Nwane mɔ a ɔwɔ kɛ yɛdie bɛ kɛnlɛma a? Awie biala mɔɔ ba yɛ Kilisiene nyianu ne bie la—ɔvi fofolɛma kɔdwu yɛ gɔnwo mɔ dɛba anwo zo. (Wlo 15:7; Hi 13:2) Ɔbahola yeayɛ yɛ diema bie mɔɔ vi maanle gyɛne nu anzɛɛ Kilisienenli mɔɔ ɛgyakyi daselɛlilɛ na ɔlɛba debiezukoalɛ wɔ mekɛ mɔɔ limoa wɔ ɛvolɛ dɔɔnwo anu la. Saa ɛdawɔ a, asoo anrɛɛ ɛ nye ɛnrɛlie kɛ bɛbalie wɔ kɛnlɛma ɔ? (Mt 7:12) Ɔti bɔ mɔdenle soma awie biala mɔɔ wɔ Belemgbunlililɛ Asalo ɛkɛ ne la kolaa na bɛabɔ debiezukoalɛ bo yɛɛ mekɛ mɔɔ bɛkpɔne la. Ɛhye bamaa ɛlɔlɛ adɛnla yɛ avinli na yɛawula Gyihova anyunlunyia. (Mt 5:16) Nɔhalɛ nu, bie a ɛ nee awie biala mɔɔ bara la ɛnrɛdendɛ. Noko, saa yɛ muala yɛyɛ yɛ afoa nu ɛdeɛ a, awie biala bade nganeɛ kɛ bɛlie ye kɛnlɛma. *

Ɔwɔ kɛ yɛdie nyɛvolɛ wɔ mekɛ kɔsɔɔti anu na tɛ mekɛ titili le kɛ Ngakyelɛlilɛ mekɛ ne angome. Saa fofolɛma ba na bɛnwu yɛ Kilisiene ɛlɔlɛ ne a, bie a ɔbaha bɛ yeamaa bɛaye Nyamenle ayɛlɛ na bɛ nee yɛ azonle.—Dwn 13:35.