayezaya 2:2, 4, ɔbodwɛkɛ.
Saa ɛkpondɛ nwolɛ edwɛkɛ dɔɔnwo a kenga Ɛzinzalɛ Arane ne mɔɔ ɔ ti se “Kɛzi Nyamenle Bu Konle Ɛ?” la.
Ɔnrɛhyɛ Gyihova, a “anzodwolɛ Nyamenle ne,” balua ye anwuma arane ne azo yealie alesama “yeavi nzisi nee basabasayɛlɛ nu.”—Felepaema 4:9; Edwɛne 72:14.
Amaa wɔanwu kɛzi ɔbayɛ ye la nea vidio ne mɔɔ ɔse Duzu A Le Nyamenle Belemgbunlililɛ Ne? la.
a Nyamenle duma a le Gyihova.—Edwɛne 83:18.
Bie A Eza Ɛ Nye Balie
BƐHƆ ZO BƐZINZA!
Ɛzonlenlɛ Nee Ukraine Konle Ne—Duzu A Baebolo Ne Ka Ye Wɔ Nwo A?
Ɛzonlenlɛ nu mgbanyima mɔɔ wɔ maanle nwiɔ ne anu la ɛlɛfa bɛ tumi ne ali gyima. Noko mɔɔ bɛlɛyɛ la le ngakyile fi mɔɔ Gyisɛse hilehilele ye ɛdoavolɛ kɛ bɛyɛ anzɛɛ bɛmmayɛ la anwo.
BAEBOLO KPUYA MƆƆ BƐBUA
Nyamenle Belemgbunlililɛ Ne A Le Duzu?
Suzu deɛmɔti Nyamenle arane ne le kpalɛ tɛla arane biala la anwo.
EDWƐKƐTILE NGAKYILE
Asoo Ɔwɔ Kɛ Ɛzonlenlɛ Fa Ɔ Nwo Wulowula Maanyɛlɛ Nu?
Wɔ ewiade ɛleka biala, menli dɔɔnwo mɔɔ ka kɛ bɛle Gyisɛse Kelaese ɛdoavolɛma la ɛva bɛ nwo ɛwula maanyɛlɛ nu. Asoo kɛ ɔwɔ kɛ ɔba ye la ɛne?
