Gyisɛse hilehilele kɛ: ‘Bɛnyia ɛhye mgbane bɛva bɛmaa mgbane.’ (Mt 10:8) Yɛdi adehilelɛ fɔɔnwo ɛhye azo la ati, saa yɛmaa menli Baebolo anzɛɛ Baebolo nwo mbuluku a, yɛmpɛ bolɛ. (2Kɔ 2:17) Noko akee, nɔhalɛ mɔɔ sonle bolɛ mɔɔ wɔ Nyamenle Edwɛkɛ ne anu la a wɔ mbuluku ɛhye mɔ anu a. Ɔhyia mɔdenlebɔlɛ nee ezukoa dɔɔnwo na bɛapelente mbuluku bɛamaa asafo mɔɔ wɔ ewiade amuala la. Ɛhye ati, ɔwɔ kɛ yɛfa mɔɔ yɛhyia nwo la ala.

Fa nwunu di gyima wɔ mekɛ mɔɔ ɛlɛfa mbuluku wɔamaa awie mɔ la, bɔbɔ wɔ ɛleka mɔɔ bɛyɛ bagua nu daselɛlilɛ la. (Mt 7:6) Kɛ anrɛɛ ɛbava buluku wɔamaa menli mɔɔ ɛlɛpɛ nu ala la, bɔ mɔdenle ɛ nee bɛ ɛli adwelie na nea kɛ bɛ nye die nwolɛ a. Asoo ɛbahola wɔabua kpuya ne mɔ mɔɔ wɔ ɛlɛka ne anu la anu ko kɛ ɛhɛe ɔ? Saa ɛngola ɛnnwu kɛ ahenle anye die nwolɛ a, ɔbayɛ kpalɛ kɛ ɛbamaa ye trate. Nɔhalɛ nu, saa ɔka kɛ ɔdie magazine anzɛɛ buluku gyɛne biala a, yɛbade yɛ nyunlu yɛamaa ye bie.—Mrɛ 3:27, 28.