Ɔbɔ ye ɛvolɛ ɛhye mɔɔ kɔ la, yɛbanyia mekɛ dɔɔnwo yɛava yɛaziezie yɛ nwo yɛamaa Kelaese ewule Ngakyelɛlilɛ ne. Saa Ngakyelɛlilɛ ne si wɔ dapɛne avinli a, yɛnrɛyɛ yɛ Ɛbɛlabɔlɛ Nee Yɛ Ɛzonlenlɛ Nyianu ne wɔ zɔhane dapɛne ne anu. Saa ɔsi wɔ dapɛne awieleɛ a, yɛnrɛmaa bagua nu ɛdendɛlɛ yɛɛ yɛnrɛyɛ Ɛzinzalɛ Arane debiezukoalɛ ne. Ɛbava mekɛ ɛhye wɔali gyima kpalɛ ɔ? Kɛ mɔɔ ɛnee ɔde ye wɔ ɛvoya mɔɔ limoa la, zɔhane ala a ɔwɔ kɛ yɛyɛ ngyehyɛleɛ kpalɛ mɔɔ ɔbaboa la yɛmaa kenle titili ɛhye a. (Lu 22:7-13; km 3/15 1) Eza ɔwɔ kɛ yɛ muala yɛsiezie yɛ ahonle. Kɛ ɔkɛyɛ na yɛayɛ ɛhye ɛ?

• Dwenledwenle deɛmɔti ɔhyia kɛ ɛkɔ la anwo.​—1Kɔ 11:23-26

• Fa asɔneyɛlɛ suzu ɛ nee Gyihova agɔnwolɛvalɛ ne anwo.​—1Kɔ 11:27-29; 2Kɔ 13:5

• Kenga na dwenledwenle Ngɛlɛlera mɔɔ ka Ngakyelɛlilɛ ne anwo edwɛkɛ la anwo.​—Dwn 3:16; 15:13

Nolobɔlɛma bie mɔ kenga na bɛdwenledwenle Ngakyelɛlilɛ Baebolo ɛgengalɛ ne mɔɔ wɔ Neɛnlea Ngɛlɛlera Ne Anu Dahuu anu la anwo. Bie mɔ noko kenga Baebolo ngyehyɛnu mɔɔ wɔ ɛlɛka ne mɔɔ wɔ ɔ bo ɛke anu la. Eza bie mɔ noko suzu edwɛkɛ mɔɔ fale Ngakyelɛlilɛ ne anwo yɛɛ ɛlɔlɛ mɔɔ Gyihova nee Gyisɛse ɛla ye ali ɛhile yɛ mɔɔ wɔ Ɛzinzalɛ Arane ne mɔ anu la anwo. Ɔnva nwo nuhua biala mɔɔ ɛbava wɔali gyima la, ɔrɛla ye kɛ ɔbamaa wɔabikye Gyihova nee ɔ Ra ne.