NINYƐNE MƆƆ BƐFA WƆ NDOBOA BƐYƐ LA
Azua Mɔɔ Yɛsisile Kolaa Na Ewulenzane Ne Ara
NOVEMBER 1, 2020
Kɛmɔ bɛsɔne menli apenle dɔɔnwo ɛvolɛ biala la ati, yɛhyia teokelase azua dɔɔnwo. Ɛhye ati, Local Design/Construction Department ne mɔ mɔɔ wɔ ewiade amuala la yɛle ngyehyɛleɛ kɛ bɛbasisi anzɛɛ bɛbayɛ azua ɛhye mɔ bie boɛ wɔ 2020 ɛzonlenlɛ ɛvolɛ ne anu. Ɛnee ɔ muala dodo bo 2,700. a
Noko COVID-19 ewulenzane ne ammaa ɛhye anyɛ boɛ. Amaa bɛabɔ yɛ mediema ne mɔ anwo bane na bɛali arane mɛla zo la, Neazo Eku ne Mbulukuyɛlɛ Kɔmatii ne maanle bɛgyakyile azua ɛhye mɔ dɔɔnwo ɛsisilɛ wɔ ewiade amuala. Noko wɔ 2020 ɛzonlenlɛ ɛvolɛ ne anu, azua mɔɔ bɛsisile nee mɔɔ bɛyɛle bɛ boɛ kolaa na ewulenzane ne ara la amuala bo 1,700. Eza bɛsisile azua mɔɔ bo 100 mɔɔ ɔfese ne mɔ bɛava ayɛ gyimalilɛ ngakyile la. Nea kɛzi azua ngakyile nwiɔ mɔɔ bɛsisile la ɛboa yɛ mediema la.
Cameroon Bɛtɛle ne. Bɛ ɔfese dɛba ne mɔɔ ɛnee ɔwɔ Douala la anu yɛle ekyi maanle bɛ ɔti ɛnee bɛhyia azua dɔɔnwo. Mbulukuyɛlɛ Kɔmatii ne zuzule nwolɛ kɛ bɛziezie sua dɛba ne mɔɔ bɛlɛ la, noko bɛnwunle kɛ kakɛ mɔɔ bɛbabɔ ye wɔ nwolɛ la badɛla sua mumua ne bolɛ. Eza bɛzuzule nwolɛ kɛ bie a bɛbazi sua fofolɛ anzɛɛ bɛbadɔ bie mɔɔ bɛzi ye dɛba la na bɛaziezie ye boɛ, noko biala anyɛ boɛ.
Noko mediema ne mɔ dele kɛ arane ne kulo kɛ ɔye adenle ɔto yɛ Nyianu Asalo ne mɔ mɔɔ wɔ Douala sɔlɔ la anu ko anwo ɛkɛ. Adenle ne ɛnrɛmaa ɔnrɛyɛ se kɛ yɛbahɔ Nyianu Asalo ɛkɛ na bɛahola bɛayɛ ninyɛne ngakyile wɔ ɛkɛ. Ninyɛne ɛhye mɔ mɔɔ bɛbayɛ la a ɛnee ɔfese ne hyia nwo a. Ɔti Neazo Eku ne liele dole nu kɛ bɛzi ɔfese fofolɛ wɔ azɛlɛ bie mɔɔ la Nyianu Asalo ne anwo ɛkɛ la azo.
Mediema mrenyia nee mraalɛ ɛlɛboa bɛamaa bɛazi Cameroon Bɛtɛle fofolɛ ne
Alasevolɛ nee suasivoma mɔɔ bɛbɔle bɛ ɛkpa la bɔle nu yɛle gyima ne, na ɛhye maanle bɛwiele ndɛ yɛɛ bɛambɔ kakɛ dɔɔnwo. Nɔhalɛ nu, bɛwiele gyima ne la, ɛnee ezukoa mɔɔ bɛhanle kɛ bɛfa bɛayɛ gyima ne la anu dɔla mgbe nwiɔ ɛha ɔ bo! Mɔɔ Bɛtɛle abusua ne dule hɔle bɛ sua fofolɛ ne anu la, yeangyɛ biala yɛɛ COVID-19 ne rale a.
