Ɛvolɛ biala Kilisienema mɔɔ ɛgyakyi daselɛlilɛ la ba Ngakyelɛlilɛ ne bie. Bɛbɔle ngoane ɛnriandilɛ ne abo, noko ɔlua debie bie ati bɛgyakyi. Bɛha ninyɛne ɛhye mɔ bie anwo edwɛkɛ wɔ Sia Bɛla Gyihova Ɛkɛ brohyua ne anu. (Hi 12:1) Noko akee, menli ɛhye mɔ mɔɔ Gyihova vale ɔ Ra ne mogya dɔle bɛ la sonle bolɛ maa ye. (Gyi 20:28; 1Pi 1:18, 19) Kɛzi yɛbaboa bɛ yɛamaa bɛazia bara asafo ne anu ɛ?

Asafo nu mgbanyima kpondɛ Kilisienema mɔɔ bɛgyakyi daselɛlilɛ la na bɛboa bɛ kɛ mɔɔ mboaneneavolɛ bie tɔ ɔ rɛle aze kpondɛ boane mɔɔ ɛvi mboane ekpunli ne anu la. (Lu 15:4-7) Ɛhye kile kɛzi Gyihova dwenle bɛ nwo la. (Gyɛ 23:3, 4) Ɔnle mgbanyima ne mɔ angome gyima, yɛ muala yɛkola yɛboa menli ɛhye mɔ. Mɔdenle mɔɔ yɛbɔ kɛ yɛbamaa yɛ nye alie bɛ nwo na yɛala ɛlɔlɛ ali yɛahile bɛ la sɔ Gyihova anye na nvasoɛ dɔɔnwo vi nu bara. (Mrɛ 19:17; Gyi 20:35) Ɛhye ati, dwenle menli mɔɔ ɛbahola wɔaboa bɛ la anwo, na yɛ ye ndɛndɛ!

BƐNLEA BOA BƐDABƐ MƆƆ BƐGYAKYI DASELƐLILƐ LA VIDIO NE, NA BƐZUZU KPUYA ƐHYE MƆ ANWO:

• Duzu a Abbey limoale yɛle wɔ mekɛ mɔɔ ɔyiale Dasevolɛ bie mɔɔ ɔnze ye la ɛ?

• Saa yɛkulo kɛ yɛboa awie mɔɔ ɛgyakyi daselɛlilɛ la a, duzu ati a ɔwɔ kɛ yɛkɔnwu mgbanyima ne mɔ ɛ?

• Kɛzi Abbey zieziele ɔ nwo hɔkpɔlale Laura bieko ɛ?

• Kɛzi Abbey nyianle abotane, ɛlɔlɛ na ɔzile pi wɔ mekɛ mɔɔ ɔlɛbɔ mɔdenle yeaboa Laura la ɛ?

• Duzu a yɛsukoa yɛfi Gyisɛse ndonwo ne mɔɔ wɔ Luku 15:8-10 la anu a?

• Nyilalɛ boni mɔ a vi mɔdenle mɔɔ bɛbɔle kɛ bɛboa Laura la anu rale a?