Gyisɛse hanle hilele ye ɛdoavolɛma ne kɛ: ‘Bɛbayɛ me alasevolɛ bɛahɔdwu azɛlɛ ye azo ɛleka biala.’ (Gyima ne 1:8) Ɛnɛ, Gyihova Alasevolɛ ɛlɛbɔ mɔdenle ali zɔhane edwɛkɛ ne azo. Noko yɛtɛkolale yɛtɛdile daselɛ kpalɛ wɔ azɛlɛ ye azo ɛleka bie mɔ, mɔɔ ɛleka mɔɔ menli dɔɔnwo wɔ la boka nwo la. Yɛɛ Alasevolɛ ekyi bie a wɔ maanle bie mɔ anu a. (Mateyu 9:37, 38) Duzu a yɛlɛyɛ amaa yɛaha edwɛkɛ ne yɛahile menli dɔɔnwo a?

 Gyihova Alasevolɛ Neazo Eku ne Ɛzonlenlɛ Kɔmatii ne maa edwɛkpatɛlɛvolɛma kɔ ewiade ɛleka mɔɔ bɛhyia moalɛ la amaa bɛaboa yɛ bɛamaa yɛali Gyisɛse edwɛkɛ ne azo. Kɛkala edwɛkpatɛlɛvolɛma 3,090 a wɔ ewiade amuala a. a Bɛlua Baebolo sukulu le kɛ Belemgbunlililɛ Edwɛkpakavolɛma Sukulu ne azo bɛtete bɛ nuhua dɔɔnwo. Edwɛkpatɛlɛvolɛma lɛ ɛhulolɛ kɛ bɛbadu bɛavi bɛ sua zo bɛahɔ maanle gyɛne nu. Kɛmɔ edwɛkpatɛlɛvolɛma ɛhye mɔ mɔɔ di nɔhalɛ la ɛnyi sunsum nu, bɛnyia ndetelɛ na bɛlɛ anwubielɛ la ati, bɛboa bɛmaa bɛbɔ edwɛkpa ne nolo yɛɛ bɛyɛ neazo kɛnlɛma bɛmaa ɛdoavolɛma fofolɛ.

 Wɔ Bɛtɛle biala anu, Field Ministers Desk ne mɔɔ wɔ Ɛzonlenlɛ Nwo Gyimalilɛleka ne la nee Ɔfese Kɔmatii ne bɔ nu yɛ gyima fa ninyɛne mɔɔ edwɛkpatɛlɛvolɛma hyia, le kɛ sua, kpɔkɛdelɛ nwo ngyehyɛleɛ nee ezukoa ekyi mɔɔ bɛbava bɛaduodua bɛ nwo kakɛ ngyikyi la maa bɛ. Wɔ 2020 ɛzonlenlɛ ɛvolɛ ne anu, Gyihova Alasevolɛ vale asɛɛ U.S. dɔla mgbe 27 nleanle edwɛkpatɛlɛvolɛma. Ɔlua ngyehyɛleɛ ɛhye mɔ ati, edwɛkpatɛlɛvolɛma kola fa bɛ adwenle amuala sie ɛzonlenlɛ gyima ne azo na bɛmaa asafo mɔɔ bɛwɔ nu la anwosesebɛ.

 Kɛzi edwɛkpatɛlɛvolɛma ɛboa edwɛkɛhanlɛ gyima ne ɛ? Frank Madsen mɔɔ boka Malawi Ɔfese Kɔmatii ne anwo la hanle kɛ: “Kɛmɔ edwɛkpatɛlɛvolɛma lɛ akɛnrasesebɛ na bɛze gyima ne anye zo la ati, bɛboa asafo ngakyile bɛmaa bɛlɛyɛ gyima wɔ azɛlɛsinli mɔɔ ɛkɛ daselɛlilɛ yɛ se la, le kɛ azua mɔɔ bɛdo nwolɛ bane nee ɛleka mɔɔ bɛka aneɛ gyɛne la. Eza kɛmɔ bɛbɔ mɔdenle bɛsukoa maanle ne anu aneɛ nee bɛ amaamuo la ati, ɔka awie mɔ ahonle, na bɛboa ngakula bɛmaa bɛnyia ɛhulolɛ kɛ bɛbayɛ dahuu ɛzonlenlɛ gyima ne bie. Yɛyɛ Gyihova mo kɛ yemaa yɛnyia edwɛkpatɛlɛvolɛma la.”

