Wɔ February 24, 2022, Russia hɔtetale Ukraine. Ɛhye vale menli dɔɔnwo ngoane dole esiane nu na ɛnee ɔwɔ kɛ bɛnriandi bɛfi maanle ne anu ndɛndɛ. a

 “Mendele bɔmbo mɔɔ bɛlɛtoto la ane. Ɛnee ɔyɛ ɛzulolɛ kpalɛ, mennwu kɛzi mekile nu bɔbɔ a. Mɔɔ yɛdele kɛ keteke ɛlɛtwe menli avi suakpole ne azo la, yɛzile kpɔkɛ kɛ yɛbahɔ bie. Ɛnee ɔwɔ kɛ sonla ko biala fa baage ekyi ko ala, ɔti yɛgyakyile debie biala wɔ ɛkɛ. Yɛvale ngɛlata mɔɔ anwo hyia, ayile, nzule nee aleɛ ekyi bie ala. Yɛgyakyile debie biala ɛkɛ yɛhɔle keteke agyinlaleɛ ɛkɛ ne na ɛnee bɛlɛtoto bɔmbo.”​—Nataliia, ɔvi Kharkiv, Ukraine.

 “Yɛanlie yɛanli kɛ konle bahola azi kɔkpula kɛ ɔbɔle ɔ bo la. Mendele kɛ bɛlɛtoto bɔmbo wɔ suakpole ne ɛleka bie mɔ na sua ne nvɛnzɛlɛ ne mɔ bɔle ɔ bo kɛ ɔwoso. Menzile kpɔkɛ kɛ metu, ɔti menvale ninyɛne mɔɔ anwo hyia la. Menvile sua nu nwonlomɔ 8:00 na menvole keteke mɔɔ ɛlɛkɔ Lviv la, akee menvole bɔɔso mendoale zo mengɔle Poland.”​—Nadija, ɔvi Kharkiv, Ukraine.

Wɔ edwɛkɛ ɛhye anu

•  Duzu a ɛva tutane nwo ngyegyelɛ ɛhye ɛra a?

•  Nienwu a tutanema banyia anyelazo a?

•  Asoo Baebolo ne bahola aboa tutanema ɛnɛ ɔ?

  Duzu a ɛva tutane nwo ngyegyelɛ ɛhye ɛra a?

 Ngyegyelɛ ɛhye bɔle ɔ bo wɔ mekɛ mɔɔ Russia sogyama hɔtetale Ukraine la. Noko akee, Baebolo ne maa yɛnwu ninyɛne titili gyɛne mɔɔ ɛva ngyegyelɛ ɛhye ɛra la:

•   Sonla arane ɛngola ɛnva ninyɛne mɔɔ alesama hyia nwo la ɛmmaa bɛ. Bɛta bɛfa tumi mɔɔ bɛlɛ la bɛsisi awie mɔ na bɛmaa bɛdi nyane.​—Nolobɔvo 4:1; 8:9.

•   Seetan Abɔnsam, “mɔɔ nea ewiade ye azo la,” ɛnyia alesama anwo zo tumi ɛtane. Baebolo ne ka kɛ: “Ewiade ye amuala wɔ amumuyɛnli ne tumi bo.”​—Dwɔn 14:30; 1 Dwɔn 5:19.

•   Saa ɛye ngyegyelɛ mɔɔ alesama ɛyia wɔ ɛvolɛ dɔɔnwo anu ɛsie ahane a, kɛkala mɔɔ yɛde mekɛ bie mɔɔ Baebolo ne hanle nwolɛ edwɛkɛ dole ɛkɛ la anu: “Wɔ mekɛ mɔɔ li awieleɛ la anu, mekɛ mɔɔ anu yɛ se la bara.” (2 Timote 3:1) Bieko, konle konle, esiane ngakyile, ɛhɔne nee ewulenzane mɔɔ maa menli tu fi bɛ sua nu la bahɔ zo wɔ mekɛ ɛhye anu.​—Luku 21:10, 11.

 Nienwu a tutanema banyia anyelazo a?

