DEƐMƆTI ƆHYIA LA: Buluku biala mɔɔ boka Ninyɛne Titili Mɔɔ Yɛfa Yɛkilehile anwo la twe adwenle kɔ jw.org azo. Nɔhalɛ nu, ngitanwolilɛ kaade ne yɛɛ trate ne mɔɔ se Nienwu a yɛbanyia ɛbɛlabɔlɛ nu kpuyia mɔɔ anwo hyia la anwo mualɛ a? la bodane a le kɛ ɔtwe menli adwenle yeahɔ yɛ wɛbsaete ne azo. Ɛkola ɛdua jw.org azo ɛfa buluku anzɛɛ vidio bie mɔɔ boka Ninyɛne Titili Mɔɔ Yɛfa Yɛkilehile anwo la link ɛsɛnde awie. Ɛhye boa, titili wɔ mekɛ mɔɔ ɛbayia awie mɔɔ ka aneɛ gyɛne la. Bieko, menli bahola abiza kpuya mɔɔ bie a nwolɛ mualɛ ɛnle mbuluku mɔɔ boka Ninyɛne Titili Mɔɔ Yɛfa Yɛkilehile anwo la anu. Saa yɛfa wɛbsaete ne yɛdi gyima kpalɛ a, yɛ daselɛlilɛ gyima ne banyia anyuhɔlɛ.

KƐZI BƐYƐ YE LA:

• Fa “BAEBOLO NGILEHILELƐ” foa ne di gyima. Fa ye kɛ ɛlɛdi awovolɛ mɔɔ kulo kɛ ɔnyia ngakula ɛtetelɛ nwo edwɛkɛ dɔɔnwo la daselɛ. Kɔ BAEBOLO NGILEHILELƐ > AGYALƐ & ABUSUA abo.

• Fa “MBULUKU” foa ne di gyima. Fa ye kɛ ɛlɛdi daselɛ wɔ sukulu na ɛkulo kɛ ɛfa Kpuya 10 Mɔɔ Mgbavolɛ Nee Mbɛlɛra Biza La Anwo Mualɛ buluku ne ɛkile ɛ gɔnwo sukulu kakula bie. Kɔ MBULUKU > MBULUKU & BROHYUA abo.

• Fa “YƐ NWO EDWƐKƐ” foa ne di gyima. Fa ye kɛ ɛlɛdi ɛ gɔnwo gyimayɛvo bie daselɛ na ɔkulo kɛ ɔkenga yɛ diedi ne anwo edwɛkɛ ekyi. Kɔ YƐ NWO EDWƐKƐ > KPUYA MƆƆ MENLI TA BIZA abo.

NEA FA JW.ORG DI GYIMA VIDIO NE NA NEA ƐLEKA MƆƆ ƐBAHƆ WƆ WƐBSAETE NE AZO NA WƆANYIA DEBIE WƆAVA WƆABOA:

• awie mɔɔ kulo kɛ ɔnwu dɔɔnwo ɔfale Nyamenle anwo

• awie mɔɔ esiane dole ye ɛtɛkyɛle la

• adiema nrenyia anzɛɛ raalɛ mɔɔ ɛgyakyi daselɛlilɛ ɛhɔlɛ la

• awie mɔɔ ɛsia wɔahɔkpɔla ye mɔɔ ɔnnwu kɛzi yɛbɔ yɛ gyima ne anwo kakɛ la

• awie mɔɔ vi maanle fofolɛ zo na ɔkulo kɛ ɔkɔ debiezukoalɛ wɔ ye sua zo la