Bɛwiele Cameroon Bɛtɛle ne si kolaa na COVID-19 ewulenzane ne ara
Mediema mɔɔ yɛ gyima wɔ Cameroon Bɛtɛle ɛkɛ la ɛnyia ɛleka kpalɛ mɔɔ bɛbadɛnla na bɛayɛ gyima a, na bɛnwu Bɛtɛle fofolɛ ne kɛ ɔle ahyɛlɛdeɛ mɔɔ vi Gyihova ɛkɛ a. Agyalɛma bie hanle kɛ, “Yɛkulo kɛ yɛyɛ gyima ɛsesebɛ, na yɛngulo kɛ yɛbu ahyɛlɛdeɛ ɛhye debie ekyi.”
Mediema ɛlɛyɛ gyima wɔ bɛ ɔfese fofolɛ ne anu kolaa na ewulenzane ne ara
Tojolabal Edwɛbohilelɛ Ɔfese ne (RTO), Mexico. Wɔ ɛvolɛ dɔɔnwo anu, mediema mɔɔ kile yɛ edwɛkɛ ne abo kɔ Tojolabal aneɛ nu la yɛle gyima wɔ Central America Bɛtɛle ne mɔɔ bikye Mexico City la anu. Noko ɛleka mɔɔ bɛka Tojolabal aneɛ ne kpalɛ la a le Altamirano nee Las Margaritas—ɔvi Bɛtɛle mɔɔ kɔ ɛkɛ ne la le kɛyɛ kilomita 1,000 (ma 620)! Ɔti ɛnee ɔyɛ se kɛ edwɛbohilelɛma ne banwu Tojolabal edwɛkɛ agbɔkɛ mɔɔ bɛfa bɛdi gyima kɛkala la. Yɛɛ ɛnee ɔyɛ se kɛ ɔfese ne banyia mediema mɔɔ bikye ɛkɛ mɔɔ bɛfɛta la bɛamaa bɛahile edwɛkɛ bo bɛahɔ Tojolabal aneɛ nu na bɛahye ɔdio.
Mediema ɛlɛboa bɛamaa bɛayɛ RTO ne anwo gyima
Ɛhye ati, ɛnee Neazo Eku ne Mbulukuhɛlɛlɛ kɔmatii ne kulo kɛ ɔmaa Tojolabal edwɛbohilelɛma ne tu kɔtɛnla ɛleka mɔɔ bɛka aneɛ ne la. Amaa bɛahola bɛadu la, ɔfese ne zile kpɔkɛ kɛ bɛbadɔ sua bie na bɛaziezie ye boɛ. Saa bɛyɛ ye zɔ a, ɔnrɛmaa bɛnrɛbɔ kakɛ dɔɔnwo kɛ mɔɔ anrɛɛ bɛbazi fofolɛ anzɛɛ bɛbahaye la.
Edwɛbohilelɛnli ko hanle kɛzi ɛhye ɛboa ye la anwo edwɛkɛ kɛ: “Wɔ ɛvolɛ bulu mɔɔ menvale menyɛle edwɛbohilelɛ gyima ne wɔ Bɛtɛle la anu, meanyia abusua ko bɔbɔ mɔɔ bikye yɛ mɔɔ ka me aneɛ ne bie la. Kɛkala yɛ ɔfese ne gyi menli mɔɔ ka Tojolabal aneɛ ne la avinli. Me nee menli mɔɔ ka Tojolabal aneɛ ne la tendɛ dahuu. Ɛhye ɛmaa menyia edwɛkɛ agbɔkɛ dɔɔnwo na menyia anyuhɔlɛ wɔ me gyima ne anu.”
