Wɔ 2020, esiane dɔɔnwo sisile yɛɛ COVID-19 ewulenzane ne noko bɔle ɔ bo wɔ ewiade amuala. Kɛzi Gyihova Alasevolɛ boale bɛdabɛ mɔɔ esiane ɛhye mɔ dole bɛ la ɛ?

 Wɔ 2020 ɛzonlenlɛ ɛvolɛ a ne anu, Neazo Eku ne Ngitanwodivoma Kɔmatii ne liele dole nu kɛ bɛva dɔla b mgbe 28 bɛboa esiane mekɛ nu moalɛ gyima ne. Ɛhye boale menli mɔɔ esiane mɔɔ bo 200 dole bɛ la​—bie a le COVID-19 ewulenzane ne, ahumuakyima ngakyile, azuyilɛ wɔ Africa, ɛhɔne mɔɔ rale Venezuela, yɛɛ wawaa mɔɔ rale Zimbabwe la. Ɛhye boale maanle bɛduale kakɛ mɔɔ bɛbɔle ye wɔ aleɛ, nzule, dabelɛ, adɛladeɛ nee ayileyɛlɛ nwo la; yɛɛ akee ninyɛne mɔɔ bɛbava bɛakyikyi sua nu, bɛayɛ ninyɛne mɔɔ ɛzɛkye la boɛ yɛɛ azua mɔɔ bɛsisile bɛ fofolɛ la. Yɛzuzu moalɛ gyima ne anwo neazo ekyi anwo.

 COVID-19. Ewulenzane ne hanle yɛ mediema mɔɔ wɔ ewiade amuala la wɔ nwonane nu, nganeɛdelɛ nu yɛɛ ezukoa afoa nu. Amaa yɛaboa bɛ la, yɛdele Esiane Nwo Moalɛ Kɔmatii (DRCs) mɔɔ bo 800 la wɔ ewiade amuala. Kɔmatii ɛhye mɔ guale bɛ nye aze nleanle ninyɛne mɔɔ yɛ mediema ne mɔ hyia nwolɛ la na bɛvale amaneɛbɔlɛ mɔɔ baboa Ngitanwodivoma Kɔmatii ne yeamaa yeanwu ɛleka mɔɔ bɛhyia moalɛ kpalɛ la bɛhɔmaanle ye ndɛndɛ.

 Kɔmatii ne mɔ (DRCs) ɛboa menli dɔɔnwo wɔ ɛvolɛ ne anu amuala bɛmaa bɛnyia aleɛ, nzule, bɔkɔbɔkɔyɛlɛ nwo ninyɛne yɛɛ nyile bie mɔ. Wɔ ɛleka bie mɔ, eza bɛ nee asafo nu mgbanyima mɔɔ wɔ ɛkɛ la ɛboa mediema ɛmaa bɛnyia moalɛ bɛvi arane ne ɛkɛ.

 Menli mɔɔ bɛnle Alasevolɛ la ɛnwu yɛ moalɛ gyima ne. Kɛ neazo la, Field Simwinga mɔɔ le Nakonde maangyeba ne mɔɔ wɔ Zambia azo kpanyinli ne la hanle hilele yɛ mediema ne mɔ kɛ: “Yɛ nye sɔ kɛzi bɛboale mbusua mɔɔ esiane ne ɛha bɛ la wɔ ye mekɛ nu la kpalɛ.”

 Ɛhɔne Mɔɔ Rale Angola. Ɔlua COVID-19 ewulenzane ne ati, aleɛ hale ekyi bie wɔ Angola yɛɛ ye bolɛ yɛle se. Ɛnee ɔyɛ se ɔmaa yɛ mediema dɔɔnwo kɛ bɛbahola bie tɔ.

 Bɛhanle bɛhilele Brazil ɔfese ne kɛ bɛva aleɛ bɛhɔmaa yɛ mediema mɔɔ wɔ Angola la. Amaa bɛanzɛkye ezukoa dɔɔnwo la, mediema ne mɔ yɛle neɛnleanu na bɛnwunle adenle kpalɛ mɔɔ bɛbalua zo bɛatotɔ aleɛ na bɛava bɛanwa la. Yɛɛ bɛantotɔ aleɛ ne ngoko ngoko, emomu bɛdɔle ye dɔɔnwo. Ɛhye ati, kakɛ mɔɔ bɛbɔle ye wɔ aleɛ edukue biala mɔɔ bɛvale bɛmaanle sonla ko biala anwo la le kɛyɛ dɔla 22 ala, na aleɛ mɔɔ wɔ edukue biala anu la bie a le awule, aluba nee nwole, yɛɛ ye ɛlomboɛ le kɛyɛ kilo 20. Badwu ɛnɛ, bɛva aleɛ edukue 33,544 bɛnwa​—ɔ muala ɛlomboɛ le metric tons 654. Saa ɛfa aleɛ ɛhye ɛboka aleɛ mɔɔ bɛnyianle wɔ Angola la anwo a, ɔboale ɔmaanle yɛmaanle menli mɔɔ bo 50,000 la aleɛ!

