Mediema mɔɔ kile yɛ edwɛkɛ ne mɔ abo la ngyɛnu mɔɔ bo 60 la ɛnle Bɛtɛle ɛkɛ, emomu bɛyɛ gyima wɔ edwɛbohilelɛ ɔfese (RTO). Duzu ati a ngyehyɛleɛ ɛhye boa a? Duzu ninyɛne a edwɛbohilelɛma ne hyia nwo amaa bɛ gyima ne ahɔ zo kpalɛ wɔ RTO ɛkɛ a? Yɛɛ kɛzi sua mɔɔ edwɛbohilelɛ ekpunli bie tɛnla zo la kola boa bɛ maa bɛkile edwɛkɛ ne abo kpalɛ ɛ?

 Ɔmaa mediema mɔɔ yɛ gyima wɔ RTO ɛkɛ la tɛnla ɛleka mɔɔ menli dɔɔnwo ka bɛ sua zo aneɛ ne la. Karin mɔɔ kile yɛ edwɛkɛ ne abo ɔkɔ Low German aneɛ nu la hanle kɛ: “Ɔvi mekɛ mɔɔ yɛdule yɛrale RTO mɔɔ wɔ Cuauhtémoc, Chihuahua, Mexico ɛke la, dahuu yɛ nee yɛ gɔnwo mɔ edwɛbohilelɛma ɛlɛdi adwelie, yɛlɛkɔ daselɛlilɛ anzɛɛ yɛlɛdi gua a yɛka Low German. Menli mɔɔ ka yɛ aneɛ ne la ala a yɛ nee bɛ de a. Yɛte mrɛlɛ mɔɔ yɛdele bie ɛhyɛ kpalɛ la, yɛɛ yɛnwu kɛzi bɛka aneɛ ne kenlensa ye la.”

 James mɔɔ boka Frafra edwɛbohilelɛma mɔɔ wɔ Ghana anwo la hanle kɛ ɔdwu mekɛ ne bie a ɔ nwo dɔ Bɛtɛle abusua ne. Noko ɔvale ɔzɔle zo kɛ: “Me nye die nwo kɛ mebayɛ gyima wɔ RTO ɛke. Saa mefa me sua zo aneɛ ne medi daselɛ na menwu kɛzi menli yɛ bɛ nyɛleɛ wɔ edwɛkpa ne anwo la a, ɔmaa me nye die kpole.”

 Duzu a mediema ne mɔ gyinla zo si ɛleka mɔɔ bɛfa RTO bie bɛahɔ la anwo kpɔkɛ a? Joseph mɔɔ boka Worldwide Design/Construction Department ne mɔɔ wɔ Warwick, New York, U.S.A anwo la hanle kɛ, “Ngyegyelɛ ko mɔɔ yɛyia la a le kɛ bɛta bɛnua kɛnlaneɛ wɔ ɛleka bie mɔ yɛɛ bɛnda bɛnnyia nzule anzɛɛ Yintanɛte mɔɔ bɛbava bɛahwe ninyɛne ne mɔ mɔɔ bɛkile ɔ bo la. Ɔti saa yɛkulo kɛ yɛyɛ RTO wɔ ɛleka bie a, yɛfa yɛ nye yɛsu ɛleka ngakyile mɔɔ bɛka aneɛ ne wɔ ɛkɛ la.”

 Fane dɔɔnwo ne ala, saa yɛyɛ RTO ne wɔ Nyianu Asalo, Belemgbunlililɛ Asalo anzɛɛ edwɛkpatɛlɛvolɛ sua nu, mɔɔ mediema ne mɔ bahola avi sua nu ara la a, yemɔ ɔmmaa ye ɛyɛlɛ ɛnyɛ se kpalɛ yɛɛ yɛmbɔ nwolɛ kakɛ dɔɔnwo. Saa azua ɛhye mɔ bie ɛnle ɛkɛ a, bie a bɛbamaa mediema ne mɔ adenle kɛ bɛhɔdɔ sua anzɛɛ ɛleka mɔɔ bɛbahola bɛava bɛayɛ ɔfese mɔɔ edwɛbohilelɛma ne bahola adɛnla ɛkɛ ayɛ gyima la. Saa ɔdwu mekɛ bie na ɔwɔ kɛ bɛyɛ nzenzaleɛ wɔ edwɛbohilelɛma ne gyima ne anu a, ɔmmaa ɔnyɛ se kɛ bɛbadɔne azua ɛhye mɔ na bɛava ezukoa ne bɛayɛ debie fofolɛ.

