Nvoninli ɛhye mɔɔ ye tendenle le mita mɔtwɛ la bikye tete Yigyibiti bozonle Amun ɛzonlenlɛ sua ne mɔɔ wɔ Karnak la anwo. Mbɔlɔba bie mɔ kile kɛ, nvoninli ne fale konim mɔɔ Yigyibiti belemgbunli Hyaehyake lile ye wɔ Yigyibiti sɔlɔ aduduleɛ maanle bie mɔ mɔɔ Dwuda nee Yizilayɛ sɔlɔ belemgbunlililɛ ne boka nwo anwo zo la anwo.

 Wɔ nvoninli ne anu, Amun ɛlɛfa ngɛkɛlɛ 150 awula Hyaehyake anzɛɛ Sheshonk asa anu. a Akɛlɛ ko biala gyi ɛkɛ ne maa sua anzɛɛ menli mɔɔ ɔlile bɛ nwo zo konim la. Bɛhɛlɛ azua ne mɔ aluma bɛgua akɛlɛ ko biala anwo. Ɛnɛ nee ɛnɛ ala bɛkola bɛnwu aluma ɛhye mɔ anu dɔɔnwo, na menli mɔɔ kenga Baebolo ne la ze bie mɔ kpalɛ. Bie mɔ a le, Bɛte-hyian, Gebɛyɔn, Mɛgedo yɛɛ Hyunɛm.

 Bɛhanle konle zɔhane mɔɔ Yigyibiti nee Dwuda honle la anwo edwɛkɛ wɔ Baebolo ne anu. (1 Arelemgbunli 14:25, 26) Nɔhalɛ nu, Baebolo ne ka kɛzi Hyaehyake tetale bɛ la anwo edwɛkɛ fɔɔnwo. Yɛkenga kɛ: “Mɔɔ Rilihɔbowam lile ɛvolɛ nnu wɔ Dwuda ebia ne azo la, Yigyibiti Belemgbunli Hyaehyake ratetale Gyɛlusalɛm. . . . Ɔvale ɛlɔnema mɔɔ ka konle ehwili la apenle ko ɛya nwiɔ yɛɛ ɛlɔnema mɔɔ ka mgbɔnwɔ la apenle ngoko abulasia a ɔrale a. Na menli mɔɔ ɔ nee bɛ vi Yigyibiti rale la . . . awie ɛnze bɛ nloa. Ɔhonle ɔvale Dwuda azuamgbole ne mɔ mɔɔ bɛbɔ nwolɛ bane la too ɔradwule Gyɛlusalɛm.”​—2 Edwɛkɛsisilɛ 12:2-4.

 Tɛ nvoninli zɔhane ne mɔɔ azetuduvoma nwunle ye wɔ Karnak la angome a di daselɛ kɛ Hyaehyake tetale Yizilayɛma a. Bɛnwunle ngakyedeɛ bie sinli anzɛɛ stela wɔ tete suakpole Mɛgedo azo na ɛnee duma “Sheshonk” wɔ zo.

 Hyaehyake mɔɔ lile Dwudama anwo zo konim anwo kɛlɛtokɛ mɔɔ di munli mɔɔ wɔ Baebolo ne anu la maa yɛnwu kɛ Baebolo kɛlɛvolɛma ne di nɔhalɛ. Bɛvale nɔhalɛlilɛ bɛhɛlɛle konim mɔɔ bɛlile yɛɛ mekɛ mɔɔ bɛhonle bɛdɔle la anwo edwɛkɛ. Yɛnda yɛnnwu nɔhalɛlilɛ zɛhae wɔ tetedwɛkɛ kɛlɛvolɛma gyɛne mɔɔ dɛnlanle aze wɔ tete ne la ɛkɛ.