Ɔbɔ ye 2018 mɔɔ ba la, maanlema Ɛzinzalɛ Arane ne nee Awake! ne anu ko biala ka edwɛkɛtile ko anwo edwɛkɛ. Magazine ɛhye mɔ amuala boka Ninyɛne Titili Mɔɔ Yɛfa Yɛkilehile la anwo, ɔti yɛkola yɛfa yɛdi gyima wɔ daselɛlilɛ nu. Yɛbahola yɛava bie yɛazia yɛ nwo wɔ mekɛ mɔɔ yɛlɛtu adenle anzɛɛ yɛkali gua la. Yɛnva magazine ne mɔ yɛnyɛ Baebolo ɛzukoalɛ ɛdeɛ, noko bɛboa yɛ bɛmaa yɛnwu menli mɔɔ bɛlɛ ɛhulolɛ kɛ bɛbazukoa Nyamenle anwo debie la.

Saa yɛ nee menli ɛlɛbɔ adawu a, yɛbahola yɛagenga ngɛlɛlera ko na yɛaha magazine ne anu edwɛkɛtile bie mɔɔ bɛ nye die nwo la yɛahile bɛ. Kɛ neazo la, saa ahenle ne lɛ abusua, anzɛɛ ɔlɛdi nyane anzɛɛ adwenleadwenle ɛdɔ ɔ nwo a, bie a yɛbahola yɛaha kɛ: “Megenga wɔ tɛnlabelɛ ne anwo edwɛkɛ kɛnlɛma bie kenlensa ye. Mebahola meava meahile wɔ ɔ?” Saa bɔbɔ ɔle ɛkpɔlalɛ mɔɔ limoa na yɛnwu kɛ ɔ nye die nwolɛ a, yɛbahola yɛamaa ye magazine ne ko anzɛɛ yɛbahola yɛava yɛanwa ye wɔ fonu zo. Ɔwɔ nuhua kɛ, tɛ yɛ bodane titili a le kɛ yɛkyehyɛ magazine, noko magazine ne mɔ boa yɛ maa yɛnwu menli mɔɔ bɛlɛ ɛhulolɛ kɛ bɛbava mɔɔ bɛtie la bɛayɛ gyima la.​—Gyi 13:48.