Ukraine konle ne yɛɛ maanle nu tɛnlabelɛ mɔɔ ɛzɛkye la ɛmaa aleɛ nwo ɛhyia wɔ ewiade ɛleka dɔɔnwo. Yɛnwu ɛhye kpalɛ wɔ maanle mɔɔ bɛdi ehyia mɔɔ ɔyɛ se ɔmaa menli dɔɔnwo kɛ bɛbanyia aleɛ la anu.

•   “Basabasayɛlɛ, maanle nu tɛnlabelɛ mɔɔ ɛzɛkye, ninyɛne awolɛ mɔɔ ɛyɛ se nee ninyɛne gyɛne dɔɔnwo ɛmmaa bɛngola bɛnlua aleɛ dɔɔnwo na menli asa aha bie.”​—António Guterres, UN secretary-general, July 17, 2023.

•   “Mbɔlɔba bie mɔ ɛha kɛ Russia mɔɔ ɛhwe ɔ nwo ɛvi ngyehyɛleɛ mɔɔ bɛdua zo bɛfa aleɛ bɛfi Ukraine anwo la bamaa aleɛ bolɛ ayɛ se wɔ maanle mɔɔ bɛnlɛ ezukoa dɔɔnwo la anu, titili wɔ North Africa nee Middle East.”​—Atalayar.com, July 23, 2023.

 Suzu mɔɔ Baebolo ne ka ye wɔ ɛhɔne nee kenle bie nwo la anwo.

•   Gyisɛse hanle dole ɛkɛ ne kɛ: “Maanle badwazo atia maanle yɛɛ belemgbunlililɛ badwazo atia belemgbunlililɛ, na ɛhɔne . . . bara.”​—Mateyu 24:7.

•   Yekile buluku ne ka mgbɔnwɔkavoma nna bie anwo edwɛkɛ. Bɛ nuhua ko gyi ɛkɛ ne maa konle. Na mɔɔ doa ye la gyi ɛkɛ ne maa ɛhɔne, mekɛ mɔɔ aleɛ nwo bahyia na ye bolɛ ayɛ se la. “Menwunle ye, na nea! ɛkpɔnwɔ bile bie, na ahenle mɔɔ de zo la lɛ tone wɔ ɔ sa nu. Mendele debie mɔɔ dielie kɛ ɛnelɛ la . . . kɛ: ‘Hwiiti koate ko denale ko yɛɛ baale koate nsa denale ko.’”​—Yekile 6:5, 6.

 Baebolo ngapezo ɛhye mɔ mɔɔ fale ɛhɔne nwo la ɛlɛba nu ‘wɔ mekɛ ɛhye mɔɔ li awieleɛ’ la anu. (2 Timote 3:1) Amaa wɔazukoa “mekɛ mɔɔ li awieleɛ” nee Yekile mgbɔnwɔkavoma nna ne anwo edwɛkɛ dɔɔnwo la, nea Ewiade Ɛhakyi Ɔvi 1914 Mɔɔ Ba La vidio ne na kenga “Mgbɔnwɔkavoma Nna Ne​​—Bɛmɛ A Le Nwane Mɔ?”

•   Folɛdulɛ kpalɛ mɔɔ bahola aboa yɛ yeamaa yɛagyinla aleɛ mɔɔ ye bolɛ ɛyɛ se anzɛɛ ɛhɔne nloa la wɔ Baebolo ne anu. Nea nwolɛ neazo bie mɔ wɔ edwɛkɛ “Ɛbahola Wɔava Ezukoa Ekyi Wɔanlea Ɛ Nwo” anu.

•   Eza Baebolo ne maa yɛnyia anyelazo kɛ ninyɛne bayɛ kpalɛ. Yebɔ yɛ ɛwɔkɛ kɛ “aleɛ babu azɛlɛ ne azo” na awie biala banyia dɔɔnwo ali. (Edwɛne 72:16) Amaa wɔanwu kenle bie ɛwɔkɛ ɛhye nee deɛmɔti ɛbahola wɔalie wɔali la anwo edwɛkɛ dɔɔnwo la, kenga edwɛkɛ “Ninyɛne Bayɛ Kpalɛ Kenle Bie.”