 Kɛzi moalɛ ɛhye ɛha yɛ mediema ne mɔ ɛ? Alexandre mɔɔ de Angola namule bie azo la hanle kɛ: “Menwu ɛhye kɛ ɔle daselɛ mɔɔ kile kɛ Gyihova kulo me na ɔtɛkale me ngome. Me nwo hyia Gyihova ahyehyɛdeɛ ne!” Mariza, ɛrɛladane bie mɔɔ ɔ ngomekye ɔlɛnea ɔ mra la hanle kɛ: “Gyihova dele me ɛzulɛ. Meyɛ ɔ nee ye ahyehyɛdeɛ ne mo!”

 Wawaa Mekɛ Nu Moalɛ Wɔ Zimbabwe. Wɔ 2020 ɛzonlenlɛ ɛvolɛ ne anu, wawaa bie mɔɔ anloa yɛ se la zile Zimbabwe na ɛnee menli mgbe dɔɔnwo ɛnnyia aleɛ ɛnli. Ɛnee Alasevolɛ apenle dɔɔnwo mɔɔ wɔ Zimbabwe la ɛnlɛ aleɛ mɔɔ sa bɛ la.

 Bɛdele Esiane Nwo Moalɛ Kɔmatii nnu kɛ bɛboa yɛ mediema ne mɔ. Nolobɔlɛma dɔɔnwo boale maanle bɛhyehyɛle aleɛ wɔ nlɛka nu, bɛvale bɛguale ahale nu yɛɛ bie mɔ vale bɛ kale rale kɛ bɛva bɛyɛ gyima. c Wɔ 2020 ɛzonlenlɛ ɛvolɛ ne anu, bɛyele ezukoa dɔla 691,561 bɛdɔle aleɛ bɛmaanle menli mɔɔ bo 22,700 la!

 Ɔdwu mekɛ ne bie a, mediema kali aleɛ mɔɔ bɛlɛ la awie la, ɛnee moalɛ ɛra. Saa moalɛ ne dwu mediema ne mɔ ɛkɛ a, bɛye Gyihova ayɛlɛ. Bie mɔ bɔbɔ bɔ ɔ bo to Belemgbunlililɛ edwɛne.

 Wɔ ɛleka ko, mediema mraalɛ nwiɔ mɔɔ bɛle ahunlanvolɛ la hɔle ayia bie abo. Bɛyɛle ayia ne kɛ bɛfa bɛaha aleɛ mɔɔ eku bie mɔɔ ɛnle arane ɛdeɛ la (NGO) se ɔfa yearɛlɛ bɛ la anwo edwɛkɛ. Noko ayia ne rayɛle maanyɛlɛsɛm, ɔti mediema mraalɛ ne mɔ zile kpɔkɛ kɛ bɛnrɛyɛ ninyɛne mɔɔ bɛse bɛyɛ amaa bɛ sa aha aleɛ ne la. Mɔɔ bɛlɛfi ayia ne abo la, bɛgolole bɛ nwo na bɛzele bɛ kɛ, “Bɛmmaba yɛ ɛkɛ ne kɛ bɛba bɛarakpondɛ aleɛ bɛali!” Noko wɔ dapɛne nwiɔ pɛ anzi, mediema mɔɔ ɛlɛfa moalɛ amaa la radwule mediema mraalɛ ɛhye mɔ sua zo na bɛmaanle bɛ aleɛ​—kolaa na NGO moalɛ ɛdeɛ ne ara!

 Eza esiane nwo moalɛ gyima ne ɛmaa bɛli daselɛ kpalɛ wɔ Zimbabwe. Maa yɛva Prisca mɔɔ de namule ekyi bie azo la anwubielɛ ne kɛ neazo. Ɔnva nwo kɛ ɛnee wawaa ne ɛmaa asetɛnla nu ɛyɛ se la, Prisca yele Maanle nee Yalɛ ziele ɛkɛ ne kɛ ɔbava yɛahɔ daselɛlilɛ, bɔbɔ wɔ mekɛ mɔɔ ɛya ɛzonlɛ mekɛ ɛdwu la. Ye namule ne azo amra golole ɔ nwo na bɛhanle kɛ: “Wɔ edwɛkpahanlɛ ne ati ɛhɔne bahu wɔ abusua ne agua bɛ lɔ.” Prisca bua bɛ kɛ: “Gyihova ɛtɛkpole ye azonvolɛ ɛlɛ.” Yeangyɛ, ɔnyianle moalɛ ɔvile yɛ ahyehyɛdeɛ ne ɛkɛ. Ɛhye hanle Prisca kpalɛzo amra bie mɔ ahonle na bɛhanle kɛ: “Nyamenle ɛtɛkpole wɔ ɛlɛ, ɔti yɛkulo kɛ yɛsukoa ɔ nwo debie.” Kɛkala ye kpalɛzo amra nsuu tie debiezukoalɛ ne mɔɔ bɛyɛ wɔ riledio zo la bie.

 Mekɛ mɔɔ yɛlɛbikye awieleɛ ne kpalɛ la, esiane dɔɔnwo basisi. (Mateyu 24:3, 7) Yɛ nye sɔ kɛzi bɛfi bɛ ahonle nu bɛdua ndenle ngakyile mɔɔ wɔ donate.pr418.com ne azo bɛye ndoboa la kpalɛ. Ɔmaa yɛfa moalɛ mɔɔ fɛta la yɛmaa mediema mɔɔ ɛhyia la wɔ ye mekɛ nu.