 Wɔ 2020 ɛzonlenlɛ ɛvolɛ ne anu, yɛbɔle RTO ne mɔ anwo kakɛ U.S. dɔla mgbe 13 amaa bɛ gyima ne ahɔ zo. Edwɛbohilelɛma mɔɔ wɔ RTO ne mɔ anu la hyia kɔmpita, software (ninyɛne mɔɔ bɛfa bɛgua kɔmpita zo) titili bie, ninyɛne mɔɔ bɛbava bɛahye edwɛkɛ, Yintanɛte yɛɛ ninyɛne ngyikyingyikyi mɔɔ bɛbahyia nwo la. Sonla ko kɔmpita nee nwolɛ debie biala anwo kakɛ kola yɛ dɔla $750. Bɛfa software ngakyile mɔɔ bɛdɔ nee Watchtower Translation System, kɔmpita zo gyimalilɛ mɔɔ boa edwɛbohilelɛma ne wɔ bɛ gyimayɛlɛ nu na ɔmaa bɛnwu mbuluku dɔɔnwo anu edwɛkɛ la bɛgua zo.

 Eza bɛfa ninyɛne mɔɔ edwɛbohilelɛma ne kola fa kye ɔdio wɔ bɔ ɔfese la bɛmaa bɛ. Mɔɔ COVID-19 ewulenzane ne bɔle ɔ bo la, ninyɛne ɛhye mɔ boale kpalɛ ɔluakɛ edwɛbohilelɛma ne dɔɔnwo holale vale ninyɛne ɛhye mɔ hɔle sua na bɛdoale bɛ gyima ne azo.

 Mediema mɔɔ wɔ ɛleka mɔɔ RTO ne wɔ la ta tu bɛ nwo maa bɛkenga edwɛkɛ ne mɔɔ bɛbahile ɔ bo la anu yɛɛ bɛboa bɛmaa bɛsiezie RTO ɛkɛ. Cirstin mɔɔ yɛ gyima wɔ Afrikaans RTO mɔɔ wɔ Cape Town, South Africa la hanle kɛ, “Nolobɔlɛma nee dahuu adekpakyelɛma dɔɔnwo nyia nwolɛ adenle fa bɛ ɛlolɛ ahyɛlɛdeɛ ne mɔ di gyima wɔ ɛke.”

 Menli ɛhye mɔ mɔɔ tu bɛ nwo maa la anye die nwolɛ adenle ɛhye anwo. Adiema raalɛ ko mɔɔ boa wɔ RTO bie anu la hanle kɛ gyima mɔɔ ɔyɛ ye wɔ ɛkɛ la “maa ye ahonle tɔ ye azule nu kpole.” Mediema mrenyia nee mraalɛ bie mɔ noko baboa yɛ maa yɛkye ɔdio ngakyile. Juana mɔɔ kile edwɛkɛ bo kɔ Totonac aneɛ nu mɔɔ wɔ Veracruz, Mexico la hanle kɛ: “Kɛkala mɔɔ yɛbikye azua mɔɔ bɛka yɛ aneɛ ne la, ɔnyɛ se kɛ yɛbanyia mediema mrenyia nee mraalɛ dɔɔnwo yɛamaa bɛaboa wɔ ɔdio nee vidio ne mɔ ɛhyelɛ nu.”

 Noko asoo RTO ne mɔ ɛboa ɛmaa kɛzi yɛkile edwɛkɛ ne abo la ɛnyia anyuhɔlɛ ɔ? Menli dɔɔnwo mɔɔ kenga yɛ mbuluku ne mɔ la se yeboa. Cédric mɔɔ nee Kongo edwɛbohilelɛma mɔɔ wɔ Democratic Republic of Congo yɛ gyima la hanle kɛ: “Ɛnee mediema bie mɔ ka kɛ kɛzi yɛkile edwɛkɛ ne abo yɛkɔ Kongo nu la le ‘Watch Tower Kongo,’ ɔluakɛ tɛ zɔhane a bɛka Kongo aneɛ ne a. Noko kɛkala bɛse yɛfa adwuleso Kongo, kɛzi bɛka aneɛ ne kɛkala la a yɛkile yɛ edwɛkɛ ne abo a.”

 Andile mɔɔ nee Xhosa edwɛbohilelɛma ne yɛ gyima la te kɛ bɛka edwɛkɛ ko ne ala bie wɔ South Africa. Ɔhanle kɛ, “Menli dɔɔnwo se bɛnwu kɛ kɛzi yɛkile edwɛkɛ ne abo la ɛhakyi. Kɛkala, ngakula mɔɔ ɛnee kenga Ɛzinzalɛ Arane ne wɔ Nrelenza nu bɔbɔ la akee kenga ye wɔ Xhosa nu. Bɛ nye die kɛzi bɛhile Ewiade Fofolɛ Ngilebɛbo fofolɛ ne abo la anwo.”

 Ndoboa mɔɔ bɛye bɛboa ewiade amuala gyima ne mɔɔ bie a le mɔɔ bɛdua donate.pr418.com azo bɛye la bie a bɛfa bɛtua RTO ne ɛyɛlɛ, ɛkɛ ne ɛziezielɛ nee menli mɔɔ yɛ gyima wɔ ɛkɛ la anwo kakɛ mɔɔ bɛbɔ la a.