 Baebolo ne ka kɛ yɛ Bɔvolɛ ne, Gyihova, b le Nyamenle mɔɔ lɛ ɛlɔlɛ na ɔ kunlu yelɛyela ye maa menli mɔɔ ɛnriandi ɛvi bɛ sua nu la. (Ditilɔnomi 10:18) Yebɔ ɛwɔkɛ kɛ ɔbalua ye anwuma arane ne mɔɔ bɛfɛlɛ ye Nyamenle Belemgbunlililɛ la azo yeaye ngyegyelɛ mɔɔ tutanema yia la yeavi ɛkɛ. Ɔbava arane ɛhye yeazie alesama arane ne mɔ agyakɛ anu. (Daneɛle 2:44; Mateyu 6:10) Gyihova balua ye Belemgbunlililɛ ne azo azɛkye Seetan Abɔnsam. (Wulomuma 16:20) Zɔhane Belemgbunlililɛ ne banlea ewiade amuala azo na yeaye mgbakyemgbakyenu mɔɔ wɔ maanle maanle avinli la yeavi ɛkɛ. Alesama mɔɔ wɔ ewiade amuala la babɔ nu ayɛ abusua ko. Ɔnrɛhyia kɛ awie nriandi fi ye sua nu, ɔluakɛ Baebolo ne bɔ ɛwɔkɛ kɛ: “Bɛ nuhua ko biala badɛnla ye vanye nee ye feege baka bo, na awie biala ɛnrɛha bɛ ɛzulolɛ, ɔluakɛ ɛlɔne Gyihova anloa anu edwɛkɛ ɛne.”​—Maeka 4:4.

 Nyamenle Belemgbunlililɛ ne ala a bahola aye ngyegyelɛ mɔɔ tutanema ɛlɛyia ye ɛnɛ la avi ɛkɛ a. Gyihova balua ye Belemgbunlililɛ ne azo aye ngyegyelɛ mɔɔ maa menli nriandi fi bɛ sua nu la avi ɛkɛ. Suzu neazo ɛhye mɔ anwo:

•   Konle. ‘Gyihova bamaa bɛagyakyi konle.’ (Edwɛne 46:9) Saa ɛkulo kɛ ɛnwu kɛzi Nyamenle bayɛ ɛhye la a, kenga edwɛkɛ ne mɔɔ se “Kɛ Ɔkɛyɛ Na Anzodwolɛ Ara Azɛlɛ Ye Azo Ɛ?”

•   Nzisi nee basabasayɛlɛ. Gyihova balie “bɛ yeavi nzisi nee basabasayɛlɛ nu.” (Edwɛne 72:14) Amaa wɔanwu kɛzi awie bahola ahakyi subane ɛtane bie mɔɔ ɛha ɔ nwo la, kenga edwɛkɛ ne mɔɔ se “Breaking the Cycle of Hatred.”

•   Ehyia. Gyihova balie “ehyianli mɔɔ su kpondɛ moalɛ.” (Edwɛne 72:12) Kenga edwɛkɛ ne mɔɔ se “Is a Fair Economic System Possible?” na ɛbanwu kɛzi Nyamenle baye mɔɔ maa menli di ehyia avi ɛkɛ la.

•   Ɛhɔne. “Aleɛ babu azɛlɛ ne azo.” (Edwɛne 72:16) Kenga edwɛkɛ ne mɔɔ se “A World Without Hunger?” na ɛbanwu kɛzi Nyamenle bamaa awie biala anyia aleɛ ali la.

  Asoo Baebolo ne bahola aboa tutanema ɛnɛ ɔ?

 Ɛhɛe. Baebolo ne bahola amaa bɛanyia kenle bie nwo anyelazo kpalɛ. Eza ɔbahola yeaboa bɛ yeamaa bɛagyinla ngyegyelɛ mɔɔ bɛyia ye ɛnɛ la anloa.

 Baebolo ngyinlazo: ‘Bɛmmadwenledwenle debie biala anwo, emomu wɔ debie biala anu bɛlua asɔneyɛlɛ nee modolɛ nee moyɛlɛ zo bɛva bɛ nzɛlɛlɛ bɛdo Nyamenle anyunlu; na Nyamenle anzodwolɛ ne mɔɔ bo ndelebɛbo muala azo la babɔ bɛ ahonle nee bɛ adwenle nzuzulɛ nwo bane.’​—Felepaema 4:6, 7.

 Mɔɔ ɔkile la: Saa ɛlɛyia ngyegyelɛ a sɛlɛ Nyamenle kɛ ɔmaa ɛzie ɛ nwo dii. Nea edwɛkɛ ne mɔɔ se “Philippians 4:6, 7​—‘Do Not Be Anxious About Anything.’”