Tojolabal edwɛbohilelɛ ɔfese ne, mekɛ mɔɔ bɛdɔle nee mekɛ mɔɔ bɛyɛle bɛwiele la
Gyima Mɔɔ Bɛbayɛ Wɔ 2021 Ɛzonlenlɛ Ɛvolɛ Ne Anu La
Wɔ 2021 ɛzonlenlɛ ɛvolɛ ne anu, bɛyɛle ngyehyɛleɛ kɛ saa tɛnlabelɛ ne maa adenle a, bɛbayɛ RTO nee Baebolo sukulu azua 75 anwo gyima. Bɛbadoa gyima mɔɔ bɛlɛyɛ ye wɔ azua mɔɔ Bɛtɛle ne mɔ bava ali gyima anwo la azo; bie a le ewiade amuala gyima ne ati sua fofolɛ ne mɔɔ bɛlɛsi ye wɔ Ramapo, New York la, yɛɛ Argentina nee Italy Bɛtɛle ne mɔ mɔɔ bɛye bɛahɔ ɛleka fofolɛ la. Eza ɔwɔ kɛ bɛsisi Belemgbunlililɛ Asalo mɔɔ bo 1,000, ɛleka mɔɔ bɛyia bɛyɛ debiezukoalɛ mɔɔ bo 6,000 la ɛnle kpalɛ ɔti ɔwɔ kɛ bɛnyia fofolɛ yɛɛ ɔwɔ kɛ bɛyɛ Belemgbunlililɛ Asalo 4,000 boɛ.
Nienwu a bɛnyia ezukoa bɛtua gyima ɛhye mɔ amuala anwo kakɛ a? Mɔɔ Adiema Lázaro González mɔɔ boka Central America Ɔfese Kɔmatii ne anwo la ɛlɛka Tojolabal RTO gyima ne anwo edwɛkɛ la, ɔbuale kpuya ɛhye. “Yɛnlɛ ninyɛne dɔɔnwo wɔ yɛ nehae. Ɔti saa yɛ mediema mɔɔ wɔ ewiade amuala la amboa yɛ a, yɛnrɛhola yɛnrɛzi edwɛbohilelɛ ɔfese yɛnrɛmaa yɛ mediema diedima mɔɔ ka aneɛ ne la. Ndoboa mɔɔ yɛ mediema mɔɔ wɔ ewiade amuala ye la ɛmaa edwɛbohilelɛma ne ɛhola ɛdu ɛhɔ ɛleka mɔɔ bɛka bɛ aneɛ ne la. Yɛyɛ yɛ mediema kɔsɔɔti mo kɛ bɛfi bɛ ahonle nu bɛboa la.” Amgba, ndoboa mɔɔ yɛ mediema ye la a maa yɛkola yɛyɛ suazilɛ gyima ɛhye mɔ a, na menli dɔɔnwo dua donate.pr418.com ne azo a yɛ zɔ a.
a Local Design/Construction Department ne mɔ yɛ ngyehyɛleɛ na bɛsisi Belemgbunlililɛ Asalo wɔ bɛ ɔfese ne azɛlɛsinli ne mɔ anu. Worldwide Design/Construction Department ne mɔɔ wɔ ewiade amuala gyima ne ati la yɛ azua mɔɔ ɔwɔ kɛ bɛsisi wɔ ewiade amuala la anwo ngyehyɛleɛ na bɛnea bɛmaa bɛsisi.
Bie A Eza Ɛ Nye Balie
KPUYA MƆƆ MENLI TA BIZA
Duzu A Gyihova Alasevolɛ Fa Ndoboa Mɔɔ Bɛnyia La Yɛ A?
Asoo Alasevolɛ ne mɔ dua ndoboa ne azo nyia bɛ nwo?
KPUYA MƆƆ MENLI TA BIZA
Kɛzi Gyihova Alasevolɛ Tua Bɛ Gyima Ne Anwo Kakɛ Ɛ?
Kɛzi yɛye yɛ ndoboa la le ngakyile fi mɔɔ asɔne dɔɔnwo yɛ la anwo.
