Wɔ ɛzoanvolɛ Pɔɔlo kɛlata ne mɔɔ sunsum ne maanle ɔhɛlɛle Taetɛse la anu, ɔzele mgbavolɛ mɔɔ Taetɛse boka nwolɛ la kɛ bɛbɔ mɔdenle ‘bɛla bɛ nwo ali wɔ adenle biala anu kɛ bɛyɛ neazo wɔ nyɛleɛ kpalɛ nu.’ (Ta 2:6, 7) Wɔ ngyɛnu ne awieleɛ ɔhilele kɛ bɛde Gyihova menli nwo, ɔti “bɛbɔ gyima kpalɛ nwo mɔdenle.” (Ta 2:14) Gyima kpalɛ ɛhye bie a le Nyamenle Belemgbunlililɛ ne anwo nolobɔlɛ nee ye ngilehilelɛ ne. Saa ɛle kpavolɛ anzɛɛ bɛlɛra a, ɛbahola wɔava wɔ anwosesebɛ wɔazonle kɛ adekpakyelɛ boavolɛ anzɛɛ dahuu adekpakyelɛnli ɔ?​—Mrɛ 20:29.

Saa ɛkulo adekpakyelɛ gyima ne a, yɛ ngyehyɛleɛ mɔɔ bamaa wɔahola wɔayɛ bie la. (Lu 14:28-30) Kɛ neazo la, kɛzi ɛbanlea ɛ nwo wɔ mekɛ mɔɔ ɛlɛyɛ dahuu ɛzonlenlɛ gyima ne la ɛ? Kɛ ɔkɛyɛ na wɔadwu wɔ dɔnehwele ne anwo ɛ? Sɛlɛ Gyihova kɛ ɔboa wɔ. (Ed 37:5) Ɛ nee wɔ awovolɛ nee adekpakyelɛma mɔɔ bɔ mɔdenle la ɛzuzu mɔɔ ɛkulo kɛ ɛyɛ la anwo. Akee yɛ wɔ bodane ne anwo debie. Gyihova bayila mɔdenle mɔɔ ɛlɛbɔ wɔ ye ɛzonlenlɛ nu la azo!

NEA MGBAVOLƐ NEE MBƐLƐRA DI GYIHOVA ENI VIDIO NE NA AKEE BUA KPUYA ƐHYE MƆ:

• Ngyegyelɛ boni a adekpakyelɛma bie mɔ ɛli zolɛ konim a, na kɛzi bɛyɛle ye ɛ?

• Kɛzi awovolɛ bahola aboa bɛ mra bɛamaa bɛayɛ adekpakyelɛma ɛ?

• Kɛmɔti a ɔhyia kɛ ɛbanyia ngyehyɛleɛ mɔɔ ɛbava wɔayɛ daselɛlilɛ gyima ne la ɛ?

• Kɛzi asafo ne anu amra bahola amaa adekpakyelɛma anwosesebɛ na bɛaboa bɛ ɛ?

• Duzu nyilalɛ a adekpakyelɛma nyia a?