 Maanle gyɛne nu Ɔfese Kɔmatii ne anu sonla ko hanle kɛ: “Edwɛkpatɛlɛvolɛma le neazo mɔɔ kile kɛ koyɛlɛ wɔ Gyihova menli mɔɔ wɔ ewiade amuala la avinli. Menli mɔɔ bɛnle Alasevolɛ bɔbɔ la ɛnwu kɛ yɛmmaa amaamuo ɛmkpakyekpakye yɛ nu, emomu Baebolo ngilehilelɛ ɛboa yɛ ɛmaa yɛyɛ mediema mɔɔ koyɛlɛ wɔ yɛ avinli.”

 Kɛzi edwɛkpatɛlɛvolɛma boa nolobɔlɛma mɔɔ wɔ ɛkɛ ne la ɛ? Paulo mɔɔ vi Timor-Leste anye die edwɛkpatɛlɛvolɛma mɔɔ wɔ ye asafo ne anu la anwo. Ɔhanle kɛ: “Ɛleka mɔɔ yɛwɔ la dɔ kpalɛ. Noko ɔnva nwo kɛ edwɛkpatɛlɛvolɛma ne vi maanle mɔɔ ɛkɛ ne yɛ ɛyɛlɛ anu la, bɛmmaa wuluwulu ne ɛnzi bɛ adenle kɛ bɛbaha edwɛkɛ ne. Nwonlomɔ biala bɛba daselɛlilɛ ayia. Meta menwu bɛ kɛ bɛlɛkɔ bɛahɔyɛ sia kɔkpɔla ewiazo, mekɛ mɔɔ maanle nu dɔ kpalɛ la yɛɛ nɔsolɛ nu. Bɛboa menli dɔɔnwo bɛmaa bɛnwu nɔhalɛ ne, medame noko meboka nwo. Bɛfa mɔdenlebɔlɛ nee anyelielɛ bɛsonle Gyihova bɛ ngoane mekɛ kɔsɔɔti na ɛhye maa asafo ne anwosesebɛ maa bɛsonle Nyamenle kpalɛ.”

 Ketti mɔɔ le dahuu adekpakyelɛnli mɔɔ vi Malawi la hanle kɛzi edwɛkpatɛlɛvolɛ agyalɛma bie boale ye abusua ne la anwo edwɛkɛ kɛ: “Mɔɔ edwɛkpatɛlɛvolɛma ɛhye rale yɛ asafo ne anu la, ɛnee me ngomekye a mele Dasevolɛ wɔ me abusua ne anu a. Noko agyalɛma ɛhye boale me kpalɛ na bɛbikyele me abusua ne. Bɛ neazo kpalɛ ne boale me mra ne mɔ maanle bɛnwunle kɛzi yɛsonle Gyihova a ɔmaa yɛ nye die na yɛ kunlu dwo yɛ nwo la. Ɔlua edwɛkpatɛlɛvolɛma ne neazo kpalɛ ne ati, kɛkala me mra mraalɛ nsa ne le dahuu adekpakyelɛma yɛɛ me hu ɛbɔ ɔ bo ɛlɛba debiezukoalɛ.”

 Kɛzi yɛnyia ezukoa yɛnea edwɛkpatɛlɛvolɛma ɛ? Yɛfa ndoboa mɔɔ bɛye bɛboa ewiade amuala gyima ne, mɔɔ menli dɔɔnwo dua ndenle ngakyile mɔɔ wɔ donate.pr418.com ne azo ye la bie a yɛnea bɛ a. Yɛ nye sɔ ndoboa ɛhye mɔ mɔɔ bɛfi bɛ ahonle nu bɛye la kpalɛ.