DEƐMƆTI ƆHYIA LA: Ɔwɔ kɛ Baebolo sukoavoma yila bɛ nwo zo maa Gyihova na bɛmaa bɛsɔne bɛ amaa bɛanyia ɔ nyunlu ɛlolɛ. (1Pi 3:21) Sunsum nu banebɔlɛ wɔ ɛkɛ ne maa bɛdabɛ mɔɔ bɛ ɛbɛlabɔlɛ nee bɛnwozoyilalɛ ne yia la. (Ed 91:1, 2) Kilisienli yila ɔ nwo zo maa Gyihova na tɛ sonla bie, gyima anzɛɛ ahyehyɛdeɛ bie ɔ. Ɛhye ati, ɔwɔ kɛ sukoavoma nyia ɛlɔlɛ nee anyezɔlɛ maa Nyamenle.—Wlo 14:7, 8.

KƐZI BƐYƐ YE LA:

• Saa bɛlɛsukoa a, bɛzuzu mɔɔ ɛzukoalɛdeɛ ne ka ye wɔ Gyihova anwo la anwo. Si zolɛ kɛ ɔgenga Baebolo ne dahuu na ɔzɛlɛ Gyihova “dahuu.”—1Tɛ 5:17; Gye 4:8.

• Maa wɔ sukoavo ne anwosesebɛ maa ɔva bɛnwozoyilalɛ nee ɛzɔnenlɛ ɔzie ɔ nye zo. Bieko, boa ye maa ɔdwu bodane ngyikyi bie mɔ anwo, le kɛ mualɛ ɛmaanlɛ, anzɛɛ ɔbali ye kpalɛzo amra nee ɔ gɔnwo mɔ gyimayɛvoma daselɛ. Kakye kɛ Gyihova ɛntinlitinli awie biala anwo zo kɛ ɔzonle ye. Bɛnwozoyilalɛ le awie ɔdaye ɔ ti anwo kpɔkɛzilɛ.—Mɛl 30:19, 20

• Maa wɔ sukoavo ne anwosesebɛ maa ɔyɛ nzenzaleɛ mɔɔ hyia la amaa yeazɔ Gyihova anye na yeafɛta kɛ bɛsɔne ye. (Mrɛ 27:11) Ɔluakɛ subane bie mɔ ɛha ɔ nwo la ati, bie a ɔbahyia kɛ bɛkɔ zo bɛboa ye amaa yeaye subane dɛba ne yeagua na yeawula subane fofolɛ ne. (Ɛf 4:22-24) Ka edwɛkɛ mɔɔ wɔ Ɛzinzalɛ Arane ne anu mɔɔ se “Baebolo Ne Kakyi Sonla” la bie kile ye

• Ka anyelielɛ mɔɔ wɔnyia wɔ Gyihova ɛzonlenlɛ nu la bie kile ye.—Ay 48